السلام عليكم و رحمة الله
مساء الخير على أحلى منتدى
دي شويت حاجات استخلصتهالكوم من مجموعة تجارب عملتها في عربيتي و ممكن تعملوها في عربياتكم وأرجو أن تنال إعجابكم....
أولا: و أهم حاجة الجنوط و الكاوتش
لازم تركب جنوط 14 تكون جديدة و شكلها حلو و طقم كاوتش عريض مقاس 195/50/14 وصدقني أهم حاجة و أول حاجة لازم تتعدل في العربية هي الجنوط و الكاوتش عشان بيدو العربية شكل ومنظر رياضي وطبعا ثبات و أمان مع المشي
ثانيا: الديفل
أنا عن نفسي من هواة صوت العربية الرياضية فلو كنت زيي أنصحك تركب ديفل يكون شكلو حلو وصوتو حلو ومعقول لا عالي أوي ولا واطي و أنصحك كمان لو هتركبو يكون ديفل بروحين يعني ليه فتحتين...شكلو فالأونو ملوش حل.. أنا عندي زيو و هبقى أبعتلكو صورة ليه
ثالثا: فلتر هواء رياضي
ودا فوائده هي : بيخلي سحب العربية أقوى و أسرع - بيدي صوت زأير للمحرك زي العربيات الرياضية السريعة الفخمة - بيريح موتور العربية عشان بيدخل كمية هواء كبيرة و نظيفة بدل العمة اللي بتبقى كاتمة الموتور.
رابعا:فاميه على كامل العربية أو زي ما تحب ممكن النص الورراني بس عشان اللجان انا عن نفسي مفيمها كلها و عامل عالزجاج القدماني حتة فوق كده اسمها شماسة...و انصحك لما تيجي تفيم ركب فاميه درجته اسمها هاف دارك half dark ده أحسن حاجة.
خامسا: كاست بايونير أو كيينوود و سماعتين بايونير أو أربعة زي ما تحب و بازوكا إكسبلوود و جي إم كيينوود أوعى تجيبو ماركة سيمفوني.
سادسا: ممكن بقى تعدل حاجات فالبودي الخارجي...مثلا:
-بوسترات عالعربية زي ما تحب (كلمات و عبارات و ماركات عالمية)
ممكن تعمل خطين على طول العربية مالأول للأخر (أنا عامل كدا) و راعي توافق لون الخطين مع لون عربيتك يعني انا مثلا عربيتي حمرا عاملهم اسود
-ممكن تركب طقم جرايت لون اسود عالأبواب و الرفارف
-ممكن تبدل لمبة النمرة اللي ورا اللي نورها اصفر بلمبة نورها أبيض دي هتبقى اشيك و سبور اكتر طبعا
-ممكن تعمل رقم عالأبواب مثلا 0 1 أو 1 1 أو ممكن رسمة جاهزة بتبقى من أول العربية لأخرها و موجودة عند بتوع الزينة
-لو المرايات عندك لونهم أسود فكهم و رشهم بنفس لون العربية...لو لاحظت كل العربيات الحديثة بتبقى مراياتها نفس لون العربية.
-لو الإكصدامات اللي ورا واللي قدام لونهم أسود رشم بردو بلون العربية بس خللي بالك ما ترشمهمش كلهم رش الحتة اللي تحت بس و انا هبقى ابعتلكو صورة ليهم عشان تعرفو قصدي ايه
-غير نور الكشافات الأصفر العادي بلمبات زينون لونهم أبيض ولو عندك فوجات أعملهم كمان زينون أبيض
-غير طارة الدركسيون الأصلية بواحدة أصغر رياضية وراعي يكون لونها نفس لون العربية
-فيم الفوانيس الخلفية
سابعا: ممكن توطي العربية شوية عالأرض عن طريق قص حلقة أو نصف حلقة من سوست المساعدين اللي ورا واللي قدام عند اي عفشجي و دا بيدي ثبات للعربية جامد جدا مع السرعة و مع الملفات على سرعة عالية يعني العربية عمرها ما تعوم منك و لا تتزحلق ابدا.
أتمنى أن تنال إعجابكم...و شكرا
أخوكم كريم.
المفضلات