الموضوع: بتحب تشرب آنهي نوع شاي ؟؟

المشاركة الأصلية كتبت بواسطة marsguy

أكتر شاي عجبني هو شاي إسمه

Delma Cylon Gold

.

انا كنت متوقع ان الشاي ده هو اللي حيكسب في الاستفتاء
بس الناس مزجات طبعا

طيب حد فاكر شاي التموين زمـــان اللي كان مرسوم عليه فلاحة ؟؟
حد فاكر اسمه ؟؟


الشاي ده كان عبارة عن نشارة حديد + نشارة خشب +كربون

بس كان تحفة ومافيش حاجة تعدل الدماغ غيره
وكان ببلاش وراحمنا من المبالغ اللي بندفعها دلوقتي (علشان الكيف بيذل طبعا)

على فكرة بواكي شاي التموين دي كانت بتحل محل الفلوس يعني ممكن
دفعها اكرامية لساعي في مصلحة يخلصلك مصلحتك
تديها للدادة في المدرسة تجبلك النتيجة من الكنترول
تديها للبواب اكرامية مشال كده يعني

(طبعا مواليد من 1978 وطالع شايفين اللي باقوله ده خيال علمي , لكن اسألوا حد كبير من الطبقة المتوسطة حيحكلوا)

المشاركة الأصلية كتبت بواسطة mesaharaty

شاي التموين زمـــان اللي كان مرسوم عليه فلاحة كان إسمه ((مبروكة)) وكان شاى ملوش حل فى تركيبته اللى كانت بتتكون من الآتى :
نشارة خشب - مر بطارخ - نسبة من برادة الحديد ويتم مزجهم جيدا مع إضافة نسبة ضئيلة من الشاى الحقيقى لإضفاء نكهة الشاى على التركيبة ( منه لله إللى اخترعها)

أحلى شاى ممكن يتشرب حاليا هو شاى الربيع فعلا محترم
شربته فى السعودية طعمه جننى ولما جبته من مصر معرفش ليه حسيت إنه عادى (يمكن حالة نفسية بقى)

الله ينور عليك
اسمه "مبروكة"

أحلى شاي في مصر هو تويننجز يليه ديلما اللي أوفر منه بكتير.
الشاي الأخضر أبو نعناع بتاع تويننجز ده ملوش حل, أنا مدمناه بجد. مفيش أي نوع شاي أخضر تاني في نفس الطعم.
الشاي الأحمرالعادي بتاع تويننجز برضه مزاج. أنا حماتي كييفة شاي, و كانت ما بتحبش أي نوع شاي في مصر و بتبعت تجيب من دبي الشاي بتاعها. قلتلها حاجيبلك شاي أحلى من كل ده. جيبتلها تويننجز بريكفست تي و كل ما تشوفني تقوللي أنا بدعيلك كل يوم الصبح و أنا بأشرب الشاي, ده أحلى شاي دوقته في حياتي. رغم اني جيبتلها فتلة بس بتقوللي طالما الفتلة مظبوط أوي كدة و مش بيمرر الطعم يبقى أسهل من السايب.
الشاي المصري بقى بأنواعه (ليبتون يعتبر أحسن الوحشين فيها) ليه طعم غريب كدة, و تحس انك متأكد انه مضاف له اضافات غريبة و ألوان. و الفتلة كمان حكاية لوحدها تحس انها بتدي طعم فيه مرارة كدة لو سبتها شوية في الكوباية. الواحد مش بيحس بسوء الشاي المصري الا لما يشرب نوع نضيف مدة, لو جيت تشرب بعديها المصري بتحس انه حاجة تانية خالص ما يتقالش عليها شاي.
معلش يا جماعة الكلام خدني. أصل انا كييفة شاي و نسكافيه, و بأشربهم من غير سكر و لا لبن عشان بحب أستمتع بطعمهم. مش عارفة الناس اللي بتشرب شاي بسكر كتير دي ما بتشربش ميه بسكر و خلاص ليه:)