شوف يا سيدي
ABS = anti-lock braking system

يعني أيه Lock؟؟؟

تعالى نبدأ الموضوع واحدة واحدة، انت لما تكون عند الميكانيكي وبتزود زيت الباكم أو بتطلع الهواء الموجود داخل الدائرة بتاعة الفرامل، الميكانيكي بيعمل أيه؟ بيقولك أو بيقول للصبي بتاعة "كارك" يعني دوس على دواسة الفرامل وسيب وده علشان يجمع قدرة الانضغاط بتاعة الزيت الفرامل عند الأطراف "العجل". وبعدين يفتح الدائرة فيخرج الهواء.. خروج الهواء دا مش الموضوع الموضوع هة "كارك"..

لما تكون ماشي على أي سرعة 50 أو 60 أو 70 وتيجي تفرمل فجأة وخصوصاً لو فيه رمل على الأرض بيحصل Lock للفرامل؟ يعني أيه؟ يعني حضرت تيل الفرامل بيروح يقفش على الطنبورة وميسبهاش تبقى النتيجة أيه؟ العربية تتزحلق ودا في الميكانيكا بيقى العربية اتزحلقت والفرامل حصلها Lock أو بالألماني Block..

طيب أيه الطريقة الي تخلي العربيات تفرمل على السرعات العادية دي والعربية متتزحلقش وميحصلش Lock؟ أو Block؟ المسؤول عن الحكاية دي هو ABS طيب أزاي بيشتغل؟

بيشتغل بنفس طريقة "كارك" الي بيحصل انك لما تيجي تدوس على الفرامل فجأة على السرعات العادية دي أو حتى السرعات العالية، انت بتفضل دايس على دواسة الفرامل، يقوم ال ABS يشتغل حتحس انت ساعتها بحركة "كارك" تحت رجليك مع إنك مبتعملهاش لكن ال ABS بيعملها بدل منك والعربية مش حتتزحلق زي الفرامل العادية وحتقف في فترة أقصر بكتير جداً عن الفرامل العادية..

ال BS بيعمل أيه؟ بيروح يجمع قوة ضغطك على الدواسة ويعرفهه ويبدأ يقسمها بنفس القوة على فترات بمبدأ "امسك وسيب امسك وسيب" يعني إيه؟ يعني الفرملة بتروح تخلي تيل الفرامل يمسك ويسيب الطنبورة في حركة تبادلية سريعة تؤدي في الآخر إن العربية ميحصلهاش Locking أو Block وتقف..

في حاجات تانية بتكون مجهزة في برنامج عمل الABS زي EDL وESP بس الحاجات دي معتقدش موجودة في أوكتافيا ولو موجودة محتاجة تجهيزات عالية..

وللمعرفة برضو:

EDL = Electronic Differential Lock ودي وظيفة بتعمل Lock للعجل بحيث ان سرعة كل العجل تبقى واحدة وميحصلش انحراف في العربية .. يعني العربية متتزحلقش..

ESP = Electronic Stability Program ودا المسؤول عن عدم زحلقة العجل على الأراضي ا لممطرة والجليدية...

بالنسبة بقى لتركيب ABS في عربية مش مجهزة أصلاً

مفروض لو ينفع، حتغير التالي:

1. ضفيرة الموتور، لأن كنترول العربية لازم يحس بالـ ABS
2. الطنابير الأمامية والشمعدانات
3. الدنجل الخلفي لأن غالباً الأوكتافيا 98 الدنجل الخلفي قباقيب مش سكاكين

أتمنى تكون معلومة كافية