رابطة ومالكي عشاق الفيات 132

**MohaMed_Refaat** · 17-03-2009 06:44 AM

اية يا شباب فية اية بس اية الجو اللى اتكهرب دة
مش علشان اختلاف وجهات النظر ندمر الود اللى بينا فى الرابطة
كل واحد حر فى راية يا KoKiReever باشا مش علشان الراجل Drift_Lover باشا قال راية وانت اختلفت معاةقوم تهاجمة شخصيا
المفروض الاختلاف يكون فى سياق موضوع المناقشة فقط ولا يتعدى ذللك الى شخصية العضو وممتلكاتة الخاصة بس حصل خير وكلنا اخوات وربنا ميجيبش بينا زعل .

عموما حصل خير يا رجالة احنا كلنا اخوات وانا متاكد ان العضو KoKiReever مكنش يقصد بس هو كان عايز يوصل فكرتة بس جت معاة بطريقة مخدمتوش شوية وكلنا اخوات لازم نستحمل ونسامح بعض ..

Drift_Lover باشا عندى دية ياباشا وانا اسف بالنيابة عن كل الاعضاء وعايزين نشوف ردودك علطول فى الرابطة وفى كل حتة والا حبيع ال132واجيب دايو واجيللك منتدى الدايو وازهقك :) :) :)

**S.Hasan** · 17-03-2009 03:47 PM

هي نسبة انضغاط المحرك لل 32 كام ؟؟؟

**MohaMed_Refaat** · 17-03-2009 06:15 PM

نسبة الانظغاط لل 132 فى الموتور ال 2000 سىسى هية
8:10

**KoKiReever** · 17-03-2009 06:26 PM

انا مشكر ليك يا mooody2007 لأنك اللى وقفت معايا ووالله هو ده اللى كان قصدى عشان انا بس غيووووور على 132 مش على اى حد بس ومعنديش عربية اعتز بيها غيرها ...............................وانا استفدت من مواضيع Drift _Lover كتيير ولو خانى التعبير فأنا اعتذرت وأتأسفت وياريت نبقى كلنا كدا زيك فى الخبرة والحب عشان احنا اتجمعنا على عربية واحدة

Fiat 132

Thankssssssssssssssss
واسف على الأنقطاع والتأخير فى الرد لظروف العمل ...
Fiat 132 Forever :k4:

**S.Hasan** · 18-03-2009 11:56 AM

المشاركة الأصلية كتبت بواسطة mooody2007

نسبة الانظغاط لل 132 فى الموتور ال 2000 سىسى هية
8:10

شكر ا ياباشا انا قريت موضوع كده عن نسبة انضغاط وعلاقته بنوع البنزين فانا عاوزكم تقولولي رايكم علما بان عربيتي 1600 سي سي :
أنواع البنزين المستخدم في السيارات والرقم الأكتاني وعلاقته بنسبة إنضغاط المحرك = Gasoline Octane number And Engine compression ratio

الحقيقة أن موضوع نوع البنزين والرقم الأكتيني أو الأوكتاني للبنزين ومدى ملائمة النوع للمحرك
وهو يعتمد على خاصية في المحرك تسمى بنسبة الإنضغاط وهي تقريباً من 7 إلى 12 في السيارات البنزين عموماً

تعريف نسبة الانضغاط:
نسبة الإنضغاط هي حاصل قسمة حجم الإسطوانة بالكامل (الحجم المحصور بين الحد السفلى الذي يصل له المكبس وحافة غطاء الاسطوانة(رأس السلندر)) مقسوماً على حجم غرفة الإحتراق (المحصورة بين آخر نقطة يصل إليها المكبس وحافة غطاء الاسطوانة (رأس السلندر))

نسبة الإنضغاط = حجم الإسطوانة / حجم غرفة الإحتراق
= تتراوح بين 7 إلى 12 وقد يصل إلى 15 في بعض محركات سيارات السباق ولكن على حساب عمر المحرك الذي يقصر بشدة في هذه الحالة

وكلما زادت نسبة إنضغاط المحرك كلما أصبح المحرك متأقلم مع نوع بنزين أعلى في رقم الأوكتان

وهذه بعض النسب التقريبية لكل محرك ونوع البنزين المناسب له:

بنزين 80 لمحرك ذو نسبة إنضغاط 8
بنزين 90 لمحرك ذو نسبة إنضغاط 9
بنزين 92 لمحرك ذو نسبة إنضغاط 10
بنزين95لمحرك ذو نسبة إنضغاط 11

ملاحظة: ليس بالضرورة وجود كل الأنواع السابقة في بلدك ولكن قد يوجد نوعين أو ثلاثة ولكني ذكرتها كلها للتوضيح

لو أن نسبة الإنضغاط منخفضة مثل أغلب السيارات القديمة قبل موديل 1989 (ليس كلها) وبعض السيارات الحديثة ذات المحركات قديمة التصميم مثل اللادا 2107 وأمثالها فعليك أن تمونها وتعبي التانك بأقل نوع بنزين موجود وأنت مطمئن أنها ستعطي آخر قدرة لها بدون مشاكل مع ضبط توقيت الشرارة لتلافي التصفيق
بمعني أن السيارة اللادا مثلاً موتورها قديم وبالتالي نسبة إنضغاطه منخفضه إذن الأفضل أن تضع له بنزين ذو أقل رقم أوكتاني يعني 80 إن وجد أو أقل نوع بنزين متواجد في بلدك
ولو وضعت بنزين برقم أوكتيني أعلى منه تصبح كأنك ترمي فلوسك في الهواء بدون مبالغة

لو نسبة الإنضغاط عالية مثل المواتير الحديثة عموما وهذا يكون موضح في الكاتلوج وأعلى نسب إنضغاط تكون في السيارات الغالية مثل المرسيدس والبي إم والسيارات الرياضية أيضاً أو كل سيارة من مستواهم في هندسة المحركات الحديثة

ولو لم يحدد في الكتالوج الخاص بتلك النوعية من السيارات المتقدمة ذات نسب الإنضغاط المرتفعة نوع البنزين الموصى به (إحتمال ضعيف)
فعلينا أن نبحث بالكتالوج عن نسبة إنضغاط المحرك
ومن النسب التى وضعتها بالأعلى نختار نوع البنزين
أو نسأل التوكيل
أو نبحث عن موقع السيارة على شبكة المعلومات الدولية وننظر ما هو نوع البنزين المناسب للمحرك
وهناك مواقع على الإنترنت بها تفاصيل نسبة إنضغاط المحرك لعدد هائل من السيارات ومنها الموقع التالي:
http://www.carfolio.com/specifications/
ومن الطبيعي أن نضع في تلك السيارات الحديثة ذات المحركات المتطورة رقم بنزين عالي لأن محركات هذه السيارات متقدمة ونسبة انضغاطها عالية ومصممه للبنزين ال 95 مثلا أو 92 على الأقل لكن لو وضعنا بها بنزين 80 أو 90 مثلاً وإسترخصنا فكأننا نقوم بتدمير المحرك بدون مبالغة ولكن على المدى الطويل (ليس تدمير فوري)

أما لو كانت سيارة موديل قديم أو سيارة جديدة لكنها مركب بها موتور تصميم لم يتغير منذ زمن مثل اللادا 2107 وأمثالهم في هذه الحالة نضع بنزين 80 ولو لم نجد 80 نضع 90 ولا تزيد عن ذلك حتى لا تكون مبدد للمال بدون فائدة

السؤال الأول: ماذا يحدث لو وضعت بنزين ذو رقم أوكتاني أقل من الموصى به لسيارتي أو أقل من المناسب لنسبة إنضغاط محرك سيارتي ؟؟
الجواب : يحدث الآتي:
1- لا تحصل على العزم وعدد الأحصنة المبين في الكتالوج بل أقل منه

2- صوت المحرك يرتفع ومن الممكن أن لا تحس بالفرق بنفسك لكن صوت المحرك سيرتفع بالتأكيد ولو بنسبة ضئيلة

3- قد يحدث في المحرك ظاهرة التصفيق (الصفع) (Detonation) والميكانيكي يقولك الموتور يصفق وهذا صوت مثل الصوت الذي تسمعه لو أنك ماشي على الرابع على سرعة 20 كلم/ساعة وفجأة دعست بنزين بقوة تسمع صوت تكتكه هذا هو التصفيق الذي يزيد عندك

وهذا التصفيق ليس صوت تصادمات كما يبدو ولكنه صوت اهتزاز وتذبذب شديد للمحرك وخاصة عمود الكرنك والمكابس وقد يصل في بعض الأحيان إلى كسر عمود الكرنك عمود المرفق (حالة نادرة)

4- التصفيق الكتير يقصر عمر المحرك على المدى الطويل ويأثر بالسلب على البلوف والأويل سيلات (الحوابك والسدادات)

5- زيادة في إستهلاك البنزين لأن التصفيق والموجات الناتجة تزيد من فواقد القدرة داخل المحرك

السؤال الثاني: ماذا يحدث لو وضعت بنزين ذو رقم أوكتاني أعلى من الموصى به لسيارتي أو أعلى من المناسب لنسبة إنضغاط محرك سيارتي ؟؟
الجواب:
أما في حالة أن تضع بنزين أعلى من الموصى به:
قد يكون السيارة موصى لها بنزين 92 ولكن عندما تضع بنزين 95 أو 98 فإن السيارة تعطيك أداء أفضل
وفي هذه الحالة فإن جيبك هو الذي سيحكم لأن بنزين ال 95 سيعطيك إحساس قوي بفلوس كثير والبنزين ال 92 سيعطيك القدرة القياسية من المحرك وسيوفر لك فلوسك بدون ضرر نهائي على المحرك
في هذه الحالة لك مطلق الحرية

ولكن لو وضعت بنزين 95 ولم تحس بفرق فاتركه فوراً وارجع لبنزين 92 الموصى به لسيارتك

أخيراً هناك معلومات أو إشاعات خاطئة:
الإشاعة الأولى:
أن البنزين منخفض الأوكتان مثل بنزين 80 أو 90 مضر بالبيئة أكثر من البنزين ال 95 أو البنزين ال 98 وهذا كلام لا أساس له من الصحة
لأن البنزين كله حاليا خالي من الرصاص ومركباته واحدة مع اختلاف نسب المركبات في كل نوع

والإشاعة الثانية:
يقول لك البنزين ال 95 أنظف من البنزين ال 90 ولا يحتوي على شوائب تقوم بسد الفلاتر وغيره !!
والحقيقة أن مسألة النظافة تتعلق بنظافة خزانات المحطة وليس لها علاقة بنوع البنزين سواء بنزين 80 أو بنزين 98

الإشاعة الثالثة:
أن البنزين منخفض الأوكتان مركباته ومكوناته تسبب ضرراً شديداً للرشاشات في حالة السيارات ذات الحقن الإلكتروني أو يضر الصمامات (البلوف) أو أي أجزاء أخرى للمحرك
وهذا أيضاً كلام خاطيء
بنزين 80 مثل بنزين 98 في تأثيره على أجزاء السيارة
لكن كما قلنا أعلاه أنه في حال إستخدام بنزين ذو رقم أوكتاني أقل من الموصى به من الصانع فإنه قد يحدث تصفيق (صفع)
وهنا التصفيق هو الذي يضر المحرك ضرراً بالغاً كما قلنا
(منقول )

**Drift_Lover** · 18-03-2009 02:41 PM

يا جماعه خلاص والله ما حصلش حاجه...
وزي ما مودي قال... احنا كلنا في الاول والاخر اخوات.
وخلاص يا KoKiReever اعتبر ماحصلش حاجه... وانا عارف انك اكيد ماكنتش تقصد.

بس والله يا جماعه انا كنت باقول نصيحة ال80 دي لوجه الله.
و moha_2k قال اللي فيه الخلاصه.

الموضوع يا جماعه مش استخسار والله... بس كل حاجه ليها حاجه.
وخصوصآ بعد ما الدولة وجبت معانا ورفعت البنزين ال90 علشان يبقي ضعف ال80

وحنقارن بين كذا نقطه للي عاوز يعرف الفرق فعلآ... وده عن تجربة :

1- التوفير ماديآ : طبعآ بنزين 80 بيوفر 50 % .
2- سحب العربيه : بيتحسن بنسبة 15 % مع بنزين 90 .
3- التجميع مع الغيارات : أسرع مع البنزين ال90 بنسبة 5% : 10%.
4- الرصاص وتلوث البيئة : البنزين اللي في مصر كله خالي من الرصاص.
5- نسبة الشوائب : بترجع للشوائب اللي في الخزانات اللي في البنزينة. وبالتالي الشوائب في ال80 هي نفس الشوائب اللي في ال90 ... ولا يوصي نهائي انك تمون من بنزينه بعد ما شاحنة البنزين تفرغ حمولتها في التنك. لان ده بيحرك الرواسب اللي في قاع تانك البنزينة. ويزود نسبة الشوائب اللي في البنزين.
6- نسبة انضغاط المحرك : تتراوح بين 7 الي 17 وليس 15 في سيارات السباق وجميع المحركات ال 1كامه ماقبل سنة ال 2000 نسبة انضغاطها من 7 الي 8 .
اما المحركات ال 2 كام ماقبل سنة 1994 فنسبة انضغاطها ما بين 7 الي 8
ومع نسب الانضغاط الاقل من 9 يوصي باستخدام بنزين 80
بالتالي في ال 132 يوصي باستخدام بنزين 80
http://www.nilemotors.net/Nile/showt...E4%D6%DB%C7%D8

7- لون رواسب البنزين : في ال80 أحمر وفي ال90 اخضر وده لو انت عاوز تتأكد من العربيه كانت ماشيه علي 80 ولا 90 (وكلامي طبعآ علي ال 132 ) حتفك عمة الهوا وتفك وش الكربراتير وتبص حوالين الفواني. لو لاقيت لون احمر يبقي صاحبها كان شغال علي بنزين 80 ولو اخضر يبقي كان شغال علي 90 .
8- التوفير في الاستهلاك : ال80 أوفر لان سرعة احتراق ال 90 اعلي من سرعة احتراق ال 80 ... فبالتالي لو انت وقفت بالعربيه في اشاره مثلآ وسايب الموتور شغال لمدة 10 دقائق. لو حتستهلك من ال 80 1 لتر يبقي حتستهلك قصادها من ال 90 1.2 لتر.

**Drift_Lover** · 18-03-2009 03:17 PM

وحاقولكم انا بقي عن تجربتي الشخصية :

انا عمرت العربيه ( الفيات ال 132 ) 3 مرات. منهم مرتين طقم سبيكه وخرطة كرانك (1/2 عمرة ) ومرة عامره كامله.

وفي العمره الكامله ماعرفتش اظبط الماكينة لمدة اسبوع الا لما مونت 90 لان البنزينة اللي في منطقتنا كان بنزينها مغشوش وماعرفتش ده الا متأخر. وفضلت ماشي علي 90 اسبوع وحاسس بفرق شاسع وقلت انا كده جبت من الاخر.. عمرة وبنزين 90 مافيش نزاهه أكتر من كده... وفعلآ كنت مبسوط من أداء العربيه.
لحد في يوم كنت جاي من بورسعيد وعلي طريق بورسعيد دمياط فضلت قارص لمدة ربع ساعه 140 : 150 كم/س ولاحظت حاجه غريبة...
طبعآ الطريق مفتوح بس بيصادفك عربيتين قدامك قافلين الطريق فبتهدي وتدي نور وكلاكسات علشان حد فيهم يوسع لك... المهم الموضوع ده حصل 3 مرات مثلآ...
كنت بالاحظ لما انزل بالسرعة ل 90 وبعدين اجي ازود الاقي العربيه بتتخنق وفي نتشة في العربيه. ولما اوصل 140 150 الافي العربيه تمام. لحد ما اشيل رجلي من علي الاكسراتير واجي اهدي وبعدين ازود الاقيها تنتش.
وفجأه العربيه بطلت. اديت اشارة وركنت يمين بالراح لان طبعآ الفرامل حجرت تحت رجلي... المهم دورت وجيت اطلع الاقي العربيه بتبطل.. قلت سايسها لحد ما توصل دمياط.... بس للاسف بطلت وحلفت ماهي دايرة. قلت خلاص اكيد الموبينه قطعت.
طلعت العده وفتحت الكبوت وشيكت علي الكهرباء ( البوجيهات والموبينة... كله تمام ومخرج كهرباء...) وانا متأكد ان العربيه مامسكتش حرارة... وماكنش في صوت غريب في الماكينة...
المهم بعد 1/2 ساعه عطلة فكيت العمه ووش الكربراتير وطلعت الفواني لاقيت الفونيتين مسدودين..
واحده فيها وسخ والتانية فيها حتة قطن... واللي كان مجنني ازاي ده عدا من الفلتر... وبعدين ده بنزين 90 يا بشر...

المهم نظفت الفواني وقفلت... ودارت العربيه والحمد لله كله بقي تمام...
بس طبعآ اول ما رجعت.
غيرت فلتر البنزين. وفلتر الهوا.
وقمت مغير طقم بوجيهات Ngk لاني ماكنتش غيرتهم مع العمرة.. (ماكانوش مرطبين ).
ودخلت علي النت اشوف انسب بنزين لل 132 بالنسبة لانضغاط المحرك... لاقيت الكل بيوصي ب بنزين 80 .
رجعت للبنزين ال80 بس كنت دايمآ بابقي حريص علي البنزينة اللي بامون منها.

والحمد لله العربيه فضل مظبوطه لحد ما عز عليا فراقها.

**Drift_Lover** · 18-03-2009 03:56 PM

برده من المفارقات اللذيذة اللي حصلت لي مع معشوقتي ال 132
....

كنت عامل شوية شغل في العافشة وحسيت بفرق كبير في نعومة العربيه واداء الفتيس والفرامل وخلافة...
وطبعآ بعد اي شغل في العربيه لازم اجربها يومين تلاته قبل ما اسافر بيها.
وكانت ليلة خميس واتفقت مع الرجاله نروح نقي يومين في اسكندرية. وانا واثق طبعآ ان العربيه فوق ال Ok بشوية...
المهم سافرنا الخميس وقضينا هناك ليلة الخمس ويوم الجمعه ورجعنا فجر السبت...
وانا خارج من اسكندرية كان الشباب هالكانين من التعب وكله شادد نوم...
وكان المفروض اروح القاهرة يوم الاحد... قلت ياد شد علي الصحرواي ازل القاهرة خلص مشوارك بالمرة... وفي مخرج الاسكندرية قمت داخل صحراوي بدل الزراعي. وكانت اول مرة امشي علي مصر اسكندريه الصحراوي.

المهم الرجاله سخنتني علي الطريق. انا ماشي 90 : 100 الطريق اول مرة امشي عليه... والاقي كل شوية زوووو من اليمين وزوووو من الشمال والرجالة ماشية 150 160 فيما فوق.

قلت اشبط ورا اي عربيه منهم وسيب بينك وبينه مسافه علشان لو أكل مطب تلحق نفسك واكشفت فيما بعد ان الصحراوي مافيهوش مطبات.. ههههه.
والحمد لله كله تمام وانا ماشي 150 160 ومبسوط اوي بالتموجات اللي في الطريق (نازل وطالع مع المساعدين واليايات محسساك انك بتتمرجح ههههههه )
وكان باقي في التنك بتاع 15 لتر... قلت ادخل بنزينة افول.

هديت واديت اشاره يمين ولسه داخل علي البنزينة لاقيت العربيه بطلت. قفلت الكاسيت... ودورت دارت... وبادي غيار مش عاوز تاخد الاول... اديتها التاني ولاقيت العربية طالعه بتنتش وعصاية الفتيس بترج في بعضها.
المهم فولت... ونزلت ابص تحت العربيه لاقيت قنطرة الفتيس فاكك من ناحية وماسك من ناحية...
المفروض انها بتكون مربوط في الشاسيه بمسمارين 13 .
ملاقيتش المسمارين دول ولاقيت القنطرة كانت ملحوم من الناحيتين في الشاسيه ناحيه فكت والتانيه ماسكه...
(الله يسامحه الميكانيكي. كنت رحت مشوار وسبته يقفل.. فلاقي المسمار ناحية اليمين مفوت. قام زاقق العربيه للحداد اللي جنبه وقام لاحم القنطره )

المهم زقينا العربيه علي المجرا اللي جوا المشحمه اللي في البنزينه. وصحيت الرجاله وجيبت كشاف من عامل المشحمه ونزلت تحت... جبت مسمار 13 وجيت اربط... بيفوت.
قمت جايب مسمار 13 سن تخين (خشن) واطول من التاني شوية. ولافف عليه خيط وقمت رابط.. ربط تمام. بس ماحرقتش عليه جامد.
طبعآ طلعنا من تحت كلنا شحم وهباب. وكان منظرنا زباله. واديت الواد بتاع البنزينه 5 جنيه.
وطلعنا بالعربيه الحمد لله تمام... بس كان باقي حوالي 80 ك علي القاهرة اخدتهم علي الثالث 30 : 50 كيلو وانا مرعوب للمسامار يفك وتبقي حوسه.
ماتجرأتش الا علي مدخل المنصورة...

وكان يوم مايتنساش من العمر.
...

كله كوم بقي ويوم ما العربيه قرصت عليها وجابت سبيكه ده كوم تاني.
كنت قارص 180 ل 185 كم/س
وفجأه سمعت صوت غريب في الماكينة ولما وقفت لاقيت خبط ... وعرفت ان العربيه جابت سبيكه (لقمة سبيكه اتسدت او لفت علي الكرنك )
وكنت لسه داخل علي بنها راجع المنصورة...
وكان قدامي حل من 2 يا اما العربيه تتشد او تتحمل لحد البلد.
تتشد ( العربيه حتتفسخ من بعضها ... عندي اغير ماكينة ولا اشدها )
تتحمل (الساعة كانت 3 الفجر ) ومين حييجي لي دلوقتي )

المهم اخدناها من بنها للمنصورة في 8 ساعات وانا ماشي بحد اقصي 30 كيلو.
وكانت ليلة...

**Drift_Lover** · 18-03-2009 07:58 PM

شوفوا ال 132 لما تترسم صح... بس خللوا بالكم التفييم دلوقتي مشكلة علشان قانون المرور الجديد.

دي صورة قبل التعديل:

ودي صورة بعد التعديل :

**Drift_Lover** · 18-03-2009 08:09 PM

ودي صور عربية من الاسكندرية بيتهيأ لي أغلبكم عارفها...
الشغل اللي فيها من بره بسيط بس نظيف جدآ... و معمول فيها شغل في العافشة والماكينة... كله SPORTEC بس طبعآ ولا أحلي من كده.

التعديلات الخارجية :
طبعآ جنوط + كاوتش 17 سرعات.
شبكة امامية BMW.
فتحة السقف.
المرايات الجانبية.
المرايا اللي قدام تحت الاكصدام مشغوله فيبر.
تنفيخ الرفارف علشان الكاوتش.

الموضوع: رابطة ومالكي عشاق الفيات 132

LinkBack

أدوات الموضوع

عرض

-

-

-

-

-

-

-

-

المواضيع المتشابهه

رابطة عشاق و مالكى فيات نوفا بونتو

رابطة عشاق الجملية byd على الفيسبوك

رابطة عشاق الريجاتا(عمره بالاسعار)

رابطة عشاق و مالكى 307

اقتراح عمل رابطة (محبى و عشاق و ملاك الفيات131)

الكلمات الدلالية لهذا الموضوع

المفضلات

المفضلات

ضوابط المشاركة