محتاج مشورة فى حادثة حصلت لإلنترا

**جندى مجند** · 01-09-2007 09:42 PM

لى قريب عنده النترا 2006 و تعرضت لحادث و بتابع معاه عمليات الاصلاح لها ... العربية اتعوجت القنطرة بتاعتها و السمكرى قاللنا انه محتاج يغير الطبلية بالكامل و جاب واحدة جديدة أصلى تمنها 1800 جنيه ... سؤالى هو هل فعلاً لا توجد طريقة لاستعدال القنطرة؟ و لو كدة هل ممكن الطبلية القديمة تتباع كقطع غيار استعمال ولا كدة حتتباع خردة خلاص؟؟

**Abdallah** · 02-09-2007 01:02 PM

الحقيقة انا مركبتش النترا قبل كدة ومعرفش ايه القنطرة الى بتتكلم عليها دى...
هل تقصد القنطرة الى بتبقى ماسكة العجلتين فى بعض , واعتقد انها فى العربيات القديمة فقط
ولا تقصد القنطرة الى بتبقى ماسكة الشاسيه من الامام ورا الاكصدام كدة.
اى منهم لو استعدلتها هتبوظلك ثبات العربية لأن مهما حصل من إستعدال كفائتها مش هتبقى 100%
متسيبهاش للسمكرى لانه فى عربيات بتجيله بيبقى محتاج قطعة بسيطة منها فبيحتاج القديمة علشان يقطع منها.

**جندى مجند** · 02-09-2007 02:57 PM

شكراً يا فندم على التوضيح ... أنا فعلاً أقصد القنطرة اللى ورا الاكصدام ... أنا كاتب المصطلحات اللى السمكرى كان بيتكلم بيها ... القنطرة دى كانت جزء من الشاسيه عبارة عن قضيب له قطاع مربع خلف الاكصدام و كانت هى نفسها عبارة عن ضلع فى مربع كبير اسمه الطبلية ماسك الجزء السفلى من السيارة أسفل الموتور ... و القنطرة لما اتعوجت فى الحادث و باعتبارها جزء من الطبلية دى و لا تباع منفصلة اضطرينا نشترى طبلية كاملة بـ 1800 جنيه و حسب اللى فهمته من السمكرى ان الطبلية القديمة كدة ملهاش فايدة لأنها لا يتم استعدالها ... أنا حاولت أدور على صورة على النت توضح ما أعنيه و للأسف أوضح صورة لاقيتها هى دى:

متسيبهاش للسمكرى لانه فى عربيات بتجيله بيبقى محتاج قطعة بسيطة منها فبيحتاج القديمة علشان يقطع منها.

تمام كدة ... دة اللى أنا بسأل عليه ... هل ينفع ان الطبلية دى تتقطع منها أجزاء و تتلحم مع طبلية تانية ولا محدش بيعمل الكلام دة؟ لو الموضوع دة بيتعمل يبقى كدة الطبلية ممكن تتباع استعمال انما لو مينفعش يبقى كدة الراجل يبيعها خردة؟

**Adham** · 08-09-2007 10:50 PM

القنطرة والقوايم و علب الشاسية من الاجزاء التي يجب استبدالها عند اي خبطات بها و لا يمكن سمكرتها او اصلاحها لأنها عبارة عن علب معدنية مقفلة
و كذلك لأنها تعيب السيارة لو ظهر ان بها خبطات او سمكرة او اصلاح

لذا يتوجب استبدالها بأخرى جديدة او استيراد

**Hamlet** · 14-09-2007 01:58 PM

هل كانت الحادثة جامده قوى ام ان الالنترا عربيه ورق ؟ .. السئوال يهمنى جدا علشان بافكر اشترى الينترا قريبا ؟؟؟

**sherif_84** · 14-09-2007 03:12 PM

والله كل السيارات دلوقتى بقت ورق بداية من البى ام لغاية اللانترا ربك هو اللى بيسترها فنصيحة منى ماتحطش فبالك وانت بتشترى السيارة دى ورق ولا مش ورق لان الصاج دلوقتى فكل السيارات بقى ضعيف حتى فالشاهين اللى معايا برضه صاجها ضعيف لو عايز صاج جامد ومش فارق معاك الشكل ولا البرستيج هات الادا 2107 دى أجمد صاج فالسيارات ولو بتفكر فالمستعمل ممكن سيارات الثمانينات و التسعينات صاجها أحسن شوية
يعنى لو عاجباك الانترا اشتريها على بركة الله وربنا يحفظهالك وماتحطش فبالك حكاية الصاج دى

**PRO-DRIVE** · 14-09-2007 03:38 PM

مش الصاج او الورق زي ما بتقوالوا هو اللي بيحدد العربيه ضعيفه ولا لا لان الصاج مهمته امتصاص الصدمه مش ردها

**Adham** · 14-09-2007 11:51 PM

فعلا و حقيقي ان السيارات كلها صاجها بقى ورق سواء في الصاج او علب الشاسية

و في بلدنا دلوقتي وسط الاوتوبيسات و الميكروباصات و الشباب الارعن انت محتاج تركب عربية متينة تبقى متطمن على نفسك و على اولادك فيها

علشان كدة انا اتجهت للسيارات ال 4*4 لأن شاسيها عامل زي قضبان القطر و بتركيب دفندر عليها بتبقى راكب مصفحه و عالاقل في حالة الحوادث لا قدر الله تبقى متطمن على نفسك و أولادك بس بقى استحمل تمن استهلاكها المرتفع في البنزبن و قطع غيارها

و بالنسبة للادا انا عارف انها متينة بس برضة مابقيتش زي الاول يعني زمان كان عندنا لادا 1500 كانت فعلا ناشفة جدا و لا تقارن بتاتا باللادات ال 2107 بتاعة دلوقتي

**جندى مجند** · 15-09-2007 02:17 AM

المشاركة الأصلية كتبت بواسطة Hamlet

هل كانت الحادثة جامده قوى ام ان الالنترا عربيه ورق ؟ .. السئوال يهمنى جدا علشان بافكر اشترى الينترا قريبا ؟؟؟

العربية كانت ماشية على سرعة 100 و بعدين قريبى فوجئ بسيارة ماشية فى الاتجاه العكسى أمامه مباشرةً فحاول يتفاداها فالعربية انحرفت منه الى الرمال على جانب الطريق ... بس بصراحة الأضرار و التلفيات مش جامدة و العربية ما شاء الله مش ضعيفة بس دى الانترا 2006 ... السمكرى كان عنده الانترا 2007 متدمرة فى حادثة أشد بكتير و قاللى ان قطع غيارها أغلى بكتير جداً من 2006 ... يعنى مثلاً الطبلية بتاعة الانترا 2006 كانت تمنها 1800 و بتاعة 2007 كانت تمنها 4500
:shock: :shock: