الموضوع: تجربتي مع الدايهاتسو ميرا 94

سلام عليكم

لما جيت اشتري العربية دي دخلت علي نايل موتورز وتصفحت وسألت لغاية لما جبتها ودلوقتي هعرض تجربتي عليكم عشان اي حد برضة عاوز يشتري الفئة دي يمكن يستفيد من الموضوع

1-العربية الميرا عربية عجيبه عربية ساحرة الموتور 850 سي سي وبرغم كده بسم الله ماشاء الله شيل فيها اربع افراد واجري علي سرعة 120 كيلو متر ثبات اتزان محصلش صوت الموتور في السرعة دي يعتبر اعجاز لأني ركبت الدايو نوبيرا وانا بمشي بيها علي التالت صوتها كأنك قاعد في مصنع حتة لو قفلت الزجاج لكن الميرا العربية الساحرة صوتها يعتبر اوطي واهدي صوت موتور ممكن تسمعه بالمقارنة بسيارة زي الدايو وللعلم الدايو اللي جربتها حديثة مبقالهاش سنة !

2-الميرا عربية حمالة اسية قوي برغم شكلها البريء الصغير يعني انا مرمطتها في مشاوير غريبة في طرق واعرة والحمد لله اثبتت كفائتها ولاحظوا ان المشاوير دي تمت والعربية فيها 4 اشخاص بالغين يمكن الحاجة الوحيدة اللي غيرتها للأطمئنان مش اكتر المساعد اليمين القدامني لأنه حجر شوية وضع طبيعي بالمشاوير الغريبة دي

3-العربية الميرا فيه ميزة برضة غريبة ويمكن الميزا دي بسمعها برضة عن الناس الي بتتكلم عن السيريون ميزة المساحة صالون الميرا برغم انه ضيق بالعرض لكن بالطول محصلتش انا بجيب الكرسي القدامني لأخره رجوعآ للخلف وبقعد في الكنبة اللي ورا ورجلي مستريحه برغم من اني طويل والأغرب ان جسم العربية من الخارج لايوحي بأنها واسعة

4-حاجة حلوة قوي قوي في الميرا الله اعلم دي ميزة خاصة ولا ده عادي الميرا مش بتسخن بسهولة بجد يعني افتري عليها مشاوير رايح جاي وبعدين روح بص علي المياة هتلاقي اتبخر منها شوية كده او لم تتأثر وعمرها ما تقل معاك وانت ماشي وتسخن وحوارات ال 128 دي


5-حتة هذه اللحظة والحمد لله لم اري اي مشاكل مع قطع الغيار موجودة في الحرفيين وزي الفل مفيش فيها مشاكل من النقطة دي خالص واسعارها ظريفة مقارنة بأسعار قطع غيار ال 128 يعني ساعات يبقي الفرق ليك وساعات يبقي الفرق لل 128 بس الفروق في الأسعار طفيفة مش حاجة تخليك مثلآ تقول انا اخاف اشتري الميرا مثلآ وافضل عليها ال 128

6-هيا زي ماقولت عربية بنت اصول يعني الحمد لله لم تقابلني مشاكل ميكانيكة اللهم الا مشاكل عبيطة سببها عدم احتراف القيادة واني اخدت مطبات بالعبيط والي اخره زي مثلآ صواميل مفككة مش متربطة وحاجت زي كده

7-فرامل اليد بتاعتها هيا اللي فيها حاجة محيرة لازم تشدها علي الأخر قوي عشان تجيب معاك لو نزلت تكة واحدة ممكن تمشي وانت شاددها !! معرفش ده عيب فيها ولا ايه لأن الميكانيكي كذا مرة يقولي مفيهاش حاجة وتمام بس هيا كده هل ده عيب ولا ده شيء طبيعي معرفش

9-قيادة العربية مريحة جدآ سهلة قوي وده بسبب جسمها الصغير وابعادها الواضحة التابلوه مريح بطريقة متميزة مقارنة بعربيات اخري زي الادا وال 128 وال 127 الخ تابلوه عريض جدآ ومرفوع من الأطراف بحيث تحط عليه اي حاجة يبقي ثابت في نفس الوقت فيه مساحة تخزينية لا بأس بها وكمان الدركسيون وضعه مريح جدآ بالنسبة لقائد السيارة

انا من شده اعجابي بيها غيرت تفكيري واتجاهي نحو الديهاتسوا خصوصآ السيريون لأني حاسس ان السيريون ورثت كتير قوي من الفكر بتاع الميرا التصميمي من حيث صغر المساحة الخارجية لأقصي درجة وزيادة مساحة الصالون لأكبر درجة بخلاف ان فيه نقطة بصراحة مهمة جدآ لما تتكلم عن الدايهاتسو ومواتيرها لا تقارنها بمواتير سيارات اخري يعني متجيش تقول مثلآ دي الميرا 850 متنفعش في السفر لأ تنفع وتنفع قوي قوي اداء موتور الدايهاتسو عامة من خلال قرائتي لأراء الأعضاء عن التريوس والسيريون شكل تاني يعني ال 850 سي سي مثلآ في الميرا احسن مليون مرة من ال 1300 سي سي في ال 128 الكلام ده عن تجارب ليا ولأصدقائي

معلش طولت والموضوع مكتوب بطريقة مش منظمة بس حبيت اشارككم باللي حسيته من خلال تعاملي مع الميرا وعربيات بعض اصدقائي والفروق مابينهم

وشكرآ

السلام عليكم
والله انا باهنيك علي عربيتك وعلي اعجابك بيها وانك متمسك بيها لحد كبير
انا للاسف لحد دلوقتي ما عنديش عربية
بس والله انا العربية دية اول ما شوفتها اتمنين اني اجيبها
لاني حسيت انها بتناديلي كل ما اشوفها
وفكرت جديا اني اجيبها لكن ظروفي ما ساعدتنيش اني اجيبها حتي مستعملة بس كاش
ولما فكرت اني اجيبها مستعملة بردة بس بالتقسيط لقيت اكبر مشكلة واجهتني وهي الفايدة الكبيرة جدا علي المستعمل
يعني العربية تكون جديدة تكون من غير مقدم والفايدة 7%
والعربية المستعملةيكون المقدم 50% وتكون الفايدة 10.5%
انا مش عارفة الدنيا كلها كدة ولا اللي انا سالتهم بس هما اللي عاوزين يعقدوني
ويعقدوا كل اللي عاوز يشتري مستعمل بالتقسيط؟
المهم ربنا يبارك لك في عربيتك ويديك خيرها ويكفيك شرها
بس يا ريت ما تنساش انك لما تركبها تقول دعاء ركوب الدابة