الموتور بيبخر زيت من خرطوم غطاء التكيهات

**hazem_khidr** · 28-08-2007 10:28 PM

المشكله الاولي بتاع الزيت دا يا اما عندك شنبر و دا يخلي الخرطوم دا يطلع بخار زيت و البخار ساعات بيترسب في الخرطوم و ينزل علي شكل نقط او تلاقي الخرطوم مزيت و كون ان العربيه العادم بتاعها حلو مش بيدخن دا مش فيصل لون العادم بيرجع لظبطه العربيه(انا كان معايا زمان 125 موتورها مفوت و العربيه كانت بتعرق من الشكمان!!!)
يا اما زي ما استاذ اسلام قالك جوان وش السلندر او ان وش السلندر مش متربط كويس و مساميره مهويه.

بالنسبه للمشكله التانيه انا مش قادر افهمها كويس لكن اي عربيه حتخش بيها في ميه او زيت لازم حتبقي عايمه منك دا طبيعي و خصوصا لو زيت او شتا خفيف يدوب بيجي علي التراب و يخليه طين. لو العربيه بتعمل كده في العادي يبقي عندك المقصات فيها حاجه

**sab3aawy** · 29-08-2007 12:52 AM

1-الموتور بيبخر زيت دى ببساطة معناها ان الخلوص بين الشنبر والشميز وسع فكبس الهواء بيهرب الى غرفة الكرنك ويضغط على الزيت فيتبخر من خرطوم الفايض، وده معناه ببساطة انك محتاج تفتح الموتور وتغيرله طقم شنبر لو كان الشميز سليم، لو مش سليم هتحتاج تخرط الشميز وتغير البساتم بأوسع، لو معندكش وقت حاليا او مش عايز تصرف على العربية فى الوقت الحالى ممكن تمشى بيها كدة بدون اى مشاكل، فقط تابع منسوب الزيت فى المحرك وزوده اذا لزم، واذا لاحظت ان لمبة الزيت بترعش فى السلانسيه او او الزيت بينقص اكثر من نصف كيلوجرام لكل 1000 كيلومتر استعمل زيت ثقيل ، درجة 50 (مثل زيت شل x100) اوذا استمر النقصان مع الزيت الثقيل استعمل إضافة منع الدخنة(زيت شنبر) مع الزيت الثقيل

2- عومان العربية سببه إما ان الزوايا مش مظبوطة او ان هناك شئ مش مربوط فى العفشة(كاوتش ميزان، كاوتش مقص الخ) او ان المقصات انتهى عمرها الإفتراضى او ان علبة الديريكسيون مبوشة

**S H @ F T** · 30-08-2007 03:24 AM

با جدعان انتوا ليه بتفترضوا الأسوأ
ماهو ممكن يكون زيت زيادة مش أكتر
فبل ما نقول طقم شنبر أو عمرة نسأل الراجل مستوى الزيت عامل ايه؟
لو كان زبادة يبقى هو ده السبب ببساطة
لو كان ناقص يبقى الكلام اللي فوق ده

**ahmed1981** · 30-08-2007 01:52 PM

المشاركة الأصلية كتبت بواسطة S H @ F T

با جدعان انتوا ليه بتفترضوا الأسوأ
ماهو ممكن يكون زيت زيادة مش أكتر
فبل ما نقول طقم شنبر أو عمرة نسأل الراجل مستوى الزيت عامل ايه؟
لو كان زبادة يبقى هو ده السبب ببساطة
لو كان ناقص يبقى الكلام اللي فوق ده

لو البخر من خرطوم الفايظ (خرطوم غطاء التكيهات ) كإنه دخان عادم يعني عامل زي الهواء اللي بيخرج من الشكمان (يبقى زي ما قال البشمهندس سبعاوي الخلوص وسع والعادم بيخرج على داخل الموتور)
لو البخر ده عامل زي بخار الزيت ما فيهوش ريحة الشكمان أو ريحة الإحتراق ممكن يكون زيت زيادة لكن كمية البخار مش هتبقى كبيرة
بالنسبة للعومان روح لدرش ولو عربيتك عايزة حاجة غير الضبط هو هيقلك بعد ما يكشف

**shoayman** · 31-08-2007 05:10 AM

شكرااا جدا جدا اا يجماعة ليكم على المعلومات دة وعلى اهتمامكم
بس بنسبة للمشكلة لاوله انا لسه مغير جوان وش سلندر من كام شهر مش كتير
فهل ممكن يكون الميكانيكى مقفلش المسامير كويس
بس العربية عملة معايا الموضوع دة من اسبوعين تقريبا وانا لاحظة ان الزيت يعنى نقص شوية ومكان الخرطوم بيعرق زيت على الموتوركائنة منقط انا افتكرت حاجة زمان ايام كنت مركب الخرطوم فى مكانة الطبيعى (فى العمة)كنت بلقى زيت على فلتر الهوا لما اجى انظفة ...بس انا ذى مالاستاذ سبعاوى بيقول مش عايز افتح على نفسى فتحة.... وعاوزاعرف رايكم فى موضوع السائل الى بيضاف على الموتور مؤقت بدل العمرة اكيد عرفينة؟؟؟؟
اما بنسبة للموضوع التانى انا لسة مجددو مغير معظم اجزاء العفشة بس العربية مش طبيعية .... بس انا شكك فى حاجة وعاوز رايكم انا شاكك انة ممكن يكون الدونجل الخلفى فى حاجة اصل انا معنديش مقصات ورة ذى 128 كدة

**Adham** · 08-09-2007 10:58 PM

قبل مانقول ان الموتور مفوت انصحك تغير زيت الموتور الاول لان لو الزيت قديم و قطع و خف حايعمل شوية دخان ازرق برضة
فأنت الاضمن تغير الزيت لو كان قديم قوي يعني ماشي علية فوق ال 2000 كيلو لو زيت سوبر او فوق ال 1200 كيلو لو زيت عادة و بعدين قوللنا لو كانت الدخنة منعت و للا لأ

ولو مامنعتش ممكن تستعمل نوع من اضافات الزيوت بيربي شربون عالشنابر و الصبابات و يملأ التآكل و بالتالي يمنع الدخنة و يزود الكبس او زيت زي الريستورر علبتين بعد غيار الزيت و العربية سخنة و حاتشوف بعد 1500 كيلو الموتور حايبقى مختلف تماما

لأن عمرةموتور الجولف ال 1800 بتتكلف كتير قوي و يفضل ساعتها تنزل تجيب موتور استيراد

**shoayman** · 10-09-2007 02:54 AM

aشكرا جدااااا يا استاذ ادهم بس ياريت تقولى اجيب زيت الشنابر دة منين ؟؟؟
وحطة كام مرة؟؟
وسعرة ؟؟
شكراا

**Adham** · 10-09-2007 01:12 PM

غير الزيت الاول عادي جدا في محطة البنزين و شوف ان كان التبخير حايمنع و للا لأ و غير فلتر الزيت كمان و شوف و لو التبخير مامنعش ولا ماقلش انزل التوفيقية اشتري ريستورر ب 90 جنية العلبة على ما اذكر من 12 شارع ذكي
و بعدين دور العربية تسخن لمدة ربع ساعه و يكون الزيت جديد و بعدين بطل الموتور و زود علبة الريستورر و دور العربية تاني لمدة ربع ساعه عالواقف

و خدها مشوار و استعملها عادي و بعد 1500 كيلو عيد نفس الخطوات بعلبة الريستورر التانية برضة والعربية متسخنة كويس و حاتلاقي موتورها بقى زي الفل و لا عمرة و لا دياولو

تحياتي