طبعا كلنا و احنا كنا صغيرين كانو بيخوفونا بابو رجل مسلوخة و البعبع و الحاجات
بس طبعا لما كبرنا بقينا نسمع عن حكايات حصلت و خاصة في الارياف
و في منا الي عاصر حاجات من دي
يا ريت كل الي تجربة مع موقف او سمع حاجة يحكيها
عرض للطباعة
طبعا كلنا و احنا كنا صغيرين كانو بيخوفونا بابو رجل مسلوخة و البعبع و الحاجات
بس طبعا لما كبرنا بقينا نسمع عن حكايات حصلت و خاصة في الارياف
و في منا الي عاصر حاجات من دي
يا ريت كل الي تجربة مع موقف او سمع حاجة يحكيها
انا عن نفسي
كنت قاعد عند واحد صاحبي في شقتة بنذاكر و كنت انا و هو و اخوه بس في الشقة
وصف الشقة بس عشان كلة يبقي معانا في الصورة
باب الشقة قدامة سفرة و بعدين صالون كبير و بعدين طرقة بتدخل علي اوض النوم
قاعد انا و صاحبي دة بنذاكر في امان الله في السفرة لقينا اخوة جي من الصالون و رايح علي اوضتة عادي جدااا
و صاحبي رايح قايل لاخوة اطفي نور المطبخ معاة فعلا طفاة و دخل اوضتة و مخرجش تاني
بعديها بساعة لقينا الباب بيخبط قمنا نفتح لقينا ميييين ؟؟؟؟
اخووووووووة
ينهار اسود
و كل دة كنا قاعدين قدام الباب يعني مش ممكن يكون غافلنا و خرج
اكتر موقف رعبنا
ان انا واصحابى لما كنا فى الثانوية العامة كنا بنذاكر عند واحد صاحبنا على السطح بتاعهم المهم قاعدين لاقينا ابوه جه مرة واحدة والمعروف ان ابوه على بيرمى السلام وبيرحب بينا جدا لا ده طالع لا حس ولا خبر ولا اى حاجة قولنا لصاحبنا قوم كلم ابوك يا عم قام وجه فسألناه قالك ايه قالنا ماردش عليا خالص تانى يوم راح قال لابوه انت ماردتش عليا ليه امبارح لما طلعت السطح واحنا بنذاكر قاله سطح وانتو بتذاكر ايه انا امبارح داخل البيت الساعة 2 بليل وكنت بجيب شغل للمحل !!!!!!!!!!!!!!!!!!
ده طبعا خلانا اهو بقالنا 3 سنين ما بندخلش بيت صاحبنا ده من ساعة ما قلنا كده
اخوكم يوسف
أكتر موقف مرعب في حياتي مكنش له علاقة بالعفاريت
انا كنت بعمل تدريب في أحد القنوات الفضائية و رحت مع طاقم العمل اللي رايح يغطي أحداث المحلة الشهيرة - ميكروباص القناة أخدنا و نزلنا وسط المظاهرة تماماَ .. و هما طول الطريق عمالين يقولولي لو حصل أي حاجة سواء إتضربنا .. إتقبض علينا .. أي مصيبة تجري و تحاول ترجع القاهرة لأن إنت بتتدرب ملكش دعوة .
المهم بنصور و كله تمام .. و فجأة الدنيا مطرت .. مش مياه .. قنابل مسيلة للدموع .. عناصر الإحساس عندي كلها باظت ! عينيا بتحرقني جداَ و مش شايف حاجة .. شميت الدخان كله و مناخيري باظت .. مفيش إتجاه واضح أمشي فيه .. عمال أنده علي أي حد من الناس اللي معايا اللي إختفوا أو علي أي حد يساعدني مش عارف .. و سامع ناس بتصوت و ناس بتزعق و ناس بتتسحل و ناس بتضرب ! فضلت أجري و انا مش شايف بجري فين لحد ما خبط في حيطة و قمت متكوم جنبيها قلت مش هتحرك إلا اما الموضوع يهدا شوية عالأقل و أعرف أشوف إيه اللي بيحصل! طبعاَ و انا قاعد مرمي جنب الحيطة كان كل شوية واحد يخبط فيها و يقوم واقع فوقيا أو حد يبقي بيجري و يعدي من عليا و حاجات من هذا القبيل ... فييييييين لحد ما إستعدت الرؤيه شوفت فني الكاميرا بيتطوح في وسط الشارع .. و قعدنا ندور علي باقي الناس و قمنا راكبين الميكروباص و عالقناة عدل .
بجد ربنا يكون في عونك يا محمود دة الواحد لما بيشوف خناقة بيتلبش امال انت تعمل ايه
لو تتذكروا كان يوم جمعه وساعه العصر تقريبا هبت ريح قويه جدا واظلمت السماء لفترة وجيزة المهم الناس خافت جدا وبدأ التكبير فى المساجد وسرت شائعه انها القيامه ! وفى بيتنا كان هرج لكن لله الحمد كنت متماسك اسرعت واغلقت الابواب والشبابيك وعدى اليوم
المضحك شائعه القيامة
موضوع المظاهرة دا بجد اللى يخوف
الحمدلله مش فاكر موقف حصلى فيه رعب كدا
انا حصلى موقف مش هنساة لحد الان كنت فى مرة قاعد بذاكر عادى وببص كنت فى الاوضة بتاعتى والاوضة بتاعتى الباب بتاعها مطل على الصالة وانا قاعد على السرسر
الى هو قصاد الصالة وببص لقيت اختى جت بتبص عليا وانا بذاكر وبقولها فى اية مابتردش
ومشيت تانى قلت اروحلهم اوضة النوم كان بابا واختى وماما قاعدين رحت اقولها
انتى جتيلى الاوضة لية بتقولى ماجتش ولا اتحركت انا بتفرج على التلفزيون وابصلهم كلهم مستغربين
ومن ساعتها مانمتش فى الاوضة تانى
كنت صغير (عندى حوااالى 15سنة )المهم كنت مع ولاد خالتى فى البلد ومش فاكر اية اللى خلانا نروح ناحية المقابر والمقابر فى البلد بعيدة عن البيوت وسط الغيطاان وفيهاا اشجار كتير ضخمة(الشجر اللى بتتحول فروعة اللى جذور ) وتخوف ومشهور ان فيهااا تعابين.المهم انهم قرروا يروحو يقرو الفاتحة على روح ابوهم (ابوهم متوفى من كام سنة )بعد ماخلصنا وعاوزين نروح ابن خالتى الكبير جة يدور العربية مدارتش !!!حاول كتير بس العربية مرضيتش تدور(عيب بطارية ) فقالنا انة رايح يجيب حد يزقة او يدية وصلة وسابنى انا وابن خالتى اللى فى سنى لوحدنا وسط المقابر كنا فى الغروب !!!ومحكلكمش على اللى سمعناة او شوفناة .سمعناااا اصوات غريبة متعرفش اية مصدرهااا وشوفنا حاجات ورا الزرع اول مانبصلهااا تجرى .دمنا نشف ساعتها طبعااا احنا قررنا نقعد جوه العربية ونقفل الابواب والشبابيك .بس ابن خالتى الكبير اتأخر علينا والدنيا كانت ضلمت فقررنا انا وابن خالتى نسيب العربية ونمشى لحد الطريق المسفلت (حوالى 2كيلو )
نزلنا وسبنا العربية ورانا ومشينا لازقين فى بعض ومرعوبين .
مفيش 30 متر وبنبص ورانا لقينا كشافات العربية بتنور وتطفى لوحدها
طبعاااا انا شعر راسى طقطق(طلعتلى شعرة بيضاء فى وسط راسى من الخضة ) .واخدناها جرى بهيستريااا انا وابن خالتى ومحدش قدر فينا يبص وراة .المهم لما جة الكهربائى مع ابن خالتى الكبير بعد كدة لقى الابواب مفتوحة واحنا قفلناها لما نزلنا من العربية
وكمان البطارية كانت نايمة خالص ولحد دلوقتى منعرفش النور نور ازاى؟؟؟؟؟مع العلم اننا متأكدين تماما ان مكنش فية حد غيرنا هناك لأن الفلاحين بيخافو يرورحو هناااك من بعد العصر!!!!!!!!!!!
انا هحكى لكم موقف مستحيل يتكرر تانى
كنا ايام الكليه متعودين بنذاكر عند واحد صاحبنا ونسهر هناك وننام عنده
فى يوم اسود فى وسط الامتحانات
قالنا انه لقى كتب بتاعت واحد قريبه عن تحضير الارواح
(قريبه ده كان مجنون شويه وكان بيفكر فى المواضيع دى كتير)
جبنا كتاب منهم عن تحضير الارواح والجن
وقعدنا نجرب
لو عاوز تحضر جنيه جميله تيجى وتنفذ لك كل اللى انت عاوزه وتجيب لك كنوز الدنيا اكتب كذا وكذا بالزعفران ومش عارف ايه وحطها تحت رجلك وقول ايه(كلام عجيب)
واحنا نكتب وننفذ والجنيه متجيش ونضحك (بنكتب بقلم رصاص)
لو عاوز تحضر جنى علشان تعمل ايه اكتب ايه ونجرب
لو حد مضايقك وعاوز تحضر مارد علشان يلبسه ويعفرته(شغال برده ما هو مفيش حاجه بجد)
وقلبنا الموضوع تهريج
ومره واحده الكهربا قطعت
مش هحكى لكم عن الصريخ والرعب اللى صحى البلد كلها
والتهيؤات ومش عارفين نخرج من الاوضه علشان الاصوات اللى بره
وقعدنا محبوسين ونقرا قرآن ونسمع صوت اى كلب فى الشارع نصرخ
لحد الجيران ما صحيوا وجم جرى
وطلعو لنا افتكروا حد قتلنا
طبعا قلنا لهم اننا شفنا عفريت
ولحد دلوقتى الناس مقتنعه ان البيت ده مسكون
ليا مواقف تانيه فى الجيش هبقى احكى لكم عليها
الموضوع شائق جدا جدا
بس فيه بجد قصص من اللى حكتوها مرعبة وخفت منها الله يسامحكم
:b4_611::b4_611:
انا كمان عندي قصة
منذ صغري وانا اخاف موت من القطط
كان فيه شىء جوايا بيخليني ارتجف لما
اشوف اى قطة وحاول أهلي يشيلوا الخوف
ده من جوايا بس للاسف فشلوااااااااا
المهم كبرت وكبر معايا خوفي وهنا بدأت القصة
اول موقف حصل وأنا نايمة فى أمان الله
وكنت نعسانة بس فجأة لقيتنى بصحى
وبفتح عيني لقيت قطة كبيرة على البطانية
طبعا أنا فضلت اصرخ بطريقة هستيريا
وشفت القطة بعيني وهى بتنط على الارض وتخرج من باب الأوضة ..بابا وماما بقة كانوا فى الهول وجم جري عليا وانا عمالة اصرخ واقولهم اضربوا القطة لسة خارجة
حلفولي ان باب الشقة مقفول ومفيش اى قطط عدت عليهم وإني كنت بحلم ـ بس منظري رعبهم وخلاهم يصدقونى بس مفيش اى تفسير لده
بعدها بكام يوم واقفة فى الطبخ وشباك المطبخ عليه سلك سميك وبيطل على منور
وقباله سطح
انا بقة واقفة بقلي سمك وخلصته خلاص
وبدأت انقله فى سرفيس كل ده وانا جنب
الشبااااااااااااااااااااا ااااااااااااااااااااااااا اااك
اللى عليه سلللللللللللللللللللللللل للللك
فجأة صراخ قطة ماسكة فى السلك فانا حاولت اقفل الشباك وانا مخضوضة بس معرفتش قاومتها بكل قوتى مقدرتش
وبدأت احس من جوايا بحاجة غريبة جدا
ان القطة دي مصممة انها تدخل
جريت بسرعة قفلت باب الشقة وتممت على شباك الحمام ..يعنى قفلت أى منفذ لدخولها
وطبعا استحالة تدخل من شبااااااااااك المطبخ ..المهم دخلت المطبخ لقيت القطة مش موجودة
تعرفوا كانت فيييييييين
كانت على السطح المقابل لشباك المطبخ
وبتعمل ايه بقة ...........؟
بتااااااااااااااااااااااا ااااااكل فى السمك اللى كنت راصااااااااااااااااااااه فى السرفيس
ازااااااااااااااي ؟ انا معرفشي؟
ومحدش يسألني لأن معنديش أى جواب
وكل لما بفتكر الموضوع ده بحس بجد بخوف شديد بس خفت احكى لاهلى ده خفت يقولوا عنى اتجننت وبررت سرقة السمك
انى نسيت باب الشقة مفتوح وممكن تكون القطة دخلت واكلتهم
عشاااااااان كدة انا بقى عندي فوبيا الخوف من القطط
انا هحكى موقف لسه شايفه النهارده على الطريق الدولى :
انا ماشى و طالع الكوبرى لقيت لانسر بومه راجع بظهره طاااااااير و فجاه لف (خمس بدهره يعنى بس نص خمسايه يعنى وقف بعرض الطريق )و بعديه على طول عربيه نص نقل نازل برده بظهره طاااااااير و فى واحد راكب فى الصندوق و قام داخل فى اللانسر من الجنب (طبها دغدغها ) و الله العظيم اللانسر اترفعت عن الارض و كانت خلاص هتتقلب و النص نقل نطت لفوق و نزلت تانى .و قام بتاع اللانسر خااااالع فى المخالف .......!!!!!!!!!؟؟؟؟؟؟؟؟؟؟
الطريق كله كان بيتفرج عليهم ؟؟؟؟؟؟؟؟؟
انا تخيلى انهم عارفين بعض و مثلا تجار مخدرات و مختلفين و بيحاولو يموتو بعض !!!!!!!!!!!
الحمد لله انا مش متزكر موقف مرعب حاليا بس متزكر موقف غريب
من فترة كدة كنت ماشى ف المنطقة الى فيها طرب بتاعت مدينة نصر الوصلة من مدينة نصر للمقطم من ورا الى هى بطلعك على الهضبة السفلى بتاعت المقطم المهم ماشى ولا بى ولا على و افاجئ ب بطة سودا ماشية ف نص الطريق المهم طبعا ولا لحقت ادوس فرامل ولا بتاع قولت خلاص الله يرحمها المهم البطة اتفرتكت و شفت الريش ف المراية طبعا قولت انزل المها على جنب عشان ميبقاش حرام على المهم اعت ارجع ب العربية ارجع و ارجع تانى و تالت لحد مرجعت كتير قوى و ولا لقيت بطة ولا بتاع قولت و انا ماشى تانى هلاقيها يمكن مشوفتش كويس ولا حاجة ؟؟؟ راحت فين معرفش ريشها طيب مفيش و من ساعتها و انا مبحبش امشى ف الطريق دة .. المهم راحت فين الله اعلم انا شوفت الريش و سمعت صوتها بتتفرتك ف وش العربية و من تحت كأنى دوست على حجر..
الله اعلم ..
اما عن حكاوى الطرق و الصحراء و المدافن و اللذى منة ف والدى عندة حكاوى كتير موت هبقى اسئلةو اقولكم ..
ايه الرعب ده!
الدنيا ليل وأنا قاعد لوحدي في الظلمة.
الفجر بيأذن. أنا رايح أصلي.
انا حصلى موقف برضة بس ما اترعبتش اوى
كنت عيان فى يوم اوى وكان عندى برد وانفلونزا جامدين اوى اوى
المهمسئلت والدتى ( امى طبعا ) عن دواء قالتلى عندك على الغسالة
هقولك على الغسالة بتاعتنا ونظامها عشان تبقه فى الصورة
احنا عندنا الغسالة بنحط عليها فوطة وبنحط على الفوطة كل حاجة
الادوية وكدة والحاجات الى بنستخدمها
المهم
انا رحت للغسالة وفضلت ادور واشوف فى الادوية مش لاقى علبه الدوا
اختى جات ( اختى شغالة فى شركة ادوية دكتورة ) سئلتها برضة قالتلى على الغسالة قعدنا انا وهيا ندور مش لاقى لدرجة انى شلت كل الى على الفوطة وشلت الفوطة نفضها فى الهوا مافيش معايا لحد كدة
ووحطيت الفوطة تانى وكل حاجة عليها
وبلف اكلم اختى وانا بكلمها ببص على الغسالة لقيت علبة الدوا محطوطة كانها واقفة نحيتى على طرف الغسالة اتخيله عملت اية
اكيد اخد العلبة واخد البرشامة ونزلت من البيت عادى :d
ودة الى عملته فعلا
ومن يومين فجاة لقيت اختى بتتصل بيا الساعة 10 بليل
بقولها فى اية
بتقولى اللاب توب بتاعك مش راضى يفتح قلتلها اطفيه ممكن يكون تعب من الشغل ومحتاج راحه ( اصل احنا بنشغل اللاب 24 ساعة ) :d
قالتلى انا كنت قافلاه لمدة ساعة
المهم قلتلها اطفيه تانى ولسه هقفل قالتلى استنى كدة
وانا معاها على التليفون جرس الباب رن
وكانت والدتى ورا باب الشقة على طول فتحت الباب مالقتش حد ( الى هو حتة مالحقش حد ينزل او يطلع جرى )
وفضل جرس الباب معلق وامى خافت بسرعة وقفلت الباب
المهم انا اخد العربية بسرعة ورحت البيت على اساس ان فى حرامى او اى حاجة فى العمارة اخد بالظبط 2 دقيقة لحد ما وصلت كنت ماشى 140 كيلو على كورنيش بنى سويف
وصلت البيت وقبل ما اطلع العمارة سئلت العسكرى الى بيقف خدمة على عمارتنا
(احنا عندنا فى العمارة حراسة عشان ساكنين ظباط عندنا ولو حد من بنى سويف اكيد يعرف عمارة السجل المدنى القديم فى مساكن المعهد الدينى )
المهم العسكرى طبعا زعقتله على اساس ان حد دخل العمارة وعمل كدة
حلفلى ان مافيش حد دخل العمارة او طلع منها من الساعة 8 وانه قاعد فى مدخل العمارة ما اتحركش منها
طلعت البيت عملت الجرس وفتحت باب الشقة
امى بتحلفلى انه اول ما الجرس رن فتحت الباب حتة الى رن مالحقش يجرى
قلتلها عفريت وبيلعب معاكم طبعا نزلت وامى واختى فضله صاحين لحد ما رجعت بليل انا واخويا
:d
انا مافتكرش حاجة مرعبة اوى الى تستاهل بس انا عموما باخاف من الوحدة والضلمة
وبعدين بقى .....
الساعة اربعة وربع الفجر يا جماعة والعملية مش ناقصة رعب..... يا ريتنى ما فتحت المنتدى دلوقتى...... :Zb_sor1[1]:
..............
............
... هو حد بيخبط على الشباك من برة ولا أنا بيتهيألى ؟!!!!!! :O_stupid[1]:
انا هحكي موقف
بس رجاء محدش يضحك عليا ولا حتى يبتسم
اولا انا اقطن بالعاشر من رمضان وهيا مدينه هاديه جدا في 98% من مناطقها
كنت عند واحد صاحبي وراجع الساعه كانت تقريبا 2 بعد نص الليل ويدوب خرجت من عندو ومشيت شويه وسمعت صوت حاجه ماشيه ورايا بصيت ورايا لقيت واحد اطول مني واعرض مني ( بني ادم مش طبيعي ) وبيمشي مشيه غريبه وبيمد جامد جداا جداا جداا وانا من الخوف اللي فجأه دخل جوايا ( في العاده انا مش خواف ) مديت جامد جدا وكان نفسي اني اوصل البيت بسرعه جداااااااا وانا امشي وهو يمشي ورايا بردو طبعا انا بقيت مرعوب والشخص اصلا ملوش ملامح وشكلو غير معروف بالمره ولما قربت من البيت قلت ايه ده انا ايه اللي بعملوا ده وقلت اهدي شويه من مشيتي فعلا هديت وبصيت ورايا لقيتو هدى مشيتو وبعد كدا راح جاي عليا بسرعه وانا رحت هوب مديت بسرعه جداااااااااا وسبقتو وكنت عمال افكر ازاي هدخل البيت بسرعه واحنا اصلا ساكنين لوحدنا وبوابه وبتاع ومش هعرف دخل البيت بسرعه وبعد كدا كان في زي سور اسمنت بس في شكاير في الشارع ومتغطي راح وقف وراه وانا شايفو وكان بجح اوي اوي اوي وبعد كدا دخلت الممر ناحية البيت لقيتو جاي بيجري وانا كنت هعيط من الرعب وفجأه لقيتو غير مسارو وراح ناحيه تانيه خالص واختفى نهائي وانا طلعت البيت مرعوب عمال ابص من الشبابيك على انو يكون واقف او حاجه ( علما ان الشئ ده كنت بحس انو بيمشي بسرعه جدا لكن مكانش بيحصلني خالص ومشيتو كانت عجييييييييييييبه كأنو محدد هدف وجاي عشان ينتقم اصلا ) تاني يوم باليل حوالي الساعه 8 كدا طلعت من البلكونه ولقيت زي حاجه مكلبظه وصغيره عدت من جمب البيت انا بقى ساعتها اتجننت وفضلت ابص من الشبابيك وطلعت البلكونه وفي الاخر طلع عيل مكلبظ كدا عاوز ياخد فاكهه من الجنينه ومعاه اصحابو
كل ما احكي لحد عالموضوع ده يفضل يضحك عليا وفي البيت يضحكو عليا اتعقدت من الحكايه ديه رغم انها بتخليني اضحك لكن كنت في قمة الرعب واللي يحاول يتخيل شكل الشخص ده هيعرف انو مش هيقدر يمشي اصلا من الرعب
ولا يهمك يا مان كلنا بنمر بمواقف بتخلينا مرعوب بس هيا كوميدية انا مريت بالموقع دة قبل كدة
كنت فى دير السيدة العذراء فى بياض ببنى سويف
وطبعا عشان صيام السيدة العذراء فبنسهر فى الدير
وانا من نوعية الى اطبق يومين فى الدير واروح انام ساعتين وارجع تانى فى ايام الصيام دى
المهم فكرت امشى الساعة 4 الفجر وانا وواحد صحبى اسمه ميشيل واخويا فادى ( انا شادى على فكرة عشان بس ما حدش يتلخبط )
وجينا طبعا الى من بنى سويف يعرف ان بليل الفجر عمر ما تاكسى هيدخل للدير لان الدير مرمى عن الطريق نهائى ومافيش حد بيدخله مواصلات
قلت لصاحبى تعالى نتمشى لحد الكوبرى الشرق ونركب من هناك
وانا طالع لقينا 3 جيرانى اصغر منى بسنتين خايفين يمشه قلتلهم تعالى
بصراحة قلت اعمل عليهم حفلة وارعبهم انا وصحبى ميشيل
فخلعت الحزام وصحبى خلع وقلنالهم كله يخلع الاحزمة لان هنا فى قطاعين طرق وعفاريت وبنحكيلهم وكدة وعدينا من جنب المدافن والعيال خافت
جينا عند مخزن انابيب والدنيا كانت شبورة فجاة نلاقى عمه بيضه ظهرت واختفت فى ثانية
بصراحة انا وميشيل وقفنا فى مكانا لاننا الى كنا فى الاول واخويا وصحابنا ورانا
قالونا فى اية قالهم ولا حاجة عفريت بس ظهر ومشى قاله يلة بينا نجرى ولسه هيجره قلتلهم اثبته مكانكم لو عفريت وعايز يجبنا هيجبنا قاله طيب نعمل اية قلتلهم نمشى والى يحصل يحصل واحنا معانا ربنا واتنين ملايكة المهم مشينا وطبعا العيال مرعوبين موت وانا خايف طبعا :d
المهم نكتشف فى الاخر ان العمة البيضه بتاعت الخفير وهو الى وقف وقعد فجاة
ووبصه بقى كنت انا وميشيل عايزين نقتل الراجل بس مانفعش عشان طبعا هو مالهوش ذنب
وكل ما نفتكر الموقف بنموت من الضحك
اسف انى طولت عليكم
الموقف اللى منسهوش بجد بالرغم انى الحمد لله مبخفش خالص كان يوم خميس من حوالى 3 سنين فى الشتاءو الساعة كانت بعد 2 بالليل و كنا خارجين انا و اتنين صحابى و راجعين على الاوتوستراد من مدينة نصر و قولنا نتعشى عند زيزو نتانة و كنت عايز انزل على صلاح سالم ، جينا عند منشية ناصر كده و قولتلهم انا فاكر زمان ان كان فيه هنا نزلة على صلاح سالم و صحابى مكنوش عارفينها و انا اول مرة ادخل فيها ، و دخلت لقيتها سكة بين المقابر و الله العظيم محدش كان فى الطريق غيرنا و الطريق ملفات غبية جدا و الاقى بعد ملف جامد راجل عجوز ( الله اعلم كان راجل و لآ ايه ) قصير و شعره طوييييل وماسك شومة محترمة وجاى علينا من الجنب و رافع الشومة انا رحت رامى شمال برد فعل غريب و مقلكوش على الذهول و الخضه وكان كل رعبى العربية تعمل حركة نص كم ( كانت ساعتها 128 ) لحد الحمد لله ما طلعنا من الطريق و من يومها و الله ما دخلته تانى و لا حد من صحابى .
اية ياخوانا الرعب دة حرام عليكم انا قاعد لوحدى فى دور كامل :K_crying[1]:
مش عارف احكيلكم اية ولا اية
هحكيلكم الحاجات اللى مش ناسيها خالص
أولا
وانا صغير خالص فى البيت القديم بتاعنا كان عندى حوالى 10 سنين وكنا بنوضب الشقة دهانات وكدة يعنى ومعظم الأوض فاضية والعش ملموم
و كنت لوحدى انا و والدى فى البيت ولما جينا ننام قالى هتخاف تنام لوحدك ولا اية ؟ قلتلة لا عادى
المهم نمت انا فى اوضتى و هوا نام فى اوضتة جوا خالص فى اخر الشقة
وكالعادة طفى نور الصالة و نور اللمبة السهارى الصغيرة خالص دى
يدوب عنيا راحت فى النوم ....
وصحيت على صوت واحد بيكلم واحدة بيقولها اية رأيك نبيت هنا مؤقتا لحد الصبح ونشوف مكان تانى !!! :eee:
انا صحيت مفزووووع انا بخرف ولا اية يا جدعان
جنب باب اوضتى من الداخل كانت المقشة محطوطة روحت ماسكها
ولما بخرج من اوضتى الصالة قدامى و على اليمين بزاوية قائمة كدة باب اوضة تانية لو بصيت وانا خارج من اوضتى يعنى بشوف اللى داخل الأوضة
والله شوفت شبحين سود كدة زى ميكون بنى ادمين واقفين فى الظلام بتبقى شايفهم عبارة عن شبح اسود كدة مش شايف اى تفاصيل
انا عديت جررررى يدوب لمحتهم ودخلت نمت جنب ابويا
قالى مش قلتلك هتخاف ولا اية
انا منطقتشششششش ونمت من سكات معرفش عرفت انام ازاى
المفاجأة بقى بعدها بكام يوم لما والدتى و اختى رجعو البيت وكدة كنا فى الأوضة دى و والدى لاقى اثار ايدين سودا على الحيطان اللى لسة مدهونة جديدة !!!
زى متكون مثلا عملت ايدك فى التراب او فى حاجة مهببة وبعدين سندت على الحيطة فمكان ايدك معلم اسود
والدى اتنرفذ جدا من ان الحيطة اتوسخت لأن لسة حتى مفرناش الشقة
وقال مين اللى عمل كدة ! محدش مننا طبعا
المهم قال خلاص كل واحد هيحط ايدة على مكان الأيد اللى على الحيطة دى ونشوف هيا قد ايد مين
والمفاجأة التانية ان مطلعتش على قد ايد حد مننا !!!!
وسكت باستغراب وعدى الموضوع على كدة
فين بقى بعدها بفترة ابتديت اجمع الأحداث وافتكر شكل اللى كانو واقفين دول كانو واقفين ازاى وافتكرت كمان ان مكان الأيد دى كان واقف شابح منهم ظهرة للحيطة وحاطط ايدة ورا ظهرة وساند على الحيطة !!!
والله يا جماعة بالظبط كدة !! واكتر حاجة مستغربها ازاى انا نسيت المووضوع دة تانى يوم زى ميكون حد لعب فى رامات مخى !!!
الموقف الثانى وكفاية عليكم كدة
احنا لينا قرايب فلاحين و عندنا عزبة وكدة عبارة عن غيط وجنينة برتقال وليمون وبيت قديم كدة قدامة ترعة على طريق ترابى مقطوع ومعزول فى منطقة لوحدة كدة
وزمان مكانش الطريق دة منور كمان
وحدث ولا حرج عن حكايات الرعب اللى بنسمعها من كل الجيل السابق لينا زى خيلانى مثلا و جدتى و والدتى وهكذا
بجد حكايات بشعة توقف شعر الراس
لدرجة اننا لما كنا بنسهر نلعب انا وقريبى فى العزبة دى ونيجى ماشيين كانت بتبقى مأساة وساعات كنا بنضطر نستنى لحد ما الصبح يطلع علشان نمشى
ولو مشينا بالليل كنا بناخد الطريق جرى لحد ما نطلع على الطريق الرئيسى المتسفلت
المهم علشان مطولش عليكم
تخيلو انتو بقى الجو دة
وفى مرة من المرات كان فى حد من قرايببنا بيتجوز وكنا فى العزبة فى البيت اللى بحكيلكم علية دة انا و ولاد خيلانى فقط ومكانش فى حد من الكبار خالص
مش فاكر اية اللى خلانا نسيب الفرح ونروح وكنا لوحدنا هناك ومتجمعين فى الصالة اللى ورا الباب اللى على الطريق على طول ، دور ارضى طبعا وبيت قديم بالطوب النى
وقاعدين بقى كل واحد ربنا يقدرة ويفتكر حكاية رعب يحكيها
تخيلو بقى احنا قاعدين كان عددنا لا يقل عن 7 مثلا على كذا كنبة كدة كلنا فى الصالة دى وكل واحد يفتكر حكاية رعب حصلت فى المكان دة يحكيها
لدرجة ان لو حد كح كنا كلنا بنتخض
ومرة واحدة واحنا فى الحالة دى لاقينا باب أوضة من الأوض عمال يتفتح سنة صغيرة ويقوم مرزوع مقفول لوحدة .. يفتح سنة صغيرة ويقوم مرزوع لوحدة مقفول تانى
شكينا انة هوا
ومرة واحدة لاقينا الباب راح مفتوح شوية حلوين مستحيل يكون الهواء
والله ما ناسى المنظر ..
كل اللى قاعدين بدون ما يبصو يشوفو فى اية راحو قايمين جرى على الباب بتاع الطريق
والجزم والشباشب كلها كانت قدام الباب
واحد منهم اتكعبل وراحو كلهم متكعبلين واقعين فوقية
وانا كنت هموت من الفضول مجرتيش وفضلت باصص على الباب اشوف اية اللى هيحصل
وفجأة
وهما كلهم واقعين متكعبلين على بعض على الأرض
وانا باصص على الباب بتاع الأوضة !!
لاقيت " قطة " صغيرة خارجة من الأوضة ورافعة ديلها وماشية تتمختر ههههههههههههههههههههههههه ههه
انا كل ما بفتكر منظرهم وهما زى الشحوطة و واقعين على بعض فى الباب ومنظر القطة وهيا جاية من الناحية التانية هههههههههههههههههه
وكفاية عليكم كدة .. المواقف كتير بس دول أشدهم الصراحة
ههههههه انا هقول موقف مرعب بس محدش يضحك انا بس اللي اضحك مرة وانا في اولي ابتدائي واخويا ابر مي بسنة وكنا بنروح مع بعض المدرسة وكان في جمبنا جراش كدة واخويا كان بيحب الكلاب الصغيرة وكان عايز يجيب واحد البيت بس طبعا مكش ينفع فهوة بقي كل يوم الصبح ابل المدرسة يروح عند الجراش دة ويلعب مع كلاب صغيرة هناك ومكنش بيفكر ان اكيد بدل في كلاب صغيرة يبقي في ابوهم وامهم اللي جابوهم وفي يوم وهوة بيلعب معاهم وانا واقف بعيد ولقيت اسد ههههه اصدي كلب بس اصله كبير اوي وبشعر كتير شبه الاسد فعلا وقام هوب جري هاو هاو هاوهاوتين اخويا وقع في الارض مربع من الخضة ولاني انا شجاع جدا وانسان الغاب طويل الناب قمت شوفت المنظر دة قمت جريت جري لحد المدرسة وسبت اخويا وفي الفسحة ببص لقيته بيلعب قلتله اية دة انت الكلب ماكالكش قاللي لا قلت لنفسي يااااه دة انا طلعت شجاع اوي هههههه
من أكتر المواقف المرعبة فعلاً فى حياتى أنى كنت شغال من حوالى 7 سنوات فى شركة السلام للنقل البحرى و كنت على عبارة أسمها فخر السلام و كان فيه نوه بتيجى أسبوع واحد فى السنه فى البحر الأحمر و فجأة و أحنا فى الطريق لجده لقبنا أنذار معين معناه فى حد وقع فى البحر و جرينا كلنا كطاقم العبارة على السطح و كان الموج عالى فعلاً و ندور على الراكبة اللى وقعت مفيش أى أثر ليها خالص فالقبطان أمر ضابط بحرى وبعض البحرية من النزول فى البحر بقارب نجاة صغير فى وسط الظلام و الموج العالى ليبحثوا عنها وكان الضابط ده من أعز أصدقائى و بكيت فعلاً من الخوف عليه وبعد ساعة طلعناهم وطبهاً الست مظهرتش و لكن ربتا ستر الحمد لله و عدت لكن حصل مفاجأة الموتور بتاع العبارة قفش لنها كانت قديمة و أنتظرنا حوالى ساعتين فى رعب حتى تم الأصلاح . و ربنا يرحم أصدقائى اللى ماتوا فى السلام 98 .
انا بقى الحمد لله عشت نفس تجربة السفينة السلام 98
واتكرر معايا الموقف دة مرتين!وغصب عنك حتى لو قلبك جامد لازم تتهز من وجوه الناس المعاك المستنية الموت والغرق فى اى لحظة!!
بس الحمد لله بعد ما بتعدى الأزمة الواحد بيستفاد!!
http://www.postimage.org/Pq2HBOV0.jpg
ياة ايه الرعب دا انا بردوا حصلي كام موقف مرعبين هحكي الي انا فاكرو .
في مرة كنت مع اتنين صحابي وكنت الساعة 2 بليل وطلبت معانا نطلع المقطم المهم كان معايا حبيبة قلبي 128 وانا ساكن في مدينة نصر فبنطلع المقطم من طريق المقابر المهم واحنا ماشيين ومعليين الكاسيت ومبسطوين وكلو تمام وكنا منورين نور الصالون الي هوا في القايم وبعدين مرة واحدة واحنا في نص المقابر كدا النور طفى لوحدة واحنا اترعبنا وطفينا الكاسيت وشغلنا قران وكملنا لحد المقطم وقعدنا فوق شوية وبعدين واحنا راجعين في نفس المكان اللمبة نورت تاني لوحدها وكنا هنموت من الرعب .
طبعا انا مش بؤمن بالحجات دي يعني ممكن نكون خدنا مطب هوا الي عمل كدا يعني بس في ساعتها الواحد بيكون مرعوب جدا .
ايه خلاص مفيش اي مواقف تاني و لا ايه
انا بردو في موقف رعب تاني حصلي .
احنا اصلا من الارياف من المنوفية وبنسافر علطول في الاعياد وكدا والبيت في البلد بيت كبير واكتر من دور وجنينة وشجر وحاجة زي الافلام كدا ومقفول طبعا بيتفتح مرات قليلة في السنة المهم في مرة كنا هنسافر ولازم حد ينزل يفتح البيت علشان البنت الي هتنضفوا يكون حد معاها المهم انا اتبرعت ونزلت وبعدين خلصت تنضيف وكلمت صحابي طبعا وقضيناه لحد الساعة 3 بليل وصحابي قالولي انهم خلاص هيروحو هما وانا قلت خلاص مش مشكلة المهم نزلت معاهم وقفلت وراهم وطلعت الدور التاني ونمت على السرير كدا بس حسيت حاجة غريبة .
حسيت ان انا خايف مع ان انا مسمعتش اي صوت ولا اي حاجة بس احساسي ان انا قاعد لوحدي كان كافي اني كلمت صحابي وقلتلهم ارجعوا بسرعة طبعا هما قلقوا عليا ورجعوا بسرعة وقعدوا يسألوني حصل اية وانا اقولهم محصلش حاجة بس انا خايف وبس وطبعا قعدوا معايا لحد الصبح .
وفي كمان موقف بس انا في الشغل دلوقتي لما ارجع هقولكو علية إن شاء الله .