الموضوع: ارتفاع فى اسعار السيارات

الاسعار فى مصر نازلة نازلة لان السيولة اللى مع الناس شبه معدومة و اللى معاه سيولة سلطان زمانه من حقه يختار و ياخذ تخفيض يرضيه هو كده فى العالم كله
و تجار السيارات فى مصر عندهم امل ان الصيف حيشتى عليهم فلوس خليجى مع المصريين الراجعين ما يعرفوش ان الخليج بينهى عقود العمالة المصرية و الكل مرتقب و اللى معاه قرش فيهم مخبيه تحت جلده

كلنا مع حملة المقاطعة و ياريت نصبر لنهاية شهور الصيف

اسمحلى يا باشا اختلف معاك شوية أنا طبعا مش حابب أعيد كتابة مشاركات سابقة بس عموما العربيات احتمال ما تزيدش لآخر السنة دى على الأقل و ممكن تنزل أكتر من دلوقتى بس مش النزول اللى الناس بتحلم بيه بمعنى نفس المعدلات اللى ماشية حاليا ألف ألفين الرينج ده. و فى احتمال نزول أسعار الأوروبى فى شهر 8 و فقط فى حالة وصوله لأسعار قريبة نسبيا من الأسيوى ربما يؤثر على سعر الأسيوى بالتبعية (كلام مدير عام شركة دايهاتسو مصر فى حوار شخصى مع صديق بعد سؤال مباشر عن رأيه فى هذا الموضوع)
أما أنا عن نفسى فمع الناس اللى بتقول سيبك من اللى حاصل بره و ما تحاولش تقارن السوق بتاعنا بأى سوق تانى لأن الأزمة بره بدأت آخر 2008 و ألقت بظلالها على كل السلع تقريبا و العربيات واحدة منهم أما عندنا فكثرة المعروض للبيع و أمل الناس فى انخفاض الأسعار هو الشىء الوحيد اللى وقف الدنيا شوية الفترة اللى فاتت و ما أثرش غير على سعر المستعمل للأسف.
لكن أحب الناس تعرف إن الدنيا بره بتخرج من الأزمة تدريجيا دلوقتى و إن فى شركات ابتدت فعلا تحس بتحسن كلحوظ فى المبيعات و قربت ترجع زى الأول و حتى اللى ملاحظ سوق العقارات فى مصر اللى هو أساسا السبب الرئيسى للأزمة بدأ بقوة فى عودة الأسعار لما كانت عليه
فاحنا سوقنا ما يتقاسش ببره احنا السوق هنا ماشى بمزاجه و بمزاج الكبار المستفيدين منه و بمزاج الحكومة برده مش المستهلك و الظروف المحيطة. يا ريت تعوا الجزأ الأخير ده كويس قبل ما تتفائلوا بزيادة و تصحوا فجأة على الواقع الأليم.

و أحب أضيف حاجة أخيرة احنا بلد فقير بشكل كبير و أعنى بده أغلبية الشعب مش بعمم طبعا و ده يخلى سلع زى الشقق و العربيات مثلا مش سلع ترفيهية أو استثمارية لينا كأفراد و خصوصا العربيات اللى هى ما تعتبرش سلع استثمارية أساسا يعنى الشخص اللى فعلا محتاج عربية و معاه تمنها عمره ما هيستنى لأانها مش نظارة شمس ممكن يصبر شوية و يستحمل الضوء من غيرها. لو قادر يستغنى عنها ما كانش فكر فيها أصلا

ارجو تغيير عنوان الموضوع لانه يوحى بان السيارات ارتفعت اسعارها وده مش حقيقى

بصراحة الكلام ده ما لوش اى علاقة بنزول الاسعار او ارتفاعها لان نسبه لا تكاد تكون محسوبه اللى بيشترى عربات المعوقين
وبعدين هو لسه فيه حد بيبص للعربيات الفيات والا اللادا دى كانت موضه وبطلت