عرفت انه العوامة كلها بمتوسط 90 تقريبا او حاجة كدا وغالبا اقل من كدا
منين بقة معرفش بصراحة بس اكيد هتلاقيها فى التوفيقية
عرض للطباعة
بالنسبة لتكلفة العتب والفوجات : العتب ماتكلفش أكتر من 500 جنيه طبعاً بالمصنعيات والشاي والقهوة واللطعة عند بتاع العتب يومين بحالهم يمكن أكتر ولكن النتيجة تستحق , بالنسبة للفوجات عادي متكلفتش أكتر من 80 جنيه فوجات لونها أبيض تلجي مدي على أزرق قريب من لون الزينون بس مش زينون ولو أتركب زينون هيبقى أحسن وأشيك .
بالنسبة للدهان انا كان عندي خبطة في الرفرف وشوية خرابيش مصرية أصيلة على كام لوحة فنية مسمارية فقولت أخد العربية كلها بوية فرن وقد كان والنتيجة في منتهى الجمال والعربية لونها بقى أحسن من اللون الأصلي اللي طبعاً أجرب وبقى أي كلام والتكلفة مش فاكر بالظبط ولكن هحاول أفتكر وأقولك لأن كان من 5 سنين ولكن التكلفة مش كبيرة .
بالنسبة للرسمة اللي على الباب أنا قولت أن اللون كله كان موحد أسود وبس بودي وعتب ومرايات وزجاج وفرش داخلي لكن لو عاوز أي رسمة تتخيلها في حياتك ممكن تعملها ببساطة هتروح لبتاع كماليات كويس وهتلاقي عنده كمبيوتر وفيه رسمات جاهزة أو ممكن لو لقيت أي صورة على النت وماكنتش عنده خده اللينك بتاعها وأديها له وقوله عاوزها أزاي وفين كل دة أنا عملته في الأول كنت حاطط علامة تريبل أكس على كل الزجاج الخلفي (زجاج الشنطة) ومكنتش عنده وجبتهالو وهو ظبطها من عندها ووداها الورشه وعملها باللون اللي أنا عاوزة بس كان حراق شوية وأتكلفت الرسمة الواحد حوالي 100 جنيه بس شغل 10 على 10 فحكاية الرسومات والأستيكرات دي بسيطة جداً ولكن المشكلة في المرور أن أي ظابط هيشوفك هيعمل معاك الصح على طول يعني سحب رخص ولو أتكرر أكتر من مرتين هيكتبلك على الرخصة (ودي حركة غلاسة) وطبعاً الفيميه نفس الحكاية ولكن تتغلب على الحكاية دي أزاي بطريقتين أول واحدة أنك تمشي وأنت عينك في راسك في وسط البلد ولما تتطرف أمشي براحتك والثانية أنك تكون عارف مكان الكمائن أو مكان الظباط اللي دايماً بيقفوا فيه طبعاً في أسكندرية أنا كنت حافظ كل الأماكن دي زي كف أيدي وبتحاشاهم قدر الأمكان وبمشي في طرق بديلة ألا في حالة الردارات لأن طبعاً ولاد اللذين بيقفوا في حتت صعب أن مكانش مستحيل تجيبهم وأكيد الواحد بيبقى معدي السرعة القانونية وطبعاً كانت معظم خروجاتي ليلاً زي الخفافيش ههههههه وطبعاً أساسي تكون عارف حد يجيبلك الرخصة لما تتسحب وممكن يجيبهالك في يومها لو تحب وكله بتمنه .
أتمنى أكون رديت عليك بشكل وافي .
رد كافى جدا وتسلم مليون مرة على كلامك دا وشرحك بالتفصيل دا
وياريت تفتكرلى سعر الدهان لانه اول حاجة هعمله مع الفوجات ان شاء الله
متعرفش بقة (هكمل الرخامه بقة) التابلوه لو عايز اغيره واجيب عدادات التربو هيتكلف كام وهيعمل مشاكل ولا لا؟ عشان التربو شكلة وهمى اصلا
عاوز أقولك أنك لو فكرت تغير تابلوة وتلعب في الماتور مع التعديل الخارجي الميزانية هتفتح معاك وبصراحة أنا شايف أن مالهاش لازمة تابلوه الأونو حلاوته في بساطته والتعديلات اللي كنت عاملها عندي أتكلفت 12 ألف جنيه ( جنوط - عتب - دهان - سبويلر - فرش - ساوند سيستم - كاوتش جديد أعرض من الأصلي بريدجستون - فوجات - فوانيس جانبية وفوجات - ديفيل ) الجنوط والسبويلر والديفل بس عملوا معايا 7 ألاف جنيه فخد بالك من ميزانيتك وألتزم بيها عشان متخرمش منك .
حاجة مهمة كمان لازم تاخد بالك منها وهي أن اللي هتدفعة في التعديلات دلوقتي مش هتلم ربعه لما تيجي تبيعها فبلاش تصرف جامد لأن أنا أتلسعت في الحكاية دي وأسهل حاجة هيقولهالك المشتري شيل الحاجات دي أنا مش عاوزها لأن مش غالبية الناس شباب وبيحبوا التعديلات .
انت هتغير التابلوة بالكامل ولة طقم العدادات
طيب انت نزلت الحرفييين وشوفت ولة لسة
لا بس انزل وشوف الى انت عاوز الاول ولو عايز نرتب وننزل سواء قولى