اشياء شخصية للبيع !!!

**A_H_M_A_D** · 08-03-2009 08:56 AM

بس الحاجات دي مين حايدفع فيها فلوس عشان ياخدها
داحنا المفروض ندفع عليها فلوس عشان نلاقي حد يرضى بيها !!

**sa3dawy** · 08-03-2009 09:08 AM

المشاركة الأصلية كتبت بواسطة MoToRiZeR

دي بلد راشة دواخل

ههههههههههههههههههههههههه ههههههه جامدة جدا جدا ههههههههههههههههههههه

الف شكر على الموضوع التحفة .. بس على رأيك مين الى هيرضى يشترى بقا

**enas75** · 08-03-2009 10:08 AM

حلو قوي كلامك بس لوفكرت تاني مش حتقدري تبيعي حاجه منهم
....لان كل الحاجات دي مهما بانت انها مدمره وسيئه هي اللي عملت الشخصيه الجميله التي انت عليها (كلام مش مجامله بس ده واضح من اسلوبك وطريقتك في الكتابه)
لوتخلصتي منها ستتخلصين من كل الافكار (ومش حتمتعينا بتحفك الجميله وافكارك)
حتي الصداع المزمن حيوحشك بشده عندما تجدي نفسك خاويه من اي مشاعر .......
الحزن هو اللي بيخلينا نستمتع بالفرح
الاكتئاب هو اللي بيخلينا نستمتع بالسعاده
الارهاق هو اللي بيخلي للراحة معني........
الذكريات المؤلمه هو اللي بيخلي للحاضر معني افضل
حتي التجارب السيئه هي اللي بتخلق شخصيه افضل(الضربه اللي ما تموتش تقوي)
حتوقولي ايه الرايقه دي حقولك انا اكتر هموم منك بس اتعلمت ان انا مقدرش اشيل هم حد ولا حد يقدر يشيل همي كل واحد ربنا بيرزقه احزان وافراح علي قده........:
علشان كدة شيل حاجتك وحطيها في علبه مقفوله وكل شويه طلعيها واتفرجي عليها زي الصور وصدقيني الصداع حيروح

**msobhy** · 08-03-2009 11:07 AM

للبيع
حب واحد بيحب مصر
تصدقوا انى فعلا بحب مصر
لكن فى اول فرصة هاسيب مصر
لأنى بمنتهى البساطة مش لاقى مصر

**abdalla45** · 08-03-2009 11:31 PM

ايه يا جماعه الوضع الحزين ده حاجه من الاتنين يا تتغيروا يا تغيروا مشاعركم انا بهزر طبعا محدش يقدر يغير مشاعره على فكره الحزن من اجمل واحلى المشاعر اه بجد لانك وانت حزين سواء من موقف معين او من شخص معين بتبقى قمة التحدى جواك وفى قمة الانتاج وبتتولد عندك قوه داخليه نتيجة الموقف الى مزعلك او لما بتقابل الشخص الى سبب فى حزنك لانك بتحاول تبنلو انك اقوى منه بكتييير وان جرحه ميهمكش ومبياثرش فيك فبتقدر تتغلب على حزنك قدامه لكن للاسف بتستسلم لما تكون لوحدك من اول جوله

**أشرف فتحى** · 08-03-2009 11:44 PM

للبيع
اصحاب مطلعوش اصحاب
للبيع
قلق وخوف على بنتين مش عارف بعد 10 سنين هايبقوا فين؟
للبيع
خبر وحش يعكنن عليك يومك
للبيع
حسره وندم على وقت فات مش هايرجع تانى
للبيع
شعر ابيض كل ما ابص فى المرايه يقولى خلاص قربت
للبيع
اخلاق وأدب فى زمن فيفى ودينا
للبيع
عقل متعب مش عايز يبطل تفكير
للبيع
احلام معدش ينفع تتحقق
للبيع
مكان على القهوه مش عايز اقعد عليه

**نور القمر** · 10-03-2009 04:27 PM

عايزة ابيع ثقة فيمن لا يستحقها
عايزة ابيع خجل بيضيع عليا حقوقي
عايزة ابيع اي ضوضاء حوليا
عايزة ابيع كل الناس المزيفة المشاعر اللي في حياتي
عايزة ابيع عربية المرحوم بابا الشاهين

**wesam_salom** · 10-03-2009 04:47 PM

للبيع

احلام شباب ضاعت فى عز الشباب

للبيع

جنسيه من الدرجه التالته

للبيع

شهاده ممكن تتحط فى برواز

للبيع

شغل بيجيب الهم والقلق

للبيع

شقا وتعب سنين وفى الاخر محلك سر

للبيع

شاب قبل التلاتين لكن عمره الف عام

لكن مطلوب للشراء

دماغ خاليه من الهموم

مستقبل لاطفال لسه ما اتعلموش الكلام

صديق مستعد يكون شريك ويبقى معاك فى الطريق

او على الاقل اى دوا بيفقد الانسان الذاكره ويخليه يعرف يبداء من جديد
يكون طفل او حتى مجذوب فى اى محطه سكه حديد