الموضوع: المطب و مطلوب رد من الخبراء الله يكرمكوا

سلام عليكم يا جماعة
لو تفتكروا انا كنت كاتب موصوع اسمه
و بدأ مسلسل المتاعب فى بروتون بيرسونا - يارب يكون من حلقة واحدة
المهم كان ملخص الموضوع انى أكلت مطب جامد و انا ماشى على 120 على الدائرى و بعدين حسيت بحدفة للعربية
المهم انا فعلا حاسس ان العربية مش مظبوطة قوى زي الاول بتحدف و اوقات بحس انها كمان بتعوم
بحس انى لازم ابقى مميل الدريكسيون يمين سنه
المهم انا كنت عملت ظبط زوايا و الراجل كان قالى مافيش حاجه فى العربية بس الدنيا برضه ماكنتش مظبوطه بالعكس انا حسيت انى استلمت العربية أوحش من الاول لما عملى ظبط الزوايا
المهم قعدت ادعبس و اسأل لحد لما ناس قالتلى على واحد بتاع زوايا كويس عندنا فى الجيزة و تحديدا فى منطقة العمرانية
رحتله و قولتله يكشفلى على الزوايا و شرحتله ايه اللى انا بحس بيه
المهم ابتدى يشتغل و بعدين قالى انت العجلة اليمين ( اللى انا أكلت بيها المطب) مرحلة 1 سم بالسالب
و راح فعلا مورينى الترحيل ده لقيت فعلا ان الجهز جايب على العجلة اليمين 1 و نص بالسالب و الشمال نص درجة بالسالب – هو قالى ان الطبيعى بيبقى نص درجة فوق أو تحت لكن انت عندك فى اليمين درجة و نص بالسالب ترحيل و الشمال مظبوط
قولتله طب ايه العمل و ايه الحل – قالى احنا عايزين نرد العجلة دى شويه علشان يبقوا الاتنين زي بعض و بعدين نظبط زوايا و العربية هاتبقى بعد كده فل معاك ان شاء الله
المهم انا اتحججتله انى مش فاضى دلوقت و قولت امشى و انا كنت مسافر تانى يوم اسكندرية و قولت اجرب لما كمان امشى على سرعات عالية على الطريق هايبقى ايه النظام – فعلا سافرت اول امبارح و كنت ماشى تقريبا على 160 – العربية على السرعة ثابته و الحمد لله لكن برضه لازم ابقى مميل الدريكسيون سنه يمن لانها برضه بتحدف
و انا راجع زودت السرعه فى بعض الاحيان ووصلت لـ 180 و برضه الحمد لله ثابته لكن برضه نفس الفكره فى الحدفة و على السرعات الصغيرة مثثلا لغاية ال، 100 اوقات بحس انها بتعوم بسيط – مش عارف فعلا هى بتعوم ولا ان بيتهيألى علشان كل شويه لازم ارد الدريكسيون
النقطة بقى دلوقت انا مش عارف اروح اردها عنده و انا اعتقد انه هايرزع فيها من تحت – ولا اروح التوكيل و انا خايف فى التوكيل مايفيدونيش او يبعتونى او حتى يشبحونى فى الفلوس
مش عارف بقى الصراحة - فياريت لو تكرمتوا تفيدونى فى الموضوع ده و هل لو انا عملتها عنده هاتخرج من الضمان ولا ايه ؟ فعلا محتار جدا و منزعج جدا لانى حاسس انى مش عارف استمتع بالعربية مع العيب ده
على فكره الراجل قالى هي هاتتكلف فى حدود 120 – 150 جنيه
اظن انها فى التوكيل مش هاتبقى اقل من 3 اضعاف
معلش ياريت حد يفيدنى فى الموضوع ده

انا حقولك على السيناريو الى حيحصل فى التوكيل " لانى مجرب نفس القصه و غيرت المساعدين فى التوكيل بسبب مشكله مشابه

حتروح لبشمهندس مصطفى مهندس الاستقبال الساعه 9 الصبح و تقوله على الى فى العربيه و انها بتحتدف
حيقولك حنكشف عليها زوايا " 80 جنيه " و تستلمها الساعه 2

- تيجى الساعه 2 حتلاقى العربيه مركونه لوحديها بره و خلصانه بقالها 3 ساعات و حتسمع الجمله ديه " يافندم انتا محتاج تغير مساعد و ده عيب استخدام و حتتحمل تمنه كذا جنيه و 100 جنيه تمن تغير المساعد " .


*مساعد الواجا ب 660 جنيه يعنى حتلاقى مساعد الجين 2 فى الحدود ديه . 50 جنيه اقل او ازيد.

المساعد لما بيكون مفتوح لبره او لجوه او مرحل مالوش غير التغير او الزرجينه


طبعا الكلام ده كله " لو فعلا الراجل بتاع الزوايا صادق و المساعد فعلا مرحل زى مابيقول " .

انا رأيى حاول تاخد القرار : اما الزرجينه " بس مش ب120 جنيه . المبلغ ده كتير " او تروح التوكيل و تقولهم على المشكله بس تبقى مستعد لدفع تمن التغير و مصنعيه التركيب " و خليهم يخصمو ال10 % الخصم الخاص لنايل موتورز " .