الموضوع: ظبط كمبيوتر السيارة

ظبط كومبيوتر السعربيات مابيحصلش ف التوكيل الا اذا حصل مشكلة في العربية وهينزلوا لك نفس السوفتوير بتاع الشركة
عاوز تعديلات رياضية بقى وحرق على الغيارات وشغل من الكلام ده أكيد طبعا برة التوكيل وللاسف ماشفتش في مصر ولا واحد بيعمل الكلام ده مش عارف ليه انما في السعودية ماشاء الله الفلبينيين هناك شغالين في الموضوع ده زي الحلاوة
اخر مرة كنت هناك أخدت فكرة جامدة جدا الحمد لله وان شاء الله السنة دي هكمل المشوار ده وطبعا الحمد لله جبت كل الادوات اللازمة للموضوع ده بس فاضل لي تجربة ان شاء الله
والسنة دي هحاول اشتري كومبيوتر هوندا من أي عربية عاملة حادثه هناك ( من التشليح ) لو حد يعرف التشليح ( العربيات اللي بتكون عاملة حادثة وتتباع خردة زي الحرفيين كده عندنا بس على كبير )
وان شاء الله تنجح التجربة دي

بس بصراحة انا شفت هناك هوندا Sir هاتشباك معدل الكومبيوتر بتاعها ومركب فلتر وبوجيهات وبس واقسم بالله العربية طياااااااارة
وماتقلقش مافيش خطورة على الكومبيوتر لو تم التعديل بطريقة صحيحة كل التأثير السلبي ان كل حاجة في عربيتك عمرها الافتراضي هيقل بس هتشوف اداء هيعجبك

ماهو المشكلة انى كلمت التوكيل بس كان بتاع قطع الغيار وقالى الsir مانزلتش تبع التوكيل فامش هنقبلها لانها بتتجاب من برة واحنا مش بنتعامل مع العربيات اللى بتيجى من برة فقولتلة على كدة لو واحد نزل بهوندا mugen اللى هى الطراز الاحدث من مواتير type r مش هاتقبلوها قالى اة بس قالى بردة اسال مركز الصيانة فى التجمع الخامس وممكن يكون عندهم سوفت بتاع مواتير الsir بس بردة انا عايز اعرف اية الحاجات اللى ممكن الكمبيوتر بتظبط فيها وهيظبطها ازاى
مثلا ممكن يعلى المكنة او يوطها فى الصوت يزودلها السحب او يخنقها شوية يعملها انها تقبل بنزين اقل من البنزين بتاعها يظبط التكيف من عن طريقة يعنى مثلا اول لما تشغل التكيف يخلى الاربى ام يعلى شوية عن المعدل الطبيعى.هل ممكن يلعب فى الحاجات دية ولا اية بالظبط ياريت لو حد من الاعضاء جرب الموضوع دة يقول وبردة هيبقى تقريبا موضوع جديد فى المنتدى وماتناقش قبل كدة وعلى فكرة انا عايز اعرفة للعلم لان واحد قالى المفروض انك بتعمل تحديث للسوفت بتاع الكمبيوتر حوالى كل 50 الف كيلو عشان يظبط استهلاك البنزين وصوت الماتور والحاجات دية فكنت عايز اعرف اية الموضوع دة لان بردة واحد صاحبى كان معاة افيو 2007 كان بيوديها التوكيل فى مواعيد الصيانى بتاعتها وكان بيخليهم يعيدوا برمجة الكمبيوتر وبيقول بيحس ان العربية فاقت عن الاول

هو انت اتصلت بمركز خدمة مين ؟؟ ماهو مافيش غير بتاع التجمع الخامس !!

يا استاذنا ده حال كل التوكيلات اللي في مصر يعني لو قلت حتى لمهندسين الصيانة نفسهم اللي هما مهندسين ايه نوع ماتوري مثلا لو قلت له R16 ولا اي حاجه و لو قلت له الجير بتاعي نوعه كذا يقولك ما اعرفش يعني ولا يعرفوا اي حاجة تقنية عن العربيات اللي بيشتغلوا فيها غير انه بيعرف يكتب ال Job ويسجل ان العربية دخلت على الكومبيوتر ويثبت الزبون بتاعهم وخلاص

من الاخر ما عتقدش ان التوكيل هيفيدك في الموضوع ده اما عن موضوع برمجة السيارة داخل التوكيل فهما كل اللي بيعملوه بينزلوا البرنامج بتاعها تاني وبدون تعديلات يعني بنفس نسب ال Fuel & air وبدون تغيير

بالنسبة للبرمجة أو التعديل TUNNING على برنامج العربية الاساسي فده بيعدل نسب الهواء والبنزين بحيث تكون مناسبة يعني لو زودت الهواء لازم تزود بنزين
- بيخليك تتحكم في وقت اشعال الشرارة اللي طالعة من البوجيهات مع ارتفاع البستم
- ممكن تتحكم في اللود اللي على الموتور وتضبط الاربي ام وتظبط نقلات الفتيس لو اوتو ولو مانيوال ممكن تفتح ال Rev Limiter وتدخل في ال RED ZONE
- وحاجات كتير ممكن ان شاء الله اعمل موضوع عن اللي اتعلمته كله هنا بس اجهز كل حاجة واحطها ان شاء الله

تمااام روح برضه التجمع الخامس وشوف هيقولو لك ايه بس انا متوقع الرد من دلوقتي

و انا تحت أمرك وعلى فكرة انا اول عربية شفتها بتتعدل وحضرت تعديلها خطوة بخطوة وتركيب تيربو عليها كانت SIR هاتشباك بس في السعودية وعندي معلومات كويسة عن الكومبيوتر بتاعها هي والبريليود اللي فيها ماكينة H22a
انا نفسي فعلا اجرب ال SIR دي وان شاء الله أول لما اظبط نفسي واتأكد من معلوماتي هيكون في مشروع تعديل وان شاء الله قريب جدا