أرقام أجزاء القطع الأصلية البرامج الخاصة بمجموعة فولكس

**original** · 22-01-2009 05:43 PM

حروف فتيسك أيه يافندم علشان في اكتر من فتيس بيركبوا على الموتور ده

دورت على النت لأيت مقاس أويل سيل الزيت بتاع الفتيس :
24x15x7mm

هروح أشتريه من عند متخصصين الأويلسيلات وأجيب نوع نضيف وأتأكد من شكله بدل ما أفك وبعد كده أدور عليه وده هيبأا أحسنلى من اللى بجيبه من بتوع قطع غيار الفولكس وأكيد هيكون ببلاش

**fadynabil** · 17-02-2009 10:44 AM

في الأول أحب أقولكم أنا معايا إبيزا ٩٤ > ١٣٠٠كاربراتير

بدأ المشوار .. كان في زيادة ملحوظة في الأر بي إم كان مثلا وأنا علي ١٠٠ ع الخامس بيبقي ٣٥٠٠ مع إنه المفروض يبقي علي ٣٠٠٠

المهم مشيت بيها فترة وكبرت دماغي بس بصراحة كانت العربيه سحبها زي الفل .. و واحد صاحبي جربها وقالي تمام بس لسة مشكلة الأر بي إم عاملالي أرق

المهم كان في صوت لبلية الدبرياچ وعضة كده .. فغيرت إمبارح طقم الدبرياچ .. لقيته كان في سوستة مكسوره في الديسك

ولقيت فرش في الفتيس مكسور

... المهم غيرت الطقم كاملا .. وكمان الفرش .. ومستي بقي المفاجأه ،،، قلت هلاقي صاروخ تحت رجلي

> ويالا خيبة الأمل >> لم أجد فرق ملحوظ في السحب بل بالعكس إبتدأت تظهر مشاكل الفتيس وهو صوت خبطة بيين كل نقلة .،، وكمان عضة عند نقل الغيارات .. حتي والعربية مطفيه

والميكانيكي قالي إن الفتيس اللي راكب ده بتاع بولو .. وكان متغير قبل كدة

وكشفنا عليها بعد مجربناها أنا والميكانيكي وقالي إن في مشكلة في كرونة الفتيس وأنا بنفسي نزلت تحت العربية وشفت في الحتة دي وإنت بتنقل بيحصل حركة أعلي وأسفل مع حركة الغيار

فهل السبب هو زيت ولا إيه بالظبط مع العلم إني مغيرتش زيت الفتيس كنت بزود بس

المهم الميكانيكي قالي ريح دماغك وهاتلك فتيس >> فكنت عايز أسآل علي إيه أفضل فتيس ممكن يتركب للعربية ( وهيبقي في حدود كام )

وهل لوغيرت الفتيس مشكلة الأر بي إم هتتحل ،،

**umoussa** · 17-02-2009 11:42 AM

هي مشكلة الـ Rpm ملهاش علاقة بالفتيس ليها علاقة بطقة الدبرياج

ارتفاع الـ Rpm مع عدم حصولك على القدرة المطلوبة يعني أن طقم الدبرياج بيفوت....

بالنسبة للفتيس...عليك وعلى الحرفيين وهات فتيس استيراد الفتيس ده كدا كتر خيره وشكله جاب أخره.. إلي انا بقولهولك ده نصيحة لوجه الله بدل متقعد تدور على السبب وتصرف فلوس ملهاش لزمة على الفاضي والمليان والصنايعية يقعودوا يمرجحوك وهات وركب وغير وشيل وحط ونضف وغير وبدل و و و و و وفي الآخر تلاقي نفسك صرفت ثمن فتيس والفتيس برضو متصلحش وعايز لسه تجيب فتيس..

انزل الحرفيين - روح نزلة الريحاني واسأل على محل مجدي البيومي هناك حتلاقي طلبك ولو عايز توصية وانت رايح ابقى قولي وانا ممكن اقبلك هناك أو اكلمهولك وهو حيعمل معاك احسن واجب.. وخلف المحل في انضف ميكانيكي في الحرفيين بتاع فولكس واسمه ياسر ولا تغلب نفسك ولا حاجة حتحط الفتيس في شنطة العربية وتمشي 200 متر بقيت عند ياسر...

أي خدمه

**ابوهاشم** · 17-02-2009 11:58 AM

لو ممكن معلومات عن البيتلز

**umoussa** · 17-02-2009 12:07 PM

أنا آسف جداً يافندم معرفش حاجة عن الموديلات القديمة

ومن قال لا أعلم فقد أفتى

آسف جداً مرة تانية

**fadynabil** · 17-02-2009 02:16 PM

المشاركة الأصلية كتبت بواسطة umoussa

هي مشكلة الـ Rpm ملهاش علاقة بالفتيس ليها علاقة بطقة الدبرياج

ارتفاع الـ Rpm مع عدم حصولك على القدرة المطلوبة يعني أن طقم الدبرياج بيفوت....

بالنسبة للفتيس...عليك وعلى الحرفيين وهات فتيس استيراد الفتيس ده كدا كتر خيره وشكله جاب أخره.. إلي انا بقولهولك ده نصيحة لوجه الله بدل متقعد تدور على السبب وتصرف فلوس ملهاش لزمة على الفاضي والمليان والصنايعية يقعودوا يمرجحوك وهات وركب وغير وشيل وحط ونضف وغير وبدل و و و و و وفي الآخر تلاقي نفسك صرفت ثمن فتيس والفتيس برضو متصلحش وعايز لسه تجيب فتيس..

انزل الحرفيين - روح نزلة الريحاني واسأل على محل مجدي البيومي هناك حتلاقي طلبك ولو عايز توصية وانت رايح ابقى قولي وانا ممكن اقبلك هناك أو اكلمهولك وهو حيعمل معاك احسن واجب.. وخلف المحل في انضف ميكانيكي في الحرفيين بتاع فولكس واسمه ياسر ولا تغلب نفسك ولا حاجة حتحط الفتيس في شنطة العربية وتمشي 200 متر بقيت عند ياسر...

أي خدمه

شكراٍ جزيلاً بس أنا كنت عايز أسأل هل الفتيس لو إتغيرله زيت إسو العضه هتروح ولا إيه

وبالنسبه لموضوع الRPM إزاي أنا لسة مغير طقم دبرياچ كامل نوعه ڤاليو .. وهوه مش بيفوت لا ف القديم ولا اللي راكب حاليا

بس أنا أعتقد إن السبب الفتيس مش بيدي قدرة الموتور الكامله

يا ريت تصححلي معلوماتي لو فيها غلط

وكمان الفتيس هيبقي في حدو د كام أنا كان واحد صاحبي إشتري فتيس لكوردوبا ٩٥ أو ٩٦ كان بــ ٥٠٠ ج تقريبا هل هيبقي في نفس الحدود وهل لو ركبت فتيس جولف ٣ هيديني أداء أفضل ؟

**umoussa** · 17-02-2009 11:29 PM

طيب اسمع يا سيدي:

- الزيت مش حيخلي العضة تمشي لأن العضة دي خلاص اصبحت عيب ميكانيكي داخل الفتيس ممكن تقل شوية بس مش حتختفي.

- انت عندك صوت ور في السرعات من 3 إلى 5 ولما بتيجي تزود بنزين صوت الور دا بيعلى وتحس بكراكة تحت رجليك لو حطيت رجلك ورا البدالات على صدر العربية؟

- طقم الدبرياج جبته من عند مين؟ ومغيره من امتى؟

- لما بتيجي تنقل بتحس ان العصاية محجرة معاك مش عايزة تنقل، والحل للمشكلة دي انك تبطل العربية أو تدوس وتسيب دواسة الدبرياج اكتر من مرة؟

معرفش الفتيس يعمل كام بس طبعاً لو لاقيته بالسعر الي انت بتقول عليه يبقى لقطة لأن الاسعار دلوقتي كلها نار.

متركبش حاجة على العربية غير بتاعتها لا جولف 3 ولا بولو.

**fadynabil** · 19-02-2009 10:17 AM

بص يا بشمهندس

- أولا أنا مش بسمع أي صوت في السرعات اللي إنت قولت عليها .. بس ساعات بحس بصوت وره خفيفه أوي تكاد لا تسمع من صوت الموتور والعربيه دايره المكانيكي قالي مرة دي طرمبة الميه

- بس أول ماجي أدور العربية بحس بصوت بعد الدواره زي الكراكة لمده ثانيه >> وأعتقد إنها ليها علاقة بالمارش

- بالنسبة للعصايه ساعات بتبقي ناعمة جداً وساعات بتبقي فيها عضه أو تتريس كده وفي الغالب بتبقي فيها عضه أو ماتخدش الغيار بسهوله

- وبالنسبة لطقم الدبرياچ جبته نوعه ڤاليو من عند واحد في فيصل إسمه الشيخ عمرو وبـ ٥٣٠ جنيه

**umoussa** · 19-02-2009 10:27 AM

طيب الحمد لله طالما مفيش ور على السرعات النقلات الي بقولك عليها وانت بتزود بنزبن يبقى الكبالن الداخلية سليمة..

الورة الي بعد الدوارة فعلاً عالباً من المارش، لو تعرف ميكانيكي كويس خليه يفكة وينضفة ببنزبن ودا حيخلي العربية تدور اسرع والورة حتروح.

بالنسبة بقى للعصاية الي بتربس وماترضاش تنقل،

1. لازم تتأكد من ان التيشين بتوع العصاية سلام مفيهمش أي كسر لو سلام...

2. تظبط العصاية، لو فضلت العضة موجودة

يؤسفني أقولك ان طقم الدبرياج وحش ومبيعشقش كويس ودا سبب ان النقلة بتربس وتحتاج تدوس وتسيب دواسة الدبرياج أكتر من مرة لحد ما تنقل

المشكلة ان طقم الدبرياج الفاليو ده فيه منه مضروب ومجدد كتير أوي هو والساكس بصراحة

**umoussa** · 19-02-2009 10:40 AM

بص يا سيدي الصورة الي جاية دي من برنامج قطع الغيار بتاع سيات

رقم طقم الدبرياج الاصلي الكامل بتاعك هو رقم 3 الطقم 190 مم مش 200 مم

لو تعرف تروح التوكيل لا قدر الله علشان تجيب واحد اصلي خد الرقم دا معاك....دا إذا لا قدر الله احتجت تغير الطقم