الموضوع: بروتون جيـن 2 .. بروتون بـرسـونــا

مع احترامي لكلامك أخي الكريم ، انا الي انا شايفه من الإخوة الأفاضل ان معظم رواد البروتون عموما والجين والبيرسونا حسب معرفتي لأكثر من واحد منهم حاجة من اتنين ....إما أول مرة يركبوا عربيات أو كانوا راكبيين عربيات ماركة 128وشاهيين وكده، وده طبعا مش تقليل منهم ، ولكن ده واقع انا شايفة وباين كمان من مشاركات ناس كتير هنا، وده بيدل على عدم الخبرة الي أكيد هتيجي للناس كلهم مع الوقت زي ما جت لنا، وبصراحة انا شايف انك لازم تتكلم كده لأن عندك بروتونن وعلى فكرة احنا عندنا بروتون بس مش بتاعتي انا.

المهم ان احنا هنا على الموقع المفروض بندي صورة واقعية عن السيارة الي بنتكلم عليها ، علشان مش علشان احنا اشترينا حاجة يبقى الحاجة دي لازم تكون أحسن حاجة في الدنيا.
وبعدين انا ركبت البيرسونا ، وكمان الحمد لله ركبت عدد سيارات خاصة كتير لأني أصلا كنا تجار سيارات ، وقبل كده كنت عايش في الخليج وكنت بركب كل سنة عربية زيرو تقريبا ، وعارف كويس يعني ايه امريكاني وياباني وكوري وألماني......

آخر حاجة سعر اعادة البيع للبروتون واقع جدا وده الناس كلها عارفاه ، لكن الحاجة الأهم من كل ده ان العيوب الي انتم بتتكلموا فيها دي مش حاجات سهلة ، خبط في علبة الدريكسيون ، المطبات كلها في ظهرك ، الموتور الي بيسقف ، عيوب التقفيل ، أصوات العفشة والشنطة الي لازم تعملها بشيكرتون؟
وكأنكن بتتكلم على عيوب بسيطة؟ وبنحاول نغمض عنينا على كل العيوب دي وبنقول بس مع كل ذلك ثباتها حلو؟ متقولش احنا بنطير بالعربيات؟
احنا بنتكلم للناس كلها يبقى لازم نتكلم بموضوعية ، دي عيوب جامدة جدا ومش ممكن تلاقيها في عربية تانية ، يعني مثلا الانسر والصني والكورولا والمازدا3مش ممكن تلاقي فيها عيب واحد من الي انت بتقوله.
انا نفسي نبقى موضوعينن ونقول ان البروتون مستقبل شركة كبيرة ولكنها لازالت في مرحلة الخطوات الأولى ، وانا عن نفسي شايف انها هتبقى حاجة جامدة وممكن توصل لمكانة هيونداي الي بدأت بعربيات تعبانه برضو زي البوني والهيونداي استلر ثم الإكسل ثم الأكسنت وبعد كده جت الالنترا والسوناتا قبلها وبدا الانفتاح الجامد الي احنا شايفيينه في الهيونداي، لكن البروتون لسه بدري شويه قدامها كمان10سنين على الأقل علشان تبقى اسم يوثق فيه ويعتمد عليه وساعتها مش هتلاقوا عربية لا بتسقف ولا بتخبط ولا بتزيق وهي زيرو.
انا عارف اني لما اكتب كده في موقع محبين بروتون لازم كلامي يزعل ناس، بس انا بكتب الي انا شايفه حق علشان لو في حد عاوز يكون رأي كويس عن البروتن يدخل ويشوف كلامنا ويحط ايده على العيوب ، لكن الي معاه بروتون انا شخصيا قلبي معاه وعارف هو حاسس بإيه وفي منهم الي قالي ولمحلي بأنه كان شايف انه كان في اختيارات تانية لو كان اختارها كانت بقت أفضل من كده .
ولكن عامة ده قدر ونصيب ، ومحدش يزعل مني ، وان كنت متأكد انه مفيش حد معاه بروتون يحب يسمع الكلام ده .
ولكن قديـــــما قالوا: قـــــل الحــــــق ....... ولو كـــــــــان مــــــــراً

عفشة الجين 2 الناشفة تقدر تشبها بالشاهين أو النيو أكسنت الجديدة أو الفيات البونتو

حاجة أخيره....
انت بتقول عاوزيين كلام يخش العقل....ممتــــاز
طيب بالله عليك يا راجل يا طيب...عفشة الجين2زي الشاهين!!!هو في حد في الدنيا بيقارن بالشاهين؟؟مع ان طبعا عفشة الشاهين مش زي البروتون خاااالص،وكمان الأكسنت!!!!!والبونتو!!!!!!عفشة الأكسنت والبونتو زي الجين2و البيرسونا؟؟!!؟؟لا تعليييييييييق.

صديقي العزيز ، انا مش برد على الي على مزاجي واسيب الي على مزاجي
وبعدين انا معظم الأوالشكاوى نقلتها بناء على حاجتين ل هو شكاوى الناس الي هنا في المنتدى ، مش انا الي بقول انها بتخبط في الدريكسيون وبتسقف في المطالع وبتزيق في العفشة وناشفه وبتخبط في الظهر ، أعضاء المنتدى ده همه الي بيقولوا!! سبحان الله انت بتنكر كلام الناس الي موجود هنا على المنتدى وبتقول محصلش؟؟ يعني انت بتنكر العيوب دي؟؟.
بصراحة شكلك مش متابع المنتدى او انك بتقرا الكلام بعصبية ومش بتركز شوية
انا معظم الحاجت دي جبتها اقتباس وواضحه للناس وممكن تراجع الي انا كتبته هتلاقيها اقتباس بس انت مخدتش بالك
وفي حاجات قلتها عن تجربتي لما ركيبت البروتون بنفسي ورحت بيها وسط البلد ورجعت نزلت منها جسمي مكسر ومهدود بالفعل .
فانا مبتكلمش عن حاجة سمعتها من بعيد لأ انا بتكلم عن تجربتي وتجربة الاخوة الباقيين في المنتدى ، وغريبة قوي حكاية ان المشاكل الي همه بيقولها ناتجة عن عدم خبرتهم ، فبتبان كبيرة...

انا معاك أن أغلب مُلاك الجين 2 شباب صغير أول مرة يركب عربيات و ده بيخلي خبرتهم قليلة و يشتكوا من حاجات مش عيوب و لما بيتكلموا عليها على الانترنت بتظهر و كأنها عيوب .

ممكن حضرتك تقولي ايه عدم الخبرة الي عندهم علشان تبقى العفشة الناشفه وعلبة الدريكسيون وتزييق الكنب والعفشه الموتور الي بيسقف في عربيات زيروو حاجة بسيطة!!؟
دي حاجات ملهاش علاقة بالخبرة ولا صغر السن.

وواضح انك بتتكلم بصوت الشركة الي بتحاول تسطح من كل حاجة زي الأخ الي راح التوكيل قالوله صوتها عالي وبتسقف علشان البنزين الي بتحطه وحش؟؟وهو بيحط92!!؟
وصدقني كلامك يفتقد لأبسط بديهيات الخبرة أو الحياد في السيارات لما تقول ان عفشة الأكسنت زي عفشة الجين2!!!حراااااااام والله

أما موضوع ان في عربيات تانية كمان سعرها بينزل جامد وده لما حضرتك قلت :

موضوع وقوع سعر البيع ..... قولي أيه رأيك في سعر بيع السوباورا .... و الهوندا ..... الرينو و السيتروين ؟؟؟ بما أنك تاجر سيارات !!

أولا حضرتك بتتكلم عن عربيات ليست من نفس فئة البروتون
ثانيا انا معاك ان السوبارو سعرها بينزل كتير لكن الهوندا لأ طبعا وممكن تدخل على كونتكت أو كار100100وانت تعرف بنفسك ان الهوندا سعرها مش بينزل زي ما انت متخيل ، علشان في حاجة انت مش واخد بالك منها وهي فروق السعر!!
الهوندا السيفيك مثلاً بـ150ألف بعد سنتين استخدام بتبقى مثلاً بـ 135ألف يعني نزلت حوالي من 15-لـ20ألف
والبروتون مثلا بتسعين ألف وبعد سنتين استخدام بقت من55ألف لـ60ألف!!!!
وممن تدخلوا على (contactcars.com)أو (car100100.com) وتشوف الأسعار دي بنفسك .
يعني البروتون نزلت في سنتين من 30 لـ35ألف في سنتين
طبعا لازم تاخد بالك البروتون نزلت حوالي 30ألف من 90ألف
وطبعا واخد بالك ان الهوندا نزلت 20 ألف من 150 ألف!!! ممكن تحسيبلي النسبة المئوية لهبوط كل واحدة منهم؟؟
أصل لازم الزيرو ترخص لما تستعمل ، بس الفكرة هي نزلت كام في الميه من سعرها؟؟!!مش كده ولا ايه؟؟
يعني انت بتقول ان البي إم بتنزل40ألف
أولا ده مش صحيح ثانيا نزلت على كلامك 40 ألف بعد 3 أو 4 سنين طبعا من أصل ثمنها الي هوه حوالي450ألف ، يبقى نزلت كام في الميه!!؟؟


بس مع احترامي لو حضرتك سوقت الهوندا السيفيك الجديدة مش هتحط رجلك في البروتون تاني ، وانا مثلا لما سوقت السفك فول اوبشن2009حسيت اني راكب حاجة تانية خالص
عزل العربية رائع ، صوت الموتور مش موجود مع قوته وانت طبعا عارف انه اقوى من البروتون بكتير ، بس سبحان الله كأنه مشية على ميه مش على أسفلت ، بس مينفعش نقارن بروتون بهوندا الي هي من أفضل الشركات في معدات وآلات الجر في العالم .

وعلشان كده ياريت متتكلمش بلسان الشركة وبس ، وياريت متهاجمش لمجرد الهجوم ، وياريت متوحيش للخوة في المنتدى إيحاءات مش ظريفة زي لما بتقول:

على فكرة أنا حاسس أني أتكلمت معاك قبل كدا تحت مسمى تاني !!!! مش عارف ليه

ياريت الله يكرمك تقولي انت كلمتني فين قبل كده علشان انا ذاكرتي ضعيفه شوية ، وصدقني ده أسلوب الضعفاء الي معندوش حاجة يرد بيها ، ومعش بكرة خبرت تزيد وتبقى أحسن مني مليون مرة ، بس فقط اصبر وكن دائما على الحياد ، وتجنب التفكير بمنطق المصلحة والهوى الشخصي.
تحياتي ليك......وسعيد بيك في هذا المنتدى الرااائع الي انا شايف كل الناس فيه ناس محترمة وشباب جميل جدا...ومتعاونين جدا...ومحدش بيخل على حد برأيه وخبرته
واشوفكم دايما على خير.

ومازال البحث جارى حتى الان
السلام عليكم ورحمة الله وبركاتة\ اعضاء المنتدى المحترمين هذة قصتى مع العربيات وارجو الافادة فى البداية انا ماركبتيش عربية قبل كده ولسه مطلع الرخصة 9\2\2009 بدات ابحث عن عربية مستعمله فى البداية سواء عن طريق الاهل او االزملاء او النت او الجرائد مثل جريدة الوسيط وفى هذا الخصوص شوفت عربيات كتيرة مثلا لادا وشاهين .......الخ وكل اللى كان بيعرضها بيقول عليها ممتازة وبيضرب بيها المثل وفى يوم شوفت عربية موجود اعلان لها فى جريدة الوسيط الاسكندرية كانت مركة كيا- ريو موديل 2003 وكان مكتوب فى الاعلان انها استخدام طبيبة وبعدين رحت شوفتها وفى المعاينة ظاهريا وجد ممتازة بالنسبة ليا وفى اليوم التانى اخد مكا نيكى معرفى ورحت اعينها وكشف عليها وبعدين لقها الجير بوكس كله زيت والعربية بالحله ديه قالى ابعد عنها اه نسيت اقولكم ان سعر العربية كان37الف وبسبب الموقف ده فى صديق ليه نصحنى بحكم خبرتة فى السيارات المستعملة قالى احسن اشترى عربية جديدة اوفر و احسن وبعد الاقتناع
بدات اشوف العربيات الجديدة ورحت المعارض وتوكيلا ت السيارت المهم لقيت البرسونا الفول ابوشن فيهاجميع الكماليات ممتا زه كمان فيها كماليات كتيرة اوى كانت معروضه فى معرض التوكيل الخاص بعز العرب وبالفحص الظاهرى للعربية من الخارج والداخل لقيتها ماية ماية وعند فتح الابواب وغلقها مفيش اى تزيق مثل ماسمعت الاخوة بيقوله والعربية زى الفول وكان سعرها 91.900الف
وده كمان قلب ما يعملو االخصم زى ماقوللى لو انا هدفع نقدى وعلى فكرة العربيات اللى فى نفس الفئة 1600سى سى وفيها نفس الكماليات سعرها فى السماء مرتفع جدا زى اليابانى والاروبى والاروبى تقفيل اسبانى ولا تتناسب مع اصحاب الدخل المعقول بلاش المتوسط اما العربيات الكورى فهيا لحد ما قريبة شوية مع اختلاف فى الكماليات طبعا
اما الصينى "حدث ولا حرج"
ولما قريت المكتوب النهاردة فى المنتدى بصراحه جبلى احباط انتو ايه رايكم فى العربيه بس راىء صريح بالنسبة ليه هل اشترى البرسونا وانا مطمن ولا اشوف حاجة تانية واسف على الاطاله ديه بس بجد يهمنى رايكم وارجو التواصل