حبيت اني اكتب عن امتلاك عربيه في مصر لما فيه من مخاطره وتعب وطلوع روح وعذاب ..حيث اني اشعر ان كل الظروف في مصر ضد امتلاك عربيه ..ويجب على المواطن المصري ان يكون على وعي تام وعلى قدر كبير من المسؤليه لانه سيواجه تحديات ومشاكل وهموم لاحصر لها ...وسيدخل نفسه في دوامه ...بدايه عند رغبتك في شراء سياره فستكون الخيارات اما جديد او مستعمل ...طبعا لو رغبت في شراء جديد هتحوش فلوس لسنين من عمرك وهتحرم نفسك علشان تحقق حلمك ...وبعد لما تحوش مبلغ محترم ..هيتحرق دمك لما تعرف ان العربيه اللي هتشتريها اغلى من ضعف ثمنها الحقيقي المعروف في اوروبا وامريكا وحتى دول الخليج..لا وكمان انت هتشتريها بكماليات لا تقارن بمثيلتها في عربيات بره زي انعدام وسائل الامان (الايرباج والabs) ووسائل الراحه وطبعا ماتحلمش انك تجيب عربيه فوق 1600 سي سي علشان ماتتشبهش بالجماعه الوحشين (الاغنياء)ولذلك احنا بنشوف عربيات باحجام عجيبه بمواتير 1200 و1300 ..لحد 1600 وده طبعا في معظم العربيات وده بسبب الجمارك والوكلاء اللي بيستهبلوا الشعب البسيط ..ولو رغبت في شراء مستعمل هيتحرق دمك لما تعرف ان العربيه اللي انت بتشتريها انقرضت من العالم من 30 سنه واصبحت ذكرى..وبتدفع فيها مايساوي ثمن عربيه حديثه محترمه في اقرب دوله اليك (السعوديه مثلا) مع فارق الدخل الرهيييييييب...وبعد لما تخلص دوامة شراء العربيه هتدخل في هموم اكبر بكثير وهي تقبل الحكومه والشعب لك كصاحب عربيه وبدء الحرب والصراع لتطفيشك من عربيتك وجعلك تكره اليوم اللي جبت فيه العربيه ....اولا : الحكومه :
1- رفعت سعر البنزين وجعلت العربيه عبئا على قلب المواطن ...بحيث يصرف تقريبا ثلث دخله على البنزين (انا شخصيا) لانه لايقدر على تحمل المواصلات الرهيبه في بلدنا ويجب ان يدفع ضريبه راحته
2-ترخيص السيارات وهي هم وحمل ولكن على الاقل لا نتحملها الا كل 3 سنوات وياويله وسواد ليله اللي عنده عربيه 2000 سي سي او فوقها
3- قانون الحبس للسير عكس الاتجاه وده اخر العنقود في مواليد قانون المرور الجديد ..وطبعا في شوارعنا المحروسه الخاليه تماما من الاشارات كل واحد سايق عربيته عامل حسابه انه ممكن يبيت النهارده بره البيت وياسلام لو القاضي خبطه 3 سنين علشان يقضي فتره من حياته مع القتله والمغتصبين والبلطجيه ..وانا طبعا مش مع السير عكس الاتجاه ابدا ابدا ولكن مش مع العقاب الهمجي ...ودي نبذه بسيطه عن دور الحكومه
ثانيا : دور الشعب : معظم افراد الشعب الغير ممتلكين للسيارات ينظرون الى مالكها بغضب وحقد وغل ..وينظرون اليه على انه مستهتر (خاصة لو كان شاب)....اللي يجرح ويكتب على العربيه واللي يمشي وسط الشارع ويتعصب ويتنرفز لما تديله كلاكس ...واللي يعدي الشارع باستهتار ويتحدى السائق بجسمه مقابل العربيه (على اعتبار لو خبطني هتروح في داهيه ) ...واخيرا فئه النصابين والمجرمين الي بيسترزقوا عن طريق توريط السائق في المصائب والمكائد ...لما يلقوا بانفسهم امام السيارت مدعين الاصابه لينالوا مبلغ بسيط (من100 الى1000 جنيه) او يكونوا من الفئه الطماعه ويمشوا في القضايا ويطمعوا في مبالغ محترمه اكيد اكتر من1000 جنيه على اعتبار اما الدفع او ضياع مستقبلك...وده حصلي شخصيا وحسبي الله ونعم الوكيل...وطبعا بيساعدهم في كده قله الضمير في المستشفيات اللي بتضرب تقارير طبيه والمرتشيين من رجال الشرطه....
ودي عينه من اللي ممكن يقابل اللي هيشتري عربيه في مصر وطبعا لاننسى ان الله عز وجل موجود وانه ينصر المظلوم ويعيننا على مايواجهنا والله خير حافظ


وانا اسف على الرغي الكتير ده.. بس انا حاسس كده اني فضفضت عن اللي في نفسي...وشكرا