الموضوع: العلامات الإرشادية

موضوع العلامات الإرشادية دا مهم جدا ممكن أنت ما تحسش بيه الصبح لكن بالليل مهم جدا و مهم كمان لو واحد جديد فى الشارع دا أو على الطريق دا أو البلد دى
و أنا رايح منوف عشان الكلية من شبين الكوم الطريق الى بيربط بين البلدين بيعدى على كام قرية كدا فى النص مع إنى أشك فى إنهم قرى من العربيات الى بتبقى واقفة المهم من سنتين و نص الطريق دا مكنش عليه علامة إرشادية واحدة زى ملف يمين ملف شمال طريق فرعى مدرسة كوبرى و لك أنت تتخيل الحوادث كلها حوادث بسبب الملاكى الى مش عارف الطريق و سعات العربيات الغبية الى بروح فيها
أنا أذكر من 7 سنوات عربية ملاكى ميعرفش إن فى مدرسة بيعدى سواق ميكرو الإتنين خبطوا 17 طفل كانوا خارجين من المدرسة مات منهم 10 أطفال تقريبا و على إثرها 21 مطب فى 2 كم
المهم تكرمت المحافظة و هيئة الطرق بوضع العلامات الإرشادية و يفطة على أول الطريق من كل مدينة توضح الطريق جاى منين و رايح فين و طوله قد إيه كل دا تمام الكلام دا من سنة السنة دى ولا علامة ولا يافطة من دول موجودة
طب راحت فين و لا حصلها إيه حقولك زى مسلسل X-FILES خطفها الكائنات الفضائية ...................
لا طبعا كان كل واحد معدى جنب يافطة يروح شايل اللزقة الى عليها الكتابة دا غير الأطفال الى طالعين من المدارس أو رايحين الدرس أو مستنين الدرس و بيرسموا بالمسامير أحلا الرسومات عليها لحد لما بقت مجرد حتة حديد و طبعا بالليل مافيش حد ماشى يجى كام واحد يروحوا قاطعين يافطة و بايعنها لبتاع الحديد الخردة بمبلغ و قدره و صرفنها على مزاجهم.........

دلوقتى السؤال إحنا ليه عملنا كدا فى اليفط دى و الى ممكن تحمينا من خطر واحد مش عارف الطريق دا ؟؟؟و الى حصل دا حصلب ليه و عشان إيه ؟؟؟؟ و هل عشان الحاجة حكومى يبقى كلنا نبوظها ؟؟؟؟ و نسينا إنها جاية من الضرايب و الرسوم الى الدولة بتحصلها مننا
و ليه مانسيبش الحاجة فى حالها ولا هو عقدة نفسية و الظروف إيه؟؟؟
و معلش طولت عليكوا بس الموضوع دا مضايقنى جدا و منرفزنى جدا

الحكومه فكرت فى حل

تصنيع العلامات الارشادية من "البلاستيك" لتفادي سرقتها

كشفت تقارير المتابعة الدورية التابعة للهيئة العامة للطرق والكباري والنقل البري عن سرقة‏5154‏ علامة ارشادية وتحذيرية خلال العام الماضي من مختف الطرق التابعة لها في شتى أنحاء الجمهورية.

وقال المهندس طارق العطار رئيس الهيئة في تصريحات صحفية يوم الثلاثاء إنه على الرغم من العقوبات المشددة التي نص عليها قانون العقوبات في المادتين‏311‏ و‏316‏ بأن كل مواطن سرق أيا من العلامات الارشادية أو التحذيرية على الطرق يعاقب بالسجن مدة لا تقل عن ثلاث سنوات ولا تزيد على خمسة عشر سنة‏,‏ إلا أن العلامات مازالت تتعرض للسرقة.

وأبدى العطار انزعاجه الشديد من انتشار سرقة العلامات الارشادية والتي يلجأ اللصوص إلى بيعها "خردة" بأسعار زهيدة دون النظر لما يمكن أن يسببه فقدها من كوارث.

وتلجأ الهيئة لتعويض العلامات المسروقة وتركيب أخرى جديدة نظراً للخطورة الداهمة لانعدام وجود هذه العلامات على الطرق خاصة أثناء الليل لكن يعود اللصوص لسرقتها مرة أخرى.

وفي حالة الاتلاف المتعمد لأي من هذه العلامات تنص المادة‏361‏ على السجن مدة لا تزيد على خمس سنوات وغرامة لا تقل عن مائة جنيه ولا تتجاوز ألف جنيه‏.

و‏أوضح رئيس الهيئة العامة للطرق والكباري والنقل البري أنه يجري حاليا تصنيع بعض هذه العلامات من مواد بلاستيكية صلبة في محاولة للحد من سرقتها إلا أن اللصوص لا يزالون يسعون لسرقة الحوامل المعدنية للوحات والعلامات الارشادية والتي يتعذر صنعها من مواد بلاستيكية نظرا لأنها تحتاج درجة صلابة شديدة لا تتوافر إلا في المعادن‏.

وأشار إلى أن اللصوص يسعون وراء كل ما هو معدني حتي إنهم سرقوا‏2000‏ عاكس أرضي "عيون القط" خلال العام الماضي‏.‏