فى نقطة اختلف معاك فيها و هى زيادة البنزين

الاحتراق الامثل داخل المحرك بيبقى عند نسبة هواء/وقود 1/14.7 و لو النسبة دى اتغيرت بيحصل فقد فى القدرة

لو نسبة البنزين قلت عن كدة او بمعنى اخر بقى فيه هواء زيادة المزيج حيبقى فقير و درجة حرارة الاحتراق حتعلى كتير لحد ما تسبب انفجار المحرك... و دة بيحصل فى المواتير اللى بيتركب فيها تربو و يكون نظام الوقود مش مضبوط و مبيديش بنزين بشكل كافى للمحرك

لو نسبة البنزين زادت حيبقى المزيق غنى و برضة القدرة حتقل... العربية حتطلع دخنة سودة و استهلاك الوقود حايعلى كتير و على المدى الطويل دة حيسبب تلف البوجيهات و حساس الاكسجين و الكتالتك

حد حيقولى طيب ما الفلتر بيزود الهوا اللى داخل للموتور... حقولة كلامك صح و عشان كدة الكمبيوتر بتاع المحرك بيحس ان الخليط بقى فقير شوية عن طريق حساس الاكسجين و دة الطبيعى نتيجة الهواء الزيادة فا الكمبيوتر بيزود مدة فتح الرشاشات عشان يعادل نسبة المزيج مرة تانية

طبعا القصة دى متنفعش مع التربو لان كمية الهواء المضافة اكتر بكتير و اكيد حتبقى برة خريطة الوقود اللى متبرمجة على الكمبيوتر ... و حتى لو جوة الخريطة حيبقى صعب تصحيح نسبة الخليط لان الرشاشات الستوك صغيرة و ضغط البنزين قليل على عربية فيها تربو

نفس الميكانزم دة هو اللى اثبت فشل الشريحة اللى بتتركب على حساس العمة... الشريحة عبارة عن مقاومة بتركب بدل الحساس و بتقول للكمبيوتر ان درجة الحرارة بتاعت الهواء قليلة جدا فا الهواء المسحوب داخل المحرك منكمش و مليان اكسجين و بالتالى الكمبيوتر حيدى بنزين زيادة للموتور... لحد دلوقتى كلام جميل

بما ان احنا بندحك على الكمبيوتر فا البنزين الزيادة اللى رماه فى الموتور خلى الخليط غنى... الكمبيوتر حيحس بكدة عن طريق حساس الاكسجين و يرجع يقلل البنزين تانى عشان كدة اى تعديل بيتم عن طريق اللعب فى الحساسات بيبقى غلط و خطر

MMamdouh