كيفية التفريق بين دهان المصنع و الرش

**mtageldeen** · 17-02-2009 02:21 PM

المشاركة الأصلية كتبت بواسطة azamell

طب سؤال ياجماعة لو العربية رشه نضافة هل ده يقلل من قيمتها - اصل انا بصراحة ماقتنعش بوجهة النظر اللي تقولك انا امشي بعربيتي معفنة عشان لما ابيعها تبقى بدهان الفبريكة
انا شايف اني ادهنها بس ابقى مرتاح للعربية ولما يجي ميعاد بيعها يبقى هي وظروفها بئا

أولا: المقبول هو رش الخوارج فقط ولكن رش الدواخل فهذا موضوع تاني وإنعكاساته سيئة علي المشتري لهذه السيارة.

ثانياً: المتحكم في الأمر الموديل
يعني عربية موديل الثمانينات هتكون راشة خوارج بنسبة 99.999%

أنا لي صديق عربيته بيجو 304 فابريكا خوارج عدا أجزاء بسيطة وموديل 73 ومحدش يستغرب.

المهم لو العربية موديل فوق 2005 وراشة خوارج بالكامل سنجد أن سائق هذه السيارة كان بيسلم بيها علي كل عمود أو رصيف يعدي عليه

وطبعاً لو راشة نضافة لن تجد شغل سمكرة في السيارة.

وفي النهاية لو مش ناوي تبيع العربية وعايز تركبها مدة طويلة يبقي تعمل اللي يريحك في مظهرها بغض النظر عن السوق ومعاييره.

**agentmastermind** · 17-02-2009 02:27 PM

Nokia 6500 classic 3D view - 360° spin

**karimone** · 17-02-2009 02:49 PM

المشاركة الأصلية كتبت بواسطة agentmastermind

Nokia 6500 classic 3D view - 360° spin

..........!!!!!!!!!

**kh_talaat** · 17-02-2009 03:08 PM

في جهاز صغير كدة قد الولاعه بيبقى موجود مع الصنايعي اللي بيكشف على العربيات في محطة البنزينه بيحطه على جسم العربية وبيبقى في الجهاز لمبه صغيره لو نورت اخضر يبقى الجزء دة فبريكه ولو نورت اصفر تبقى مش فابريقه ولو نورت احمر تبقى واخده معجون كتير وهكذا

**ahmedsrs** · 17-02-2009 06:50 PM

احب اضيف برده نقطة هامة بص على الصواميل الى ماسكة الرفارف والأبواب لو اتحلت قبل كدة لغرض الرش هتلاقى اثار احتكاك نتيجة الفك والتركيب وطبعا ده مش موجود فى العربية الفابريكة لأن العربية بتترش بعد متتركب . الجريد الجانبى بتاع الأبواب هو الأصلى ولا الأصلى بس مش ماسك كويس . الحوض بص على الفوانيس لو فانوس جديد او نضيف وواحد متسخ او قديم يبقى الفانوس اتغير نتيجة خبطة
هل فى كسر او شرخ فى البلاستيكات الى جوة الكابوت يبقى فى مشكلة فى الحوض وترش . بص على العضم بتاع الكابوت من جوه ملزوق بسليكون وفى اجزاء فاكة يبقى فيه مشكلة غير حاجات تانية مش فاكرها دلوقتى

**bee** · 17-02-2009 07:01 PM

على فكره انا شفت بوهيجي اخد عربية مخبوطة دواخل في قوايم وسمكرتها زبالة ومع ذلك انا شفتها بعد ما اترشت مصدقتش حتى الزنب عاملها صح كله بيتعمل .. ومش بيكشفها غير الصنايعي الي زيه .. لو عايز يخدمك ..

بصرف النظر من بره
لو العربية دقت فيها اوى ومفيش فروقات ولا قادر تحدد اللون فابريكه او لأ .. توكل على الله لانها حتى لو مرشوشة مرشوشة بنظافه جداااااا وانا مش مع الحفاظ على دهان المصنع عشان الي يشتري مني يرش انا اتمتع بعربيتي على قد ما اقدر ..

تحياتي :k8:

**ahmedsameir** · 06-03-2009 11:35 PM

بص انا عندى ليك نصيحه
اولا لمعرفة العربية راشه من بره والا لا هتخبط بظهر ايديك على العرية ( بظروافرك ) و تمشى بايديك كده تخبط هتسمع صوت تخين و صوت صاج
الصوت التخين معناه ان هنا فى معجون يعنى العربية راشه
الصوت التانى هو صوت الصاج يعنى مفيش معجون هنا
و جرب و ايديعيلى

**magyver** · 07-03-2009 03:24 AM

المشاركة الأصلية كتبت بواسطة ahmedsameir

بص انا عندى ليك نصيحه
اولا لمعرفة العربية راشه من بره والا لا هتخبط بظهر ايديك على العرية ( بظروافرك ) و تمشى بايديك كده تخبط هتسمع صوت تخين و صوت صاج
الصوت التخين معناه ان هنا فى معجون يعنى العربية راشه
الصوت التانى هو صوت الصاج يعنى مفيش معجون هنا
و جرب و ايديعيلى

دة نفس الطريقة اللي بعملها

**amr_elrashidy** · 07-03-2009 04:41 PM

المشاركة الأصلية كتبت بواسطة ahmedsameir

بص انا عندى ليك نصيحه
اولا لمعرفة العربية راشه من بره والا لا هتخبط بظهر ايديك على العرية ( بظروافرك ) و تمشى بايديك كده تخبط هتسمع صوت تخين و صوت صاج
الصوت التخين معناه ان هنا فى معجون يعنى العربية راشه
الصوت التانى هو صوت الصاج يعنى مفيش معجون هنا
و جرب و ايديعيلى

حتى القصة دى مش حتقدر تتأكد منها ايه اللى فابريقة و ايه اللى مش....العربية لو اتحرقت البوية القديمة و اتجلخت و اتصنفرت صح و خدت برايمر صح و اترشت نضيف جدا جدا حتسمع نفس صوت الفابريقة و لا يمكن حتقدر تفرقه و الكلام ده عن تجربه

**أشرف العدوي** · 07-03-2009 04:49 PM

بصرف النظر من بره
لو العربية دقت فيها اوى ومفيش فروقات ولا قادر تحدد اللون فابريكه او لأ .. توكل على الله لانها حتى لو مرشوشة مرشوشة بنظافه جداااااا وانا مش مع الحفاظ على دهان المصنع عشان الي يشتري مني يرش انا اتمتع بعربيتي على قد ما اقدر ..

أنا مع الرأي ده
يعني امشي بعربية دهانها مبهدل علشان اسمه دهان الفابريكة
مش منطق خالص
انا شايف ان ده لا يعيب العربية على الاطلاق و الافتكاسة دي اخترعوها التجار علشان ينزلوا من سعر العربية على الفاضي لو ما فيهاش عيوب
انا شايف ان الي يعيب العربية الدواخل فقط
و حالة الصالون اكتر حاجة بتبين إذا كانت العربية متهانة و لا لاء
لكن لو عربية نظيفة و مخبوطة من برة ده ما يعيبهاش اطلاقاً