الموضوع: حوارات مجموعة فولكس و أوبل و جنرال موتورز

يا مختار باشا :

أولا : موضوع الاثبات في حجم الانتشار مش محتاج غير ملاحظة كل كام عربية في الشارع بتشوفها عينك بتقع على فيكترا الجديدة. طبعا ده مش أسلوب علمي للتقييم بس نعمل ايه في بلدنا اذا كان في غياب كامل للمعلومات و حجم المبيعات الحقيقي من الوكلاء.
ببساطة كدا يا جماعة كل كام عربية بتشوف جيتا أو باسات و برضه كل كام عربية بتشوف فيكترا الجديدة.

ثانيا : أنا كلامي كان واضح ان الكلام على ألمانيا تحديدا في اولوية الفولكس عللى الأوبل و السبب اني بروح المانيا مرتين تلاتة في السنة لظروف الشغل. انما انجلترا ليست مقياس بمفردها على أوروبا بالكامل.

للأمانة الانسينيا الجديدة جامدة موت و معايا كتالوجات المواصفات و الأسعار لكل موديلاتها بالمناسبة و هحاول اعمل لها scaning لكي يستمتع جميع أعضاء المنتدى.

يا جماعة أي عربية الماني اكيد محترمة جدا لأن الألمان دول و عن تجربة أفضل شعوب أوروبا من حيث الجدية في العمل و جودة المنتجات.

بالنسبة للفيكترا الجديدة ، ليس لدي أي اعتراض عليها نهائيا و لكن كل خلافي معاكم هو حجم انتشارها في السوق. مشكلة الأوبل في مصر ببساطة السمعة اللي طالعة بتاعة السخونة من الموديلات القديمة و طبعا كلكم عارفين سوق العريات في مصربيحكم على العربيات ازاي - بالسمعة طبعا. على النقيض من كده الجيتا اللي ارتفاعها عن الأر ض98 سم فقط و توكيلها زي مانتوا عارفين، الا ان هذا لم يمنع الانتشار الشديد ليها في السوق ولكن اسم فولكس في السوق بياع يا جماعة. فهمتوا قصدي ايه يا عصابة أوبل.

خالص احترامي للجميع.

محمد

الأستاذ الفاضل أحمد علاوي

تقبل خالص احترامي ليك و لكل عضو محترم في هذا المنتدى و هم الغالبية العظمى و الحمد لله.

م / محمد حمدي

انا مش متحيز ضد الاوبل..لكن انا مندهش من انتشار الجيتا والباسات بشكل كبير...لدرجة اصبح من الطبيعى اشوف فى اشارة المرو 2 جيتا و1 باسات....انا فى الحقيقة اصبح عندى يقين بان السيارتين هما من اعلى السيارات الفاخرة طلبا فى مصر.....هل دة معناه ان الجيتا والباسات يتفوقوا على الاوبل........يمكن .بس احساس الشارع المصرى بقيمة علامة Vw عالى جدا............انا عن نفسى بحب ؛الباسات جدا جدا واعتقد انها سيارة فوق الممتازة خاصة بعد Tsi

المشاركة الأصلية كتبت بواسطة معتز

انا مش متحيز ضد الاوبل..لكن انا مندهش من انتشار الجيتا والباسات بشكل كبير...لدرجة اصبح من الطبيعى اشوف فى اشارة المرو 2 جيتا و1 باسات....انا فى الحقيقة اصبح عندى يقين بان السيارتين هما من اعلى السيارات الفاخرة طلبا فى مصر.....هل دة معناه ان الجيتا والباسات يتفوقوا على الاوبل........يمكن .بس احساس الشارع المصرى بقيمة علامة Vw عالى جدا............انا عن نفسى بحب ؛الباسات جدا جدا واعتقد انها سيارة فوق الممتازة خاصة بعد Tsi

الله ينور يا ميزو - كلام هايل.

المشاركة الأصلية كتبت بواسطة asd7778

الموضوع جامد جدا واسمحوا لى ببعض التعليقات :
1- افلاس اوبل :
التحليل
اوبل فعلا موقفها حرج من الناحية المالية لان جنرال موتورز لا ترسل المخصصات المالية للاوبل نتيجة الحالة المالية المتردية لجنرال موتورز ،حيث ان جنرال موتورز ترى ان اوبل الى حد ما واقفه على رجلها حتى الان وان جنرال موتورز بتحاول تساعد شركات تابعة لها اخرى الى فى موقف صعب جدا زى هامر و السؤال هنا هل تفلس اوبل ؟؟؟ اولا الحكومة الالمانية لن تسمح بذلك بسبب العمال والعملاء كما ان الشركة لها بعد تاريخى فى صناعة السيارات الالمانية لذا فأن الحكومة سوف تمنع ذلك بشكل قوى ودى واضح من اهتمام الحكومة الالمانية بموقف اوبل وضغطها على جنرال موتورز لصرف المستحقات المالية للاوبل ،جنرال موتورز سوف تستميت للحفاظ على اوبل لانها تمثل الذراع الاوربى القوى لها فى اوروبا كما ان افلاسها سوف يضعف موقفها وهى مش ناقصه لذا فان الحكومة الامريكية سوف تتدخل للحفاظ على اوبل من اجل عيون جنرال موتورز ، اوبل فى العاميين السابقين قامت بتحديد روح تصميمتها كليا( انسانيا جديده استرا جديده كورسا جديده زافيرا جديده) وغيرها ودى طبعا مش وضع شركة بتفلس وتموت لا اوبل بتغير جلدها فى الوقت الحالى ،كما ان هناك حقيقة واضحه لا جدال فيها جنرال موتورز وضعها صعب ولكن لن ولم تفلس والبرنامج الانتخابى لباراك اوباما واضح فى هذا الامر مساعدة جنرال موتورز لاقصى درجه لان جنرال موتورز هى مثال للهيمة الامريكية
الاستنتاج:
وضع اوبل صعب ولكن لن تصل لافلاس ودى واضح جدا من حركة تغير و تجديد التصميمات الكلى
2- اوبل ولا الفولكس واجن احسن J))))
طبعا النقاش كان على اشده بس الجميع كان فى غاية الاحترام والحرص على الاخر فى نهاية الامر واحى الاخ العزيز احمد العلاوى وجميع عصابة الاوبلاية الى انا لسا عضو جديد جدا فيها
التحليل:
الحيقية ان قواعد المقارنة بين الشركات زى اوبل او فولكس بيحتاج تطبيق قاعدة مقارنة التفاحة مع التفاحة وليس التفاحه مع البطيخة J)))) ،صحيح اوبل وفولكس شركات سيارات بس الوضع غير الوضع تماما فولكس مجموعة متكاملة تملكها فى الوقت الحالى مجموعة بورش ويتبعها العديد من الشركات زى اودى واسكودا وسيات لذا فانها من الممكن مقارنتها من جنرال موتورز وطبعا بصراحة فولكس تكسب لان جنرال موتورز فشلت فى انتاج ما يسمى السيارة العالمية التى تنفع جميع المناطق زى الجولف عند فولكس مثلا وغيرها من الاسباب الفنية الاخرى (اساليب الانتاج والموردين ومتابعة جوده الخدمة) ودى كلها حجات اكتسح فيها اليابانين ثم الالمان اما الامريكان فهم تخلفوا فى هذا الامر عشان كده العربية الامركانى شكلها اصبح مغايير للواقع العالمى عشان كده كان تأثر فولكس اقل من جنرال موتورز فى الازمة العالميه والمتابع لشركة جنرال موتورز حيلاقى انها كانت تحقق خسائر كبيرة قبل الازمة اصلا اما فولكس كانت بتحقق ارباح عشان كدها جنرال موتورز اتبهدلت من الازمة الاقتصادية ده غير ان السوق الامريكى اكثر الاسواق تضررا فى العالم، اما المقارنة بين اوبل وفولكس فهى فى غير محل .
الاستنتاج:
فولكس حاليا فى وضع احسن كتير من جنرال موتورز من الناحية المالية
3- فيكترا ام جيتا:
انا شخصيا من ملاك الفيكترا الجديده وممكن افيد شويه فى هذا الامر
التحليل:
الجيتا عربية محترمة فعلا وحكاية انتاج السيارة فى المكسيك يا جماعة فهو مش عيب واسمحوا لى بحكم خبرتى المتواضعة فى دراسة خطوط الانتاج الخاصة بشركة فولكس فأن شركة فولكس لديها نظام Quality Control رهيب وان مصنع المكسيك بيدى امريكا وهو سوق شديد التنافسية ولكن ممكن نقول ان العامل المكسيكى مش زى العامل الالمانى نتيجة سبب بسيط هو life style حيث ان العامل المكسيكى طالع عينه فى دوامة الحياه زى جميع الناس فى الدول النامية بس العامل الالمانى وضع اخر ودى مهما اديت العامل فى الدول النامية زى المكسيك ومصر مثلا من تدريب حيفضل ان الحياة هنا غير اوربا فشركة فولكس مثلا مش ممكن تقلل التلوث فى المكسيك (اكثر المدن تلوثا فى العالم) وتخلى الشوارع فاضيه ونظيفة عشان العمال يكونوا فى مود كويس ، الجيتا عربية ممتازه بكل المقاييس ولكن واطيه على الارض ودى فى رأى عيب قاتل (بالنسبة لى انا) عشان شوراعنا زى ما انتم عرفين ملاهى مش شوارع ، سحبها معقول و الفتيس كويس والامكانيات والكماليات ممتازه ،ضيقه شويه لواحد طويل زى العبد الله وطبعا التصميم مميز لا جدال فى ذلك ،انتشار السيارة ممتاز ولكن سمعت كتير(وليس عن تجربة او تحليل) ان التوكيل سيئ وعشان موضوع الضيق فى الصالون(وده عيب فيا ومش فى العربية) وانها واطيه على الارض انا قررت ما اجبش الجيتا
الفيكترا C
هذه السيارة نالت العديد من الاشاعات الغير صحيحه تماما كعادة السوق المصرى سوق غير ناضج يتحرك بالاشاعات Word of mouth بدون التأكد من مصدر الاشاعة وانا شخصيا قبل شراء السيارة قمت بعمل موضوع بسيط وهو انى سالت 48 صاحب سيارة فيكترا فى الشارع انا تعبت شويه عشان اعمل كده بس النتيجة كانت رائعه واغلبهم كانو متعاوينين وكانت النتيجه ان موضوع الفتيس الايزى ترونك وحش دى غير حقيقة والسخونة محدش اشتكا منها والشكوى كانت من السحب الضعيف فى البدء حتى 60 كلم وبعد كده السحب رائع وطبعا التابلوه معقد شويه والتكيف مش زى اليابانى بس زى الجيتا تقريبا ،قطع الغيار غالية شويه اغلى من الجيتا وزى الباسات تقريبا وتكاليف الصيانة زى الجيتا واعلى من الاكتافيا ،طبعا العربية تحس انها ناشفة شويه والالمانى كله كده تقريبا، الفيكترا ما فهاش باركنك سينسور وده عيب عشان العربية طويله ، الكنبه الخلفية اضيق من الاكتافيا شويه بس اوسع من الجيتا واعرض من الاكتافيا ،التصميم بالنسبة للعبد الله احلى من الجيتا والاكتافيا وده مسالة ذوق وطبعا المرحلة السنية لها تدخل كبير فى الاختيار يمكن لو انا فى العشرين من عمرى كنت جبت الجيتا (بس انا كنت صغير سعاتها ما كتش اعرف اجيب بسكلته وربنا يبارك فى عربية باب سعتها J)))))))))))) يلا الجواز والعيال بقه كبرنا بسرعه J) ،بالنسبة للتوكيل فهو مخترم بس غالى بس لا يكتلف عن الفولكس بس الاكتافيا ارخص،طبعا لا ننسى ان الابل المانية 100 فى 100 ودى نقطة تمييز، انتشار الفيكترا اقل فعلا من الجيتا لان الفيكترا نزلت مصر ايزى ترونك فى 2007 يعنى سنتين فقط وطبعا الجيتا اقدم شويه ،بس بالنسبة للعبد الله انا مبسوط من الانتشار الخفيف انا شخصيا ما بحبش العربية المنتشره جدااااا ودى امزجه واذوااق . حاليا الفيكترا زاد انتشارها بشكل واضح عشان السعر
اما الايزى ترونك(شبه الاتوماتك) فمن الممكن ببساطة الدخول على المنتديات الاجنبية ونقرا كافة التعليقات عن هذا النوع من الفتيس ونحد انه فى الاساس معمول عشان نحصل على سحب المانول وسهولة الاتوماتك واتفق الاغلبية على استعماله مانوال فى السرعات الواطيه ونقله للاتوماتك فى السرعات العاليه والعملية ده بسيط جدا فى الايزى ترونك عن الستب ترونك فى الفتيس الاتوماتك الكامل، كما الالايزى ترونك استهلاكه للبنزين اقل ومعدل انبعاث ثانى اكسيد الكربون منه اقل وده امر بالغ الاهمية فى اوروبا.
نيجى للسعر وده امر هام فنجد انه نزل بشكل جامد حوالى 40 الف (اتوب لاين )180 من 218 و 30 الف (لهاى لاين) 165 من 195 و 20 الف (الاليجانس) 155 من 175 وده تخفيض يخليك تتامل الموقف ان جنرال موتورز قللت هامش الربح جدااا عشان تبيع هذا الموديل لانه اخر موديل فى الشكل ده وده طبعا عيب لا جدال فيه ولكن السعر مع الامكانيات يخلى الابل حاليا صفقه رابحه لانك بتشتريها باقل سعر ممكن فى ظل الازمة العالمية اما الجيتا فسعرها مستقر لحد كبير وهامش الربح لدى وكيلها زى ما هو تقربيا طبعا فى شوية تخفيضات بس مش زى الاوبل حاليا .
نيجى مين احسن فيهم ؟؟؟؟ ده امر نسبى لان العربيتين كويسين لاننا بنتكلم على سيارتين المانتين مش صينى J)))) كما ان الامر ده بيختلف من سوق الى اخر مثلا فى الخليج الفولكس والسكودا والاوبل ليس لها وجود لان التوكيل سيئ جدااا مثلا فى السعوديه كما ان الاوربى ليست السياره المثاليه فى الخليج عشان التكييف ضعيف وده عيب قاتل قاتل فى الخليج.
الاستنتاج:
عموما فى رأى المتواضع من الناحية الاقتصادية فالفيكترا تكسب لانها صفقة رابحة دلوقتى.
ايه ده انا طولت اوى اسف على الازعاج وشكرا للى صبر وقرأ كل الكلام ده

الى المهندس أحمد شرف الدين

برغم عدم اقتناعي الكامل بجزئية العامل المكسيكي و البيئة في المكسيك و تأثيرها على الكواليتي كنترول لأن العربية الجيتا عاملة مبيعات هايلة في السوق الأمريكي اعلى مبيعات في العالم وكذلك في مصر حاليا،
الا انني ارفع القبعة احتراما لسيادتك و كلامك المنظم في المقارنة بين الجيتا و الفيكترا و لكن برضه أنا عند رأي الشخصي بدليل ان حضرتك اعترفت بشرائك الفيكترا الجديدة بس لمجرد نزول سعرها 38000 جنيه - التوب لاين - و بالتالي صفقة رابحة حاليا بمنظور الفلوس و ليس بمنظور الاختيار احتراما للفيكترا الحالية كسيارة - و هي فعلا سيارة تستحق الاحترام لأنها ألماني اولا و اخيرا.
خالص تحياتي و احترامي لحضرتك و لجميع الردود على هذا الموضوع .
م / محمد حمدي