سؤال عن أسعار قطع غيار السيريون

**abohalmos** · 23-02-2009 01:26 PM

يا جماعة ...ممكن حد يقولنا اسعر قطع غيار السيريون الآن فى 2009 لانه الموضوع المنشور على المنتدى بخصوص اسعار قطع الغيار 2007 .عشان بس الواحد يبقى عارف الاسعار. علما بانى من المعجبين اوى بالسيارة دى بس مستنى شوية منها الاسعار يمكن تنزل ( بينى و بينكم انا شاكك فى ده لان الين مابينزلشى ابدا:K_crying[1]: ) و منها اكون حوشت مقدم حلو للعربية ان شاء الله .

اخر الاخبار:
الزمالك يبدا فى جمع معلومات عن نبروه و سكر الحوامدية ...استعدادا لدورى الدرجة الثانية .:POINTI~2[2]:

**معاذ الشرباصى** · 23-02-2009 03:48 PM

حضرتك صعب الواحد يعمل حصر لقطع غيار العربية بالكامل

حضرتك تابع موضوع قطع الغيار اخر صفحات فيه

و ممكن تتصل تسأل على بعض اسعار قطع الغيار على الرقم ده 16168

كل واحد من ملاك الدايهاتسو لما بيبقى عنده جديد بخصوص اى قطعة غيار, بيكتبه على طول

**osama_alam** · 23-02-2009 05:37 PM

انا اللي اعرفه سعر المرايه الكهرباء حوالي 600 جنيه

**rzeiny** · 24-02-2009 03:51 PM

انا معايا سيريون مانيوال 2009 واتخبطت في الرفرف الخلفي مع حكة في الاكصدام روحت التوكيل قالولي الرفرف ب 2000 +800رش +300 تركيب +100 سروجي +950 اصدام غير الرش

**abohalmos** · 24-02-2009 10:54 PM

ياه ..معقولة دى .....دا انت كده دخلت فى 4 الاف جنيه....معقولة دى خبطة بس.....؟؟؟
مش معقول ....الرقم ده غريب اوى ...
يا ترى ايه راى السادة ملاك السيريون..و بالذات الناس الخبرة زى ابو عبد الله و د/ معاذ....

**أبو عبدالله** · 24-02-2009 11:05 PM

يا اخوانا اي شغل في التوكيلات بيبقى له مقاييس معينه ولهم ضوابط ماشيين عليها
التوكيل مش زي الصنايعي اللي بره بيفك ويركب وزي ما تيجي

انا والله مره اقعدت اتفرج على السمكري في التوكيل مره كان بيعمل عربيه شاريد عامله حادثة كان ماسي مسطرة حديد بتقيس بالمللي

والرش نفس الموضوع
اوعى حد يفتكر ان الرش داخل التوكيل المحترم بيبقى زي بره انا عن تجربة لا
مش زي اللي بره بالمره
ولو حبيت تعمل زيه بره هتدفع نفس الثمن ويمكن اكتر كمان

ما اخواني شغل التوكيل غير بره خالص

اولا الرفرف الخلفي ده معناه ان حضرتك هيتقص في البودي بتاع العربيه لأنه مش قطعه لوحدها

وفي شغل كبير قوي هيتعمل في الموضوع ده
انا شوفتهم مره وهما بيعملوا رفرف خلفي لماتيريا

بصراحه فيلم كبير ومش هتصدق قيمة الموضوع الا لما تتفرج بنفسك على اللي بيحصل هناك وانت تعرف الشغل ده زي بره ولا لأ

**abohalmos** · 25-02-2009 11:42 AM

جزالك الله خيرا على التوضيح يا ابو عبد الله.
بس السؤال اللى انا عاوز اساله : هوا كده الخبطة دى كانت بسيطة و لا حادثة كبيرة ... يعنى حد خبطك من ورا جامد و كده...؟؟؟
عشان غرضى اعرف ...مبلغ زى ده هاتدفعه فى خبطة جامدة تستاهل يعنى ؟؟؟؟؟؟
و لا اى خبطة هاتكلف كده ؟؟؟؟
بس اللى انا حسيته انها حاجة جامدة ...بدليل انك هاتغير الاكصدام و لا ايه ؟؟؟؟؟؟؟

قف للمعلم و انت ماشى .......كاد المعلم ان يكون غباشى

**rzeiny** · 25-02-2009 02:15 PM

بصراحة ياجماعة الخبطة صغيرة اوي على المبلغ ده وانا ناوي اجي إن شاء الله المقابلة القادمة علشان تشوفوها وتحكموا بنفسكم ولكم ان تتخيلوا ان ثمن الدلاية وحدها 260 جنيه والخبطة عبارة عن فعصة فوق الرفرف الخلفي مع حكة في الاكصدام وقالولي ممكن نحاول سمكرتها ب1000 جنيه لكن الاكصدام لازم يتغير علشان الكلبسات طلعت من مكانها

**MoToRiZeR** · 25-02-2009 08:07 PM

أستاذ rzeiny
الإكصدام مش بيتغير إلا في حالات معينة زي إذا حصل فيه قطع مثلاَ أو حاجة و باظ خالص .. إنما لوعالكلبسات بس فا ممكن تشتري كلبسات و حامل إكصدام (ثمنه 90 جنيه تقريبا) من التوكيل و ترده و هو مرن جداَ علي فكرة .. و تركبه كويس .

بس فعلاَ فيه حاجات صغيرة مبالغ أوي في سعرها زي الكارتيرة و الدلاية .