الموضوع: اضراب سواقى الميكروباص اليوم

الميكروباصات...

بقعة سوداء جدا في الشارع المصري

وللحق..المسئوليه عن ذلك
يشترك فيها اكثر من طرف

اما عن الاضراب..مفيش مشاكل..
خليهم بقه يدفعوا اقساط عربياتهم وهم واقفين
عادي خالص

المشاركة الأصلية كتبت بواسطة R A N A

انا من مكاااااااني هذااااااااا
اناشد جميع امناء الشرطة والضباط ان لاتأخذهم بسائقي الميكروباظ دول اي رحمة أو شفقة وانهم يعملوا فيهم مابدا لهم لإنهم بجد يستاهلوا كل اللي يجرالهم بعمايلهم السودة دي .
تصدقوا دول وصلوني لمرحلة اني بقيت حاسة اني لو شوفت امين شرطة ولا ضابط بيبهدل سواء ميكروباص مش هايصعب عليا (مع اني بتأثر جدا بالمواقف الشبيهة للموقف ده ) الا ان اللي شوفته منهم واللي بيعملوه في الناس خلاني بجد بقيت اقول امين الشرطة عنده حق حتى لو ربطه في الميكروباص وجره زي ماعملوا في محمود المليجي في فيلم الأرض

ما اصل برده تخيلي انهم بعد كل الاكروبات اللي بيعملوه في الشارع و الخناقات مع الناس و مع سواقين الملاكي و التخبيط فيهم... يجيي في الاخر و هو مروح اخر اليوم امين شرطه يوقفه و يروح لاطش منه كل الفلوس اللي معاه يا كده يا إما يبات في القسم و العربيه تتحجز لحد لما يبانلو صاحب

حقيقه برده حاجه تخنق قوي... ده مش دفاع عنهم طبعاً بس تخيلي انتي شغاله طول الشهر و يوم ماتيجي تقبضي يروح جي واحد لاطش المرتب بتاعك عيني عينك كده غصم و اقتدار (علي رأي اللمبي) فالموضوع ده لو مره هايعدي انما لما يتكرر كل شويه مش هاينفع برده هما الناس ديه جايبه العربيات عشان تشغلها لحساب الشرطه ولا ايه

انا طبعاً مع فكرة سحب رخص جميع سائقي الميكروباص لحد لما يتعلموا السواقه

لانهم لحد دلوقتي مش بيعرفوا يسوقوا هما بيلعبوا بعربيتهم معانا

المشاركة الأصلية كتبت بواسطة smartmate

يا جماعه خليكو موضوعيين
الناس دي بتؤدي خدمه للمواطنين يمكن مش خدمه رائعه بس احنا بنعرف اهميتهم لما بيضربوا عن العمل
المهم فيهم ناس كويسه وبتتظلم من العبء المادي الفظيع ف الغرامات والجبايات حتى لو حبو يمشو عدل
وربنا يلطف بعبيده

بيأدوا خدمة أه بس مش للمواطنين (مش عشان خاطر سواد عيون المواطنين يعني ) لإنهم ببساطة مش في الجيش ولا شغالين سواقين ميكروباص غصب عنهم أو باوامر من الدولة يعني
لإنهم بياخدوا مقابل خدمتهم دي فلوس اللي هي الأجرة بتاعة تحميل الميكروباص واللي كل فترة يزودوها بدون اي مبررات ده غير الحمولة الزيادة ويركبوا الناس على الباب ويقعدوهم اربعة وخمسة كمان في الكنبة اللي ورا ويعاملوهم ازبل معاملة :k26:.
يعني هما بيرضوا انفسهم ماديا ومعنويا بالخدمة دي على فكرة مش بيعمولها لوجه الله.
انا مع حضرتك ان فيهم ناس كويسة (بس دول قلة قليلة جدا تكاد تكون نادرة الوجود اصلا إن وجدت كمان) ومع الوقت لو فضل كويس مش هايقدر يكمل سواق ميكروباص لإن البيئة بتاعة سواقين الميكروباص في تعاملهم مع بعض متسمحش لأي حد منهم يفضل كويس
وكلنا عارفين انهم بيتعاملوا مع الناس اللي سايقة جنبيهم من منطلق اللي خايف على نفسه يوسع ولو خبطك ماليكش حاجة عندي واللي عندك اعمله
اما بقي تعاملهم مع الركاب فحدّث ولا حرج اللي مش عاجبه ينزل يشوفله ميكروباص تاني ولا يركب تاكسي ولو حد إداله اجرته فيها فلوس قديمة مثلا ولا عملات معدنية يقولك لا مش عايز الاجرة دي ولو الناس جادلت معاه شوية يقوللهم خلاص الميكروباص عطل مش شغال وينزل الناس في نص الشارع ويشغل كاسيت بصوت عالي ويرب سجاير وخلافه وهو سايق ويهزر مع صحابه بشتايم قذرة عادي جدا وبيتعامل على اساس ان الميكروباص بتاعه ده ملكية خاصة وليس وسيلة خدمية .
وعشان برده منبقاش متحاملين عليهم ارجع واقول الحال اللي هما وصلوا ليه بسبب عدم وجود اي رقابة عليهم من المرور او البوليس يعني مش خطأهم لوحدهم لأ للأسف الشديد النظام كمان له يد في الخطأ ده وهو اللي وصلهم للمرحلة المتاخرة دي .