اقتراحات لانهاء مهزلة حبس عكس الاتجاه

**Osama_soliman** · 11-02-2009 09:34 AM

الاخوة الافاضل / اعضاء المنتدى

بما ان هذا المنتدى يجتمع فيها اكبر عدد من مستخدمى السيارات فى مصر

ارجو ان نضع مقترحات لوقف مهزلة حبس السير فى عكس الاتجاه

اولاً : انا مع وجود عقوبة رداعة لكل مستهر يغامر بارواح الناس.

لكن فى امور لابد ان تُراعى منها :

- توفير الوعى الكامل عن الشوارع ذات الاتجاه الواحد بالاشارات او غيره.
- الحبس فى حالة تكرار المخالفة (يعنى لواحد غاوى سير عكس)
- انتفاء سبق الاصرار على السير عكس (يعنى واحد من خارج محافظة أو حتى منطقة واول مرة يمشى فى المنطقة ويلاقى نفس بات فى الحجز)

ياريت نقول مقترحات ربنا تصل لحد من المسئولين ويكون لها صدى

مع تحياتى

**AboELsoud** · 11-02-2009 12:30 PM

كلام صح 100/100
السجن ده حاجه غريبه قوي بالنسبه لمخالفه صغيره زي دي

**Abo_Lina** · 11-02-2009 12:40 PM

سيبك من السير عكس الاتجاه و العقوبة و الكلام ده كله ولا له لازمة

بص دي سياسة البلد لازم يبقى فيه حاجة الناس تتلهي فيها شوية حزام شوية محمول شوية عكس اتجاه ..
يعني وقت الحرب في غزة الحكومة حست ان الناس شايطة .. قام بقدرة قادر طالعلنا ازمة في انابيب الغاز الناس سابت غزة و ووقفت في الطوابير تتخانق و تتضرب بعض و الجرايد تكتب و الناس تتلهي..
لازم يبقى فيه فقاعة كده كل شوية الحكومة تتطلعها و الشعب يشتغل فيها

**bassam nagy** · 11-02-2009 12:41 PM

المشاركة الأصلية كتبت بواسطة Osama_soliman

- توفير الوعى الكامل عن الشوارع ذات الاتجاه الواحد بالاشارات او غيره.

مع تحياتى

تلاقى اللجنة واقفة فى شارع مافهوش اى ملامح انة اجاة واحد وتقول انك ماشى عكسى
لازم يبقى فى اشارات وتنبيهات على االشوارع الاتجاهات الواحدة

**hero** · 11-02-2009 12:56 PM

انا باقترح ان الناس ايلي تعرف شوارع اتجاة واحد ....تحمل خرايط من الجوجل ايرث وشوية بشوية هايبقي عندنا خرايط مرورية كاملة للشوارع ذات الاتجاة الواحد....

ولو في شوارع مش معروف هي اتجاهين ولا اتجاة واحد.....نعمل عليها علامة استفهام لحين التاكد من وضعها .....

وربنا يكفينا شر الحبس ...

**GBYTE** · 11-02-2009 01:07 PM

أنا مع الحبس فى حالات معينة يعنى شوفت مرة عربية طالعة كوبرى عكس الاتجاه يعنى العربيات نزلة وده طالع ده حبس ولا وفى حادثة على كوبرى أكتوبر من عند نزلة كوبرى القبة عربية 128 وميكروباص حد فيهم كان طالع المطلع العربيتين لبسوه فى بعض وفى حاجة تانية الشخص المحبوس ده لما يطلع وبعد دفع الغرامة عمره فى حياتة ميعمل مخالفة عكس الاتجاه او اى حد عارف هذا الشخص ليه عشأن لأسف فى مصر فى مثل بيقول اضرب المربوط يخاف السايب وده حقيقة بس أنا عارف ان فى ظلم كبير لكن واحد طالع كوبرى بالعكس حبس ولا حرام والف شكر

**Samir Elshahawy** · 11-02-2009 02:52 PM

طيب و عربيات الشرطة لما تمشي عكسي ؟؟؟

أيوة من 4 أيام كنت راجع من الشغل و عند الكيلو 4.5 علي أول طريق السويس أذا بعربية شرطة قادمة من الاتجاه المعاكس فوجئت بها امامي , طيب ده مش المفروض يدخل السجن و لا علي رأسه ريشة ؟؟

**ابوهاشم** · 13-02-2009 12:03 AM

انا من رأييى انهم يخصصو العقوبه حسب نوع العربيه
يعنى مثلا خطورة سير لتجاه عكسى لعربيه ملاكى مش زى عربيه نقل
يبقى ده له عقاب غير التانى خالص لان الخطوره اشد

**ahmedfawzy14** · 13-02-2009 12:08 AM

المهزلة الصح ان الواحد يلاقى مقطورة ماشية فى المعاكس على طريق القاهرة اسكندرية الصحراوى بليل

انا مع الداخلية فى اعدام اللى يمشى عكس الاتجاه بس فى الطرق السريعة