يا أسكندرانية ..... لازم نشوف حل فى الموضوع ده

**amr mokhtar** · 17-08-2007 05:28 PM

انا أكتب أليكم الآن و انا مسطشيط غضبآ ...
انا مش فاهم هى الناس بتعدى من فوق الأنفاق بتاعة الكورنيش ليه؟؟؟؟؟؟؟؟؟؟

انا كنت لسه هشيل عائلة بحالها و ربنا ستر ... الناس دى متخيلة ان سواق العربية عنده القدره انه يقفظ من فوقهم بطريقة ما
أرجو اللى عنده تفسير للموضوع ده يا ريييييييت يرحنى
و على فكرة خدوا بالكوا من الحته بتاعة لوران عشان هى اكتر حته بيعدوا منها
و ربنا يستر طريقنا يا رب

**AlmAhAtmA** · 17-08-2007 05:47 PM

حسبي الله و نعم الوكيل
انا كنت مسافر فتره و لما رجعت كانت اعمال التوسعه خلصت
و في نفس الوقت كان 7 من الشارع بتاعنا ماتوا ايوه بجد 7 الرقم صحيح
المنطقه عندنا في سبورتنج كان من نصيبها اكبر مساحه توسعه
لدرجه انهم حطين جزء من سور البحر القديم كتذكار
الشعب المصري طبعا بلياقته البدنيه العاله و الذهنيه التي لا غبار عليها
بيسيب النفق اللي ما يبعدش 50 متر و هبه يالا بينا يعدي
المشكله ان في الشارع عندنا ما عملوش ضبط للمسافات الجديده
فيالا بينا نعدي و يروحوا وقفين علي نفس مسافه السور القديمه في الشارع الجديد
و ابو كرش و ام جلابيه يقفوا ياخدوا نفسهم يفاجؤا انهم في نص الشارع و هباااااااااااا طاخ

انا حصل معايا موقف زي ده
لكن الاخت كانت لابسه جلبيه طويله و شايله عيل و ساحبه واحد تاني
لكن ربنا ستر
نزلت بكل هدوء و رحت فاتح صوتي علي الاخر
حرام عليكي لو مش انت اللي شايلاه ده زنبه ايه
و سبت ولاد الحلال يكملوا

المشكله مش في كده
المشكله ان مره واحد سواق غلبان شال شاب راحوا اهل الشاب مولعين في العربيه بتاعته
يعني الموضوع مش بيكون سهل

ربنا يستر معانا اجمعين

**amr mokhtar** · 17-08-2007 06:33 PM

و الله يا استاذ هانى انا بيتهقلى ان هم لو عملوا أنفاق تحت الكورنيش و خلوا العربيات تنزل فيها و خلوا الشارع ده كله للمشاه ..... برضه هتلاقى الناس إياهم نازلين عشان يعدوا من أدام العربيات .... هى تقريبآ هواية او حاجة كده

**hazem_khidr** · 17-08-2007 08:44 PM

الانفاق في مصر معموله للمنظره بس انما مش للاستعمال الادمي ابدا الناس بتكسل تنزل السلالم و تطلعها.
الحلو الوحيد للمشكله دي انهم يعملو فواصل بين الطريقين لو كان الطريق مزدوج و يقفلو الفواصل دي باسلاك شائكه او ددار خرساني :twisted:
و لو اتجاه واحد يعملو علي الرصيف برضه الاسلاك دي علشان اللي يعدي ما يعرفش يطلع علي الرصيف و بقي الناس حتحترم نفسها

**Karim_Monir** · 17-08-2007 09:47 PM

موضوع السبعة اللي ماتو دول كانوا بتوع الاسرة الاسوانية اللي سواق الميكروباص عجنهم في سور المحكمة على البحر وعلى حاجة تانية
انا السنة اللي فاتت الطرق حلو مووت وانا خايف اجري من اللي بيعدوا دول

اما يا حازم احسن طريقة هيا عمل سور حديد في نص الشارع زي اللي كان في شارع الازهر واتعمل دلوقتي عند موقف العاشر
المنطقة عملو كوبري والناس بتوقف الطريق وانا كنت يوميا بروح العاشر في ساعة
نص ساعة طريق ونص ساعة اعدي من الحتة دي
لما قفلوا الطريق الاوسط بالسور الحديد انتهت الحوادث اليومية اللي كل يوم تسفر عن قتيل او عدة جرححى بسبب غبار البني ادمين اللي فاكرين انهم اسرع من العربيات

لكن ما زال المسلسل مكرر عند سوق العبور وخاصة صباحا لما تلاقي صغار البياعين بيعدو الطريق بالاقفاص (4 حارات)ويوميا قتيل وعدة جرحي
والحكومة سايباهم ماهم برضه بيخفوا من الازمة السكانية

**Islam_galal** · 19-08-2007 01:59 PM

أحسن حل . . . . . الفلوس
غرامات فورية للي يعدي من مكان غلط
صدقوني دي لا مبالاة من الناس فلما الحكومة تبطل لا مبالاه و تهتم بالناس حتتحل المشكلة

**amr mokhtar** · 19-08-2007 03:24 PM

هى فعلآ الحل ممكن يكون فى الغرامات الفورية.... بس المشكلة مين اللى ها يلم الغرامات ...

**hazem_khidr** · 19-08-2007 03:42 PM

أحسن حل . . . . . الفلوس
غرامات فورية للي يعدي من مكان غلط
صدقوني دي لا مبالاة من الناس فلما الحكومة تبطل لا مبالاه و تهتم بالناس حتتحل المشكلة

مش حينفع يا سلام لو واحد دفع عشره مش حيدفعو انت عارف النباهه و الخبث بتوع بعض الناس

**sab3aawy** · 19-08-2007 05:02 PM

وربنا صعبانة عليا اسكندرية اجمل مدينة فى مصر

وصعبان عليا اكتر الأسكندرانية الشعب الراقى الفنان

من اللى بيحصل لهم كل صيف

ماهو المشكلة ان اسكندرية رخيصة والوصول لها سهل ومواصلاتها كتير وجميلة

يعنى فيها كل ما يغرى البسطاء بالذهاب لقضاء الأجازة فيها

لكن مشكلة الغالبية الساحقة من البسطاء ماديا فى بلدنا انهم مش متعلمين، وينقصهم الكثير من الحس الحضارى

والمشكلة دى مش هم اللى بيحسوا بيها لكن بيحس بيها ابن الإسكندرية اللى بيعانى فى الصيف من غزو جحافل التتار التى تقضى على الأخضر واليابس

فبينما ان اسكندرية الشتاء لاينقصها الكثير لتكون اثينا او نابولى او مارسيليا،

فإن اسكندرية الصيف لا ترقى كثير عن كفر البلاص بكل هؤلاء الغير متعلمين الذين يملئونها بسلوكياتهم العجيبة والفاظهم النابية وملابسهم المثيرة للغثيان وذبابهم ورائحة اطعمتهم وزحامهم واجترائهم على كل شئ فى المدينة العريقة بالتخريب والتدمير

وعلى ذلك فرغم اننى اعشق اسكندرية الشتاء واتلمس فيها روائح الحضارة التى سبقتنا وتركت لنا عبقا نتنسمه فى تلك المدينة الجملية التى ارى فيها آخر ما تبقى لنا من التشبث بأهداب الحضارة

إلا اننى امقت اسكندرية الصيف ولا أجرؤ على ان اوجه عنان دابتى الى طريق الإسكندرية حفظا لكرامتى الىت قد تنداس تحت نعال الغزاه، وكلما تذكرت منظر شواطئ شرق الإسكندرية صيفا ادعوا الله ان تنزاح غمة الصيف عن الإسكندرانية بدون خسائر