مطلوب من أهل الخبرة فى الرادياتيرات

**shenz_76** · 19-02-2009 11:45 AM

بعد ما وجهتنى مشكلة فى أن مياة الرادياتير بتنقص بسرعة وبعد ما عرفت بعض المعلومات المفيدة من خلال هذا المنتدى الأكثر من رائع
قمت بزيارة الميكانيكى المختص بسيارتى وهى سوبر فيورا أو نصر 127 والذى قام بعمل الأصلاحات اللازمة فى وش السلندر وتغيير الجوانات لأن كان هناك تسريب مياه مما نتج عنه تعطيل أحد البوجيهات وصدور دخان أبيض من الجاكمان.
الحمد لله المشكلة أنتهت بس فى دلوقتى مشكلة تانية محيرانى وهى أنى حبيت أغسل الرادياتير بالمرة فالمتخصص فى الرادياتير قالى أنه مش هيقدر يعمل أى حاجة فى الرادياتير بتاعى لأنه صدا جامد مع العلم أن الرادياتير تم شراؤه استعمال من حوالى 10 شهور وهو ألومنيوم.
فهل ده الطبيعى أنه يوصل للدرجة دى بعد الفترة دى؟
ولا علشان أنا مش حاطط من الأول مياة رادياتير ( المية الخضرا) زى ما أحد الأصدقاء ما قالى وأن المشكلة دى بتحصل بسبب مياة الحنفية.
ولا علشان أنا أستعملت رادياتير ألومنيوم مش نحاس زى ما متخصص الرادياتير ما قالى واللى بينصحنى بضرورة تغيير الرادياتير فورا بواحد تانى نحاس.
أرجو الإفادة ولكم جزيل الشكر

**shoudy2005** · 19-02-2009 01:11 PM

انا بالنسبالى الألومنيوم افضل علشان بيتخلص من الحرارة بسهولة بس محتاج رعاية خاصة يعنى مفروض ميتحطش فيه ميه حنفيه خط مياه خضراء فقط و لو هتزود هات ميه مقطرة و كمان لازم تعرف ان الألومنيوم مينفعش فيه لحام يعنى لاقدر الله لو اتخبط و اتحرم يبقى يترمى على طول لكن النحاس بيتلحم لكن الألومنيوم بيتخلص من الحرارة بسرعة رهيبة

**shenz_76** · 19-02-2009 02:14 PM

شكرا على الإفادة

**lord23** · 19-02-2009 04:08 PM

الردياتير الالمونيم افضل طبعا
بس يكون نفس عدد المواسير او اكبر

**aYaBooY** · 20-02-2009 06:02 PM

الطبيعي الالومنيوم افضل بمراحل بس بالنسبة لل 127 النحاس هو الكويس علشان العربية قديمة و صعب انك تشتريلها مياة كمان هات واحد نحاس استيراد و حط مياة من الحنفية علشان مصاريف الالومنيوم هتلاقيها كتير اوي

**zeyad1810** · 20-02-2009 09:08 PM

طالما اشتريتة مستعمل يبقى عادى انة ممكن يبوظ فى اى وقت لانك ماتعرفش هو اششتغل اد اية قبل كدة
نصيحة هات جديد احسن 100 مرة

**shenz_76** · 21-02-2009 02:06 PM

أشكركم جميعا على تعاونكم معى فى حل مشكلتى ولكن حتى الأن بعض الردود منحازة للآلومينيوم والبعض الأخر ينحاز للنحاس، فما هو الرد الفيصل والنهائى.
مع العلم بأنى عندما عرضت مشكلتى على أحد الجيران وهو صاحب ورشة ميكانيكة أخبرنى بأن النحاس أفضل بكثير بالنسبة لجو مصر أما الألومينيوم فهو مناسب أكثر لجو دول الخارج لبرودة الجو عندهم بخلاف الحال هنا فى مصر.
وأضاف أنه يجب التأكد تماما بأنى قبل أن أخطو تلك الخطوة (وهى شراء رادياتير جديد) بجب التأكد أولا بأن الرادياتير فعلا يستحق التغيير لأن قدم الرادياتير وعدم جدوى غسله أو تنظيفه هى الأجابة الفورية لمعظم من يعملون فى غسل الرادياتيرات لتكون المنفعة أكبر لهم عند شرائى لرادياتير جديد.
وهنا وجدت مشكلة جديدة وهى كبف يمكن التأكد من سلامة الرادياتير وما هى الأعطال التى يمكن تواجدها به وهل هناك من أثق به للكشف على سلامة الرادياتير مع العلم بأنى أعيش بالإسكندرية ؟؟؟!!
وشكرا على مجهودكم

**mrghost** · 21-02-2009 02:21 PM

خلاص روح لواحد تانى بتاع ردياتير وشوف هيقولك ايه ولو تقدر روح لكذا واحد مش واحد بس وربنا يوفقك

**maka** · 21-02-2009 03:12 PM

المشاركة الأصلية كتبت بواسطة mrghost

خلاص روح لواحد تانى بتاع ردياتير وشوف هيقولك ايه ولو تقدر روح لكذا واحد مش واحد بس وربنا يوفقك

+111111111

وعلى فكرة معامل التبريد الحرارى للنحاس اعلى من الالمونيوم

وانت اعرض الردياتير على كذا واحد لو اجمعوا انه مينفعش اشترى

جديد نحاس زى اللى كان راكب فابريقة