الموضوع: ينفع اسافر بعربيتي البيتلز اسكندريه بحالتها دي اعمل ايه

السلام عليكم و رحمة الله و بركاته

ايوا بس انتم كده خوفتوني
الموتور يا جماعه مفيهوش حاجهيعني قوي

طبعاً طبيعى جداً إن حضرتك تخاف من الردود لأن الأعضاء الكرام بيجوبوك على أساس كلام حضرتك دا

هي تقريبا موتورها ممكن يكون خفيف بس مش بتاكل زيت قوي يعني
الكاوتش جديد
ابلاتين وكوندينسر جديد
بس البوجيهات مستعملين لسه مغيرهم

انا بيني وبينكم خايف لاني اول مره اسافر بيها
ولو وقفت تبقي مشكله

و هو رد طبيعى على كلامك السابق و ماتخفش منه

السلام عليكم
اخى الفاضل اولا اتكل على الله البيتلز ياأخى عربيه مش موتسيكل يعنى تسافر فلسطين مش اسكندريه بس كل اللى عليك انك لو بتحس ان الزيت بينقص خالى معاك زيت ااحتياطى ولو جبت سير دينامو برده خليه للاحتياط مش اكتر بس وسافر لو حصل معاك ى حاجه كلمنى او كلم الاستاذ احمد حسن او كلم الحاج محمد على الميكانيكى انا سافرت اسكندريه اكثر من مره واحمد حسن بيسافر بعربيته كثير جدا جدا الاسكندريه الاسماعليه بحكم شغله وعمرنا ماحصل حاجه معانا فى الطريق انا السير قعد معايا فى العربيه احتياطى بقاله سنه ونصف ومستخدمتهوش ولا عمرى زودت زيت خالص انا بس بخليه للاحتياط
سافر ياأخى واعرف انك راكب عربيه وعربيه جامده كمان طبعا قبل السفر بنتأكد من ظبط الهواء فى الاطارات
ونشوف زيت الفرامل وزيت الماتور وأتكل على الله
تليفونى 0102070464
تليفون الاستاذ احمد حسن 0100058284
الحج محمد على الميكانيكى 0129305520 - 0166552904
وان شاء الله رحلة سعيده

و طبعاً كلام أستاذنا الكبير أحمد سالم ... سليم و كلنا تحت أمرك فى أى وقت و لوجه الله تعالى

و كمان كل النصايح اللى قالها جميع الأعضاء المحترمين لابد أن تأخذ فى الإعتبار و دا لمصلحتك طبعاً.
يعنى الزيت لازم يكون مظبوط و كمان طقم الكهرباء و ظبط الكهرباء و التاكيهات و تكشف على زيت الفتيس و يكون معاك زيت ماتور إحتياطى مع سير الدينامو ( 10 جنية ) و كلها حاجات لازم تعملها لما تشترى عربية جديدة أو مع سرفيس العربية كل 5000 كيلو تقريباً , و كل دا عشان ماتتعرضش لمواقف رخمة فى الطريق.
و صدقنى لو كل دا مظبوط مش هاتحتاج حاجة غير إنك تحط بنزين فقط لا غير و تسافر و تروح و تيجى زى ما انت عاوز بأمر الله على خير.
أنا و الحمد لله بسافر بعربيتى كل الوجة البحرى تقريباً لغاية اسكندرية و مطروح و كمان الإسماعيلية و الصالحية الجديدة و بور سعيد و على الرغم من أن ماتورى 1300 و كمان فيه خشونة و دا طول الأسبوع تقريبا و ذهاب و عودة فى نفس اليوم و بسم الله و ما شاء الله و الحمد لله و طبعاً براعى النصائح والكلام اللى قالوه الزملاء.

معلش انا طولت بس عشان أطمنك و أطمن كل الناس اللى تحب تطمن على قدرة عربياتها , و على فكرة أنا و بعض الزملاء بنستفيد من كلام بعضنا من نصائح و طرق صيانة و غيره و أنا و كام زميل لينا فى المنتدى بنتقابل و نجرب نفك و نغسل و نركب البوجيهات و طقم الكهرباء و الزيت و غيره عشان نقدر بأمر الله نتغلب على الظروف الطارئة لا قدر الله اللى ممكن تحصلنا فى الطريق و خاصة السفر لأن مثلاً أنا غالبية شغلى فى مزارع زراعية و مصانع و أماكن قد تكون محدوفة و مقطوعة و الكلام دا مع أى عربية قديمة مش بيتل فقط ربنا يسترها معانا جميعاً