قصة جديدة من تأليف أعضاء المنتدى.. خيال علمى ياناس

**Dr Ahmed** · 24-08-2007 02:07 PM

بعد النجاح الكبير الذى حققته القصة السابقة الذى نسج خيوطها أعضاء المنتدى ، وبعد عروض كثيرة من شركات عالمية مثل "وارنر بروس" و "والت ديزنى" و "كولومبيا" و "الموساد" للحصول عليها لتحويلها لعمل سينمائى ضخم ،
سنبدأ بإذن الله قصة جديدة من نوع الخيال العلمى ، ستدور أحداثها فى مصر عام 3007 - يعنى بعد ألف سنة - على مانكون اتطورنا شوية (احتمال) وبقى العالم غير العالم والناس غيرالناس، لكن هيكون برضه فى العالم ده ناس أسماؤهم زى أسمائنا وصفاتهم زى صفاتنا.. يمكن أحفاد أحفادنا..

عموما: لينك القصة السابقة هو:
http://www.nilemotors.net/Forum/view...er=asc&start=0

ومنتظرين الإبداع والخيال اللى بجد..

بسم الله الرحمن الرحيم:

**Dr Ahmed** · 24-08-2007 02:24 PM

فتح كريم الجريدة الإلكترونية على الشاشة الضوئية المثبتة على مكتبه الزجاجى فى عمله بوكالة الفضاء المصرية (ماسا) وتصفح بملل الأخبار:
( الصين تحتل كوكب بلوتو وأهل بلوتو يثورون - فلسطين تفوز بكأس العالم فى كرة القدم - الفنانة صباح تحتفل بعيد ميلادها فى العناية المركزة...)

قطع قراءته صوت زميله (حازم) قائلا: كيمو حبيبى.. مش هتصيف السنة وللا إيه؟ الحرارة معدية ال 150 السنة دى..
كريم: آآآه يا حازم .. زمان كانوا بيقولو ان جو مصر كان جليدى وكانت الحرارة بين ال 30 وال 50 ، ودا طبعا قبل ما تنفجر مفاعلات الدولة اللى كان اسمها .. مش فاكر.. عذرائيل.. ولا اسرائيل- قبل مفاعلاتها النووية ماتنفجر وتغير جو الأرض كله وتتمسح دولتهم من على الوجود..
حازم: ماشى ياعم المثقف.. عايزين نحجز المصيف.. قدامك شط إمبابة أو شط بنى سويف... وللا تفضل نروح جزيرة الاسكندرية وللا جزيرة مطروح؟؟
كريم:...........................

**إسلام شاهين** · 24-08-2007 02:36 PM

كريم لا انا سمعت إن أسعار المصايف في الأماكن ديه مولعه قوي بيقولك بني سويف اليوم بقى ب 3000 جنيه والشمسية بكرسين على البحر 1200 جنيه ، أنا قريت إعلان امبارح إنه فيه شاطيئ جديد معمول مخصوص للصفوه وتم افتتاحه السنه ديه جديد لسه يعني .
حازم :- إنت قصدك شاطيئ كوكب المريخ ؟
كريم :- أيوه هو ده .
حازم :- بس ده بعيد شويه ديه المسافه من عندنا لهناك حوالي 1500 سنة ضوئية
كريم :- يا سيدي إيه المشكلة العربية النفاثة بتاعتي الجديدة الكرولا موديل 3001 توصلنا هناك في 6 ساعات
حازم :- على رأيك بس ابقى اكشف عليها كويس قبل السفر وخصوصا نظام الملاحة والأجنحه إنت عارف الجو فوق حارق جدا
كريم :- متقلقش أنا لسه عامل صيانة لنظام الطيران بتاعها في التوكيل ودافع 25000 ألف جنيه
حازم :- ماشي يا ريس تروح وتيجي السلامه
كريم :- الله يسلمك
وهنا ظهرت رساله على الشاشة الخاصة بكريم وكانت من صديقه معتز
وعندما نظر كريم إلى الرساله اندهش قائلا ..................

**mbluethunder** · 24-08-2007 02:41 PM

كريم : لأ أنا أفضل أخد ياخت فضائي ونصيف في المريخ الحال هناك بقى رائع جدا وخصوصا لمل حصل تعاون مشترك من السعوديه ومصر على انهم يطلعوا أول شخصين عربيين لهناك أنت مشفتش الأحداث الجديده اللي بتنقلها شاشات البلازما الهوائيه واللي بتظهر في كل حته لسا صديقي معتز جايبلي الخبر

على العموم هما هناك فتحوا Dream Space بس حاجه أفضل بكتير من Dream Park ومحالات كتير جدا وأكازيونات

وأحتمال نعدي على القمر وأحنا رجعين بيقولك أن فيه عالم مصر كان بيعمل رحله فضائيه من 500 سنه وأكتشف أن فيه أثار فرعونيه على القمر وأخونا معرفوش عنها حاجه بتاتا وأول ما مصر عرفت كده بعتت الناس المعنيين علشان يفتحوا المتحف المصري القمري

بس تخيل الرحله ده هاتكلفني كام حوالي 2 مليون دولار تخيل لما كان الدولار بيساوي حوالي 6 جنيه مصري أيام زمان دلوقتي بقى يساوي حوالي 10000 جنيه مصري بس الحمد لله مصر بتتطور مع الزمن أه

ربنا يخليه معتز صحبي انه جاب الخبر في ميعاده

حازم رد عليه وقاله : .....

**Dr Ahmed** · 24-08-2007 02:59 PM

حازم: ماشى ياكيمو.. أنا هقول لباقى الشلة.. هانى بايو و حسام حسن ومعاذ لأنهم كانوا موصيينى على المصيف السنة دى.. دى هتبقى رحلة جميلة إن شاء الله..
كريم: طب ماناخد منهم كلهم الأوكيه دلوقت..
رفع كريم إصبعه السبابة ونطق أسماء أصدقائه الثلاثة ومرت ثوانى قبل أن تظهر صورهم فى الفضاء المحيط به وأكدوا جميعهم بالموافقة على التصييف فى المريخ باليخت الفضائى العابر بين الكواكب واتفقوا على الموعد ومكان التجمع..
الجمعة 7 سبتمبر فوق أعلى بقعة فى مصر: هرم خوفو..

وبدأ التجهيز للمصيف..

**hazem_khidr** · 24-08-2007 04:11 PM

حازم رد عليه و قاله:.....
شكلي كده مش حعرف اطلع الرحله معاك علشان كل فلوسي حططها في العربيه رمسيس الجديده اللي عاملين عليها قلبه اليومين دول و بتمشي بالطاقه الشمسيه .
عموما ححاول يمكن اعرف ابيع عربيتي التانيه اليومين دول بس بعد ما ترجع من عند الميكانيكي بقالها تلات ايام عنده بيصلح العيب اللي طلع في مضخه الهيدروجين و حتي قولتله انزل وكاله البلح اجيب واحده استعمال قالي انا حتصرف دي مش اول مره هو العطل دا موجود في كل السويفت الفيراني :) .
و بعدين قالي يا بيه ايام زمان قدرنا نحل لغز الصفاره بتاع العربيه اللي اسمها تقريبا اسبراوزه او حاجه كده مش حنعرف نصلح طلمبه هيدروجين؟!! سيبها و مالكش دعوه.
عموما ربنا يسهل يا كريم ما نشوف حنعمل ايه بس انت شجعتني بكلام معتز دا
هو الدكتور احمد سمير و الدكتور احمد مش طالعين معانا ولا هما مشغولين اليومين دول ولا حكايتهم ايه.
رد كريم و قال.........

**abo3bdolrahman** · 24-08-2007 08:20 PM

الظاهر كده إن الدكتور أحمد سمير هايصيف متأخر السنة دى علشان الإمتحانات فى الجامعة أما بقى د.أحمد فعنده مؤتمر طبى فى زحل حيخلصه و يحصلنا على المريخ إدعوله ربنا يوفقه فى أبحاثه الجديدة اللى هاتعمل إنقلاب فى عالم الطب الكونى.
رد عليه معاذ و قاله حد كلم أبو عبدالرحمن كان بيقول أنه هايخلص شغله اللى فى المشترى و هاريجع الأرض قريب.
رد عليه كريم و قاله...

**Dr Ahmed** · 24-08-2007 08:39 PM

رد كريم وقال: أبو عبد الرحمن دلوقت واخد توكيل سفن بروتون الفضائية بين المجرات ومش فاضى للتصييف والحاجات دى ربنا يكون فى عونه ...عموما أنا هسيبله مسدج على تردد دماغه لو فاضى يجيلنا هناك..

المهم دلوقت باللا بينا نجهز حاجتنا علشان السفر قرب...إحنا خلاص اتفقنا اننا هنجتمع بسياراتنا على مستوى قمة هرم خوفو وممكن نشترى مستلزمات الرحلة من كارفور القمر أو من داندى زحل، المهم مش هنضيع وقت.. سلام..

وانشغل كل منهم فى تجهيز سيارته لهذه السفرية المفترض أنها للإستمتاع بالصيف فى الكوكب الأحمر "المريخ"..

تجمع الأصدقاء وتبادلوا العناق فمعظمهم لم يقابل الآخر من سنوات إعتمادا على مكالمات "الهالوفون" المجسم، استقل كل منهم سيارته النفاثة ووضع خوذة بذلته الفضائية وقالوا جميعا: بسم الله توكلنا على الله.. وقالوا دعاء ركوب الدابة ودعاء السفر..

وبعد عدة ساعات هبطت سياراتهم الواحدة تلو الأخرى على المهبط الخاص بمنتجع "مارينا المريخ" الفاخر حيث توجد أجمل الشواطئ الصناعية والحرارة المعتدلة بفضل التكييف الكوكبى ..

ترجل الجميع من سياراتهم وخلعوا خوذاتهم لأن جو المريخ تم تعديله فى المنتجع بنسبة أكسجين كافية للإنسان.. أقترب منهم الساعى المريخى ذو الخمس أيادى والخمس ارجل التى تشبه أرجل الأخطبوط وحمل كل أمتعتهم وأوصلهم لحجراتهم..
وفى الطريق مال معاذ على كريم وقال:.............

**eng_elnaggar** · 24-08-2007 09:17 PM

وفى الطريق مال معاذ على كريم وقال: بقولك ايه يا كيمو هو احنا هناكل امتى احسن انا عصافير بطني بتصوصو؟؟
كريم: الاكل هنا خرافي يا معاذ انواع واصناف جميلة جدا احنا بس نغير هدومنا وبعدها نطلع على المطعم الطائر نتعشى هناك.

وأخذهم الخادم المريخي كل واحد على غرفته لأخذ قسط من الراحة ثم الانطلاق نحو الاستمتاع بالأجازة ودخل الخمس اصدقاء معاذ وكريم وحسام وحازم وهاني كل واحد الى غرفة وعند دخولهم الى الغرفة شهق كل منهم عندما رأى المفاجأه وقال حسام: ...........................

**Karim_Monir** · 25-08-2007 02:31 AM

وقال حسام :
ايه العرض المغري ده
وعلى التوالي شهقوا جميعا من الدهشة عندما راو على شاشات تليفزيوناتهم الهولوجرامية داخل غرفهم عرض خاص جدا لخماسي نايل موتورز من حسن ابو الفتوح يعلن فيه سيارتة الجديدة A555 التى تعمل بوقود الاحماض الامينية وعن فرصة للفوز بها لمن يستطيع ان ينتقل بها من المريخ الى فوبوس ثم ديموس قمري المريخ والعودة خلال مدة لا تتعدي 3 دقائق
ومن اجل ذلك وجد كل منهم سيارة اسبيرانزا 555 في انتظارهم في شرفة الفندق
طاار الكسل والجوع منهم على الفور وانطلقوا فورا للانطلاق بسيارات ابو الفتوح وفي ذهن كل منهم خطة للفوز بالسيارة الجديدة
ولم يكد اولهم حازم ينطق بكلمة Start لتشغيل محرك السيارة حتى ..................

الموضوع: قصة جديدة من تأليف أعضاء المنتدى.. خيال علمى ياناس

LinkBack

أدوات الموضوع

عرض

قصة جديدة من تأليف أعضاء المنتدى.. خيال علمى ياناس - انشر الموضوع فى :

-

-

-

-

-

-

-

المواضيع المتشابهه

دة اسمه خيال علمى

قصة من تأليف أعضاء المنتدى (عودة من جديد)

من الملفات القديمة: قصة من تأليف أعضاء المنتدى

قصة من تأليف أعضاء المنتدى

الكلمات الدلالية لهذا الموضوع

المفضلات

المفضلات

ضوابط المشاركة