انا متهيألي لو ظبط ماتورك ممكن تجيب تكيف الساندن الياباني من توكيله و تركبه و هيبقي كويس و جيبله المروحة الزيادة بتاعته اللي بتتحط قدام و انا مش شايف غلط في تركيبه
عرض للطباعة
انا متهيألي لو ظبط ماتورك ممكن تجيب تكيف الساندن الياباني من توكيله و تركبه و هيبقي كويس و جيبله المروحة الزيادة بتاعته اللي بتتحط قدام و انا مش شايف غلط في تركيبه
بص حجيبلك من الأخر، لأني برضة راكب اونو 98 كاربيراتير راكبلها تكييف ساندن
لو ناوي تركب التكييف للخلاص من الرطوبة بليل او الشمس المتوسطة العصر انطلق
غير كدة الصبح تأثيرة ضعيف جدا جوا العربية لكن في النهاية انا بشوف انة احسن من مفيش
بالنسبة للسحب اكيد يتأثر شوية طبعا لكن مش الرهيب، في النهاية التكييف علي الأونو محتاج جري، كل ما حتجري كل ما حتاخد تكييف كويس، هو النسبة ليا علي السفر و الطرق السريعة شويتين زي صلاح سالم و المحور و كدة بيقول حبة، يعني عايز اقولك اني مثلا لما ببقي مسافر اسكندرية بليل و بجيبة علي اول درجة بعد نص ساعة انا تقريبا بسقع منة
خد بالك برضة ان العربية فيها مشكلة مضاعفة الموضوع و هي ان مفيهاش عزل لا بادي ولا قزاز فدة عامل مشكلة انك مش بتتخلص من الحرار الخارجية
كمان التكييف التركيب فية مشكلة بايخة و هو انا خاصية سحب الهوا من جوا العربية و تدويرة مش موجودة و دة بيخلية يفضل يسحب هوا سخن من برا و يبردة و دة اكيد بيضعف عملية التبريد طبعا
اعتقد انا كدة جبت من الأخر لو عندك اي حاجة تانية عايز تعرفها قولي
سمسم باشا انا الى قولت على الاونو زفت بقولك انا دورة التبريد عندى مش عارف اعملها اية العربية بتسخن على الطرق السريعة مثلا على طريق مصر اسكندرية كل 80 كيلو تسخن مرة اغير طلمبة الماية وغيرت الخرطوم السفلى الى هو اسمو الاخطبوط وتعبت عقبال مالقيتو و كمان غيرت الطبة بتاعة الماية الى عند سير الكاتينة وكمان اخر حاجة انا عندى دورة تبريد العربية دورة مغلقة يعنى معنديش غطى للريداتير عندى حاجة بلاستيك صغيرة اسمها حنفية الريداتير او عصفورة دية الى بظبط بيها الهوا بتاع الريداتير بسحب الهوا منها بفتحها لغاية لما تطلع الهوا وبعد كدة اول ما تبتدى تطلع ماية اقفلها اهى العصفورة دية طارت منى على طريق مصر اسكندرية و مش لاقيها اعمل اية تعرف حد يبعها مع الاخذ فى الاعتبار انى موديل 2001 وانا محافظ على العربية العربية ما رشتش خالص من برة لسة بحالتها وياريت اى حد يعرف فى الموضوع دة يقولى يا جدعان لحسن انا مخنوق على الاخر
h_nouur
يا عمي يبقي كدة اساسا دورة التبريد مش مقفولة
اساسا العصفورة اللي انت مستهون بيها دية مش حاجة اي كلام يعني لأنها بتبخر المية طبعا و كمان بتدخل هوا للموتور بس الموضوع بسيط يتحل
اقفل الفتحة دية خالص و الطريقة سهلة جدا
حتدور العربية و هي باردة و تزود مية و بعدها حتبدأ الفتحة دية تطلع الهوا و بعدها تطلع مية ، هنا بطل العربية و الحم مكانها بالبتاع الفضي اللي مش فاكر اسمة دة او اي حاجة و بس و شكرا علي كدة
و بعد كدة متزودش العربية مية و هي سخنة و بس
و بعدين بدل ما كنت تغير الخرطوم يا عمنا كنت غيرت الريداتير اسهل من الأول
كلام سليم ياجماعه لو التكيف هيعمل مشاكل بلاش منه وهو ده الى انا بعمله لانى بجد احب امشى بالعربيه مضبوطه ومن غير تكيف احسن من انى امشى بيها مكيفه وبتنتش وبتكركر على الطريق انا على طول بركب عربيتن جامدين مش الاونو بقى لا دايو نبيرا وميجان والاتنين مش بشغل فيهم التكيف خالص لانهم 1600 اه بس بحس ان اداء العربيه مش مضبوط مع التكييف
ولو فعلا هنشغل يبقى اسيب العربيه وهو وقفه ونشغل التكييف على الاخر ولحد من حش انها بقيت تمام انزل التكيف على اول درجه وابتدى امشى وربنا معانا فى رمضان
وبالنسبه للاستاذ الى مش لاقى العصفوره سوق الجمعه مليان عصفير جميع الاشكال والالوان
وكل سنه وجميع اعضائنا بخير وسلام
سؤال يا جدعان و تحديدا لسمسم لأنة لسة مغير حاجات في العفشة و بتاع
الأكس بتاع الأونو بكام لأني أخدت حفرة محترمة عملتلي عوجة في الأكس بتخلي العربية تتهز علي سرعة، فعايز اعرف هو عامل كام استيراد و عامل كام جديد
الأكس اللي هو المقص مش كده ؟ :)
عالعموم لو المقص
الأيطالي ب140
و التركي ب115 يا باشا
عندي اونو موديل 1993 و عايز اعرف المفروض بتعمل كام كيلو في الصفيحة؟؟ و هي الصفيحة كام لتر اساساً و لا لما تبقلى مليانية على الآخر؟؟؟؟
انا معاىه اونو 94
ايه ياعم سمسم مش هنعمل كرنفال للونو ونمشى بيها فى شوارع المحروسه ونتصور
ياريت انا عيز النهادة ابل بكرة
ايه رأيكم يا جماعة يوم الجمعة اللي جاي ده علطول ان شاء الله
متخليها الخميس وانا معاك
لاحسن الجمعه هطلع على السوق علشان هنبيع الميجان
منا النهارده عندي درس علي فكرة ]:
بكرة بيبقي الكل فاضي و كده
اليوم ضاع و شكلنا مش هنتقابل خالص يا جدعان ولا ايه بس
و امبارح بليل وقفت في اشارة لقيت 2 اونو جمبي علي الشمال ورا بعض و واحدة ادامييي ياريتني كنت انا كمان ببتاعتي لوووول
هاي ازيك يارجالة انا كنت ناوي اغير واجيب يا اونوو يا اكسيل ياكسنت فتقريبا الاكسيل والاكسنت زي بعض فكنت عايز اعرف رئيكم انهي افضل الاوةنو موديل الفين او الفين وواحد كربراتير ولا الاكسل سبعة وتسعين او تمانية وتسعين همة تقريبا متقاربين في السعر بس انا عايز رئيكم انهي افضل مش مهم الوسع اوي المهم الصوت العزل الرفاهية يعني وقطع الغيار بردو والعفشة
شكرا يانادر يعني انت رئيك انهي الافضل في العموم
الافضل في العموم الاكسيل لانها ببساطة فئة اعلى
بس حط في الاعتبار فرق استهلاك البنين (اونو 1000 cc واكسيل 1500cc و1300cc)
فرق اسعار قطع الغيار (مش كبير)
ههههههههه لا يا مان :)
احنا عندنا اكسيل و اونو
و فعلا زي ما نادر باشا قال لحضرتك تمام
و بصراحة الأكسل فعلا افضل بس خلي بالك ان ديه فءة و ديه فءة
انا عن نفسي لما بخرج ليا انا بخرج بالأونو و انا بصراحة بعشق الأونو و هي عربية حلوة اوي و مش ضيقة و صاجها انشف من الأكسيل و معدل الأمان في الأيطالي عامتا اعلي و انا عن نفسي اعرف ازاي اعدلها و كده و ممكن تاخد فكرة عن العربية كلها
بس الأكسيل طبعا احسن و قطع غيارها ارخص و رفاهية و عفشة احسن و بتستحمل و حمارة شغل
بص
سيبك مني و هات اكسيل فعلا و ان شاء الله هتعجبك :)))
كلام سليم :)
ايه يا جماعة محدش رد عليا في موضوع المقابلة ده :))
طب اللي يعرف اونو مستعمله بحاله ممتازة في اسكندرية لو سمحتم
15 الف
اصل بجد رقم غريب مش عارف جبتة منين
السلام عليكم
انا لسه منضم جديد لسه شاري العربيه من كام يوم
اونو 94 سنتر انذار جنوط فابريكه من جوه العربيه الحمد لله كويسه بس عايزه شوية مصاريف ان شاء الله تكون بسيطه ود العادي
والله يا جماعه الأونو دي عربيه جامدة جدا أنا معايا أونو 1993 مش مزعلاني في أي حاجة وليا واحد صاحبي بعيد عنكم جميعا معاة واحدة 1994 مراتة كانت سايقاها دخلت بيها في عامود خرسانه السمكري بيحلف إنه إتوهم من قوتها وقال إنها لو كانت عربيه تانية كانت غيرت نص مفيش كلام لكن دي عرف يشتغل فيها ويرجعها تاني ..... عايزين بجد نتبادل الخبرات لنستفيد جميعا .
اهلا بيكو نورتو الرابطة :)
و هي فعلا عربية حلوة و مش ضعيفة و استحمال لأبعد حدود
احم احم
اخبط الاول ولا افتح الباب وادخل معاكم الرابطة !!!!!!!!!!!!!!!
بما انى جبت اونو 99 تخلص عمرتها بس واقولكم فيها باور ولا لا و4 ولا 5 سرعات وباقى الاوبشن الى فيها لانى لسة معرفش اشترتها ونفس الميكانيكى خدها يعملها عمره فى يومها
الأونو 99 زي بتاعتي بالظبط، لأن بتاعتي اكتوبر 98
كاربيراتير، مفيهاش باور بس الدركسون لطيف جدا علي فكرة مش مزعج إطلاقا
هي خمس سرعات طبعا، السرعة القصوي 140 بالنسبة للـ 45
الأونو 99 زي بتاعتي بالظبط، لأن بتاعتي اكتوبر 98
كاربيراتير، مفيهاش باور بس الدركسون لطيف جدا علي فكرة مش مزعج إطلاقا
هي خمس سرعات طبعا، السرعة القصوي 140 بالنسبة للـ 45
طيب تمام اوى
هو العداد لحد 180 انما اقصى سرعة يعنى 140 ؟؟؟؟؟؟
وان شاء الله الراجل النهاردة هيبدء فى العمره وبلاش فكرة الموتور الاستيراد مش كدا صح هى كانت عاملة 163الف كيلو تقريبا.....
اية نصايحك ليا بما انى لسة بتعلم سواقة سواء فى تظبيطها بس الحاجات الخفيفة العادية يعنى وتظبيط الكهربا وكدا وازاى اعرف انه مظبوطة
بص انا رأيي ابعد دلوقتي شوية عن ماتور الإستيراد و شوف الماتور بعد العمرة حيبقي اخبارة اية
و كمان الماتور مش عامل كتير قوي يعني
يعني لسة يقدر يديك كمان، هو تلاقي اللي كان راكبها كان بيفتري علي الماتور بس شويتين
بص انا رأيي ابعد دلوقتي شوية عن ماتور الإستيراد و شوف الماتور بعد العمرة حيبقي اخبارة اية
و كمان الماتور مش عامل كتير قوي يعني
يعني لسة يقدر يديك كمان، هو تلاقي اللي كان راكبها كان بيفتري علي الماتور بس شويتين
علي فكرة انتو مجموعة شباب زي الفل عشان بتحاولو تساعدوا بعضيكوا وياريت تقبلوني معاكو بما اني ققرت اجيب اونو 93 او 94 لان الفلوس اللي معايا حوالي 25000 مش اكتر وياريت حد يفدني في سؤالي الاول.... هو مقيش سوق في الاسكندرية للمستعمل زي القاهرة كدة علما باني من الاسكندرية وحجيب عربية كمان اسبوعين كدة ومن كتر كلامكوا عن الاونو انا حبيتها الصراحة خصوصا اني شاب ودي اول عربية حركبها .... وانا سعيد جدا اني كتبت في التوبيك دة وشكراا ليكوا كلوكوا
دوور علي اعلانات في مواقع بيع المستعمل زي مصراوي وكونتاكت كارز هتلاقي في كتير كاتبين انهم من اسكندرية او اسئل اي حد من معارفك ع تجار عربيات في اسكندرية بس الاول تبقي محدد هتدفع كام بالظبط وسائل كويس فلوسك دي تجيب موديل اية وحالة عربية اية عشان متبقاش فارقة معاك بقي بعد كدة تجيب من معرض ولا تجيب من النت انت عندك رينج سعر معين للموديل المعين لو لقيتها بالسعر دة فئي حتة وبالحالة اللي انت عايزها يبقي كدة متضحكش عليك
شكرا لردك يا باشا بس هو 25000 يجيبوا اونو 93 او 94 حالتها كويسة ولا لاة ....؟؟