بسم الله ما شاء الله .....الكبير كبير برضه :)
انا علىطول بستخدمها ساعات بس بتفلت من الواحد و بيكسر من غير ما يبص بس والله على طول
لو هغروز او هعدي من عربية قدامى طبعا هستخدمها
لازم تطلع أيدك من الشباك أو تستسمح اللي قاعد جنبك يشمر و يطلع ايده... الاشارة لوحدها مابتنفعش خاااااااالص.
بالنسبة لبتوع التوك توك... ممكن يطلعوا رجليهم :)
بص يا theking انت ممكن بسهولة تميز إذا كانت الحركات دى شتيمة او هى اتباع للاصول و الغرض منها سلامتك و اللى بيعملها خبير سواقة و لا بيهيس
ازاى ؟؟
نمط العربية و هى ماشية
يعنى سواقة عنيفة ,مش متزن , توجية العربية (جسمها) مخالف للمتوقع منها
بيتكلم مع اللى جنبة و مش مركز بيعمل اية , نوع العربية برضو مهم , بيبص فى المراية ولا مطنش, عربيتة سليمة ولا خربانة , عندة لمبة محروقة وسرعة الاشارة (سريعة ) و ماشى بيها كدة , فى تردد فى اتخاذ القرارات , نقلة غياراتة واضحة فى حركة العربية , ..... وكدة يعنى
وضحت
ايه يا هندسة الكلام الكبير قوي ده..
محسسني انك سواق نقل تقيل بقالك علي الطريق 20 سنة..
:) :) :)
بس انا عندي تصحيح بسيط.. او ممكن يكون هو ده الاصل و اتحور عندنا للعرف اللي انت قولته بالنسبة للنقطة نمرة 3..
الصح في قواعد المرور..
انك لو ماشي في طريق عادي بدون مفترقات طرق..
وواحد كابس وراك و بيقلبلك نور.. لو اديته انتظار و قفلت.. معني كده انك مكمل في نفس الحارة اللي انت فيها و مش هتنقل يمين ولا شمال..
و معناها تعامل يعني..
عدي من مطرح ما يعجبك..
و بالتالي دع معناها في مفترق طرق..
بس كده.. غير الحاجات دي في منها باستعمله بس بدون ما كنتاعرف معناها بدقة قوي..
وفي حاجات ماعرفهاش اصلا..
تمام يا اسطي عمور يا كبير..
و من حق الكبير يدلع.. :) :) :)
انا فعلاً بقالى 20 سنة على الطريق ..انت بتقول فيها ههههه
ربنا يسترها معانا إن شاء الله
انا عمرى الصراحة ماسمعت ان دى فى قواعد المرور تبقى معناها كدةاقتباس:
بس انا عندي تصحيح بسيط.. او ممكن يكون هو ده الاصل و اتحور عندنا للعرف اللي انت قولته بالنسبة للنقطة نمرة 3..
الصح في قواعد المرور..
انك لو ماشي في طريق عادي بدون مفترقات طرق..
وواحد كابس وراك و بيقلبلك نور.. لو اديته انتظار و قفلت.. معني كده انك مكمل في نفس الحارة اللي انت فيها و مش هتنقل يمين ولا شمال..
و معناها تعامل يعني..
عدي من مطرح ما يعجبك..
على العموم دى عندنا على الطريق
...معناها انك على وشك تعطل وعايز مساعدة :rofl4:
بخصوص موضوع الاشارات يمين و شمال ده انا اعرف فعلا انه شتيمة
بس انا عشت في قطر خمس سنين ... و هناك الاشارات دي معناها ان الدور بتاعك مزغلله في المراية
على الطرق السريعة لما حد يعملك كده توطي النور و ساعات يديك اشارة شمال مثلا و هو يكون ماشي في الشمال اصلا يعني مفيش حته يخشها ... تفهم برضه ان النور مزغلله
mawdo3 el esharat fe masr da egtehad shakhse
tareban bta3 eragel ele talla3 elmasal bta3 sawa2 el 2atsh
we ba3d keda enas 3amemeto
fe qanon lilmror bey2ol ymen we shmal
we lazem thade wenta dakhel 3ala mafare2 toro2 we law hatkamel 3ade yeb2a mafish ehsarat we law hat'3ayar etgah eser yeb2a tede eshara.
we tareban howa da nafsoo kanon mror dawly, bas ana kol martga3 aso2 fe masr battar afarmat el hard wanazel software el masry (el 3orf esa2ed)3ashan a3raf amshe fe eshare3
mil akher ba3mel zay el masal
while in rome, do as romans do
طبعا بستعملها علطول , وبطريقة آلية
والله هوه حوار الاشاره دي من الحوارات المحيره جداً في السواقه بس انا بحاول افترض حسن لنيه او انها مش شتيمه زي امبارح راجع علي طريق بيلبيس بليل و واحد بلانسر رمادي طلع امامي و عمال يلعب بالاشاره يمين في شمال و فلاشر كل شويه حسيت انه مش مظبط كده
بس انا بحاول استخدم الاشاره بشكل عادي و منتظم لو داخل يمين او شمال
في بقي حوار كده الناس اللي بتحب التحوير في كل حاجه تيجي تعكلك الفانوس البرتقالي بتاع الاشاره تعملوا احمر فمش باخد بالي منه طبعاً و مش فاهم الفكره في ايه الصراحه انه يعملوا كده
ربنا يهدي
90 % من الحالات بستخدمها
هى مهمه جدا جدا
والله كلامك صح - وكمان اتخيل لما تدي اشارة يبقي واحد 128 بيجيب اخر المتور بتاعة علشان متدخلش علية وبعد ماتكون دخلت علية بالاشارة يديك نور ويعملك بليكة , بحس انو وقتها انة معاة بورش وانا قللت سرعتة !!!!!!!!!
كلامك صح ابسط حاجة لما بكون فوق كوبر اكتوبر بليل ( الفجر مثلا - يعني تقريبا مفيش عربيات ) وماشي يمين وتلاقي عربية وقفة وتدي إشارة وتدخل شمال بكل ذوق وأحترام
بس إلي يجننك إلي وراك يكون ماشي محترم زيك بس ميديش تنبية للبعدة المفروض المساعدة والخير علي الجميع
وربك يستر علينا وعليك
==============
الله ينور عليك علي هذة المعلومات القيمة
لكن نعمل أية في اللي بيغتبرها شتيمة ؟؟؟؟؟؟؟
====
هذة تجربة حدثت لي عل الدائري وصلة دريم الأسبوع الماضي وكانت الساعة 10 ليلاً كنت ماشي بسرعه100 كم / ساعة اللي مفروض أنها أقصي سرعه علي هذا الطريق وكنت ماسك أقصي اليسار لأني كنت بأعدي من سيارة نقل بمقطورة وكان أمامها تريلا ويسيران في الحارة الوسطي .
كان خلفي نص نقل (دبابة) ومديني النور العالي ف المراية
استخدمت الأشارات المتتابعة فلاشر .... يمين ... شمال ( ما كنتش أعرف أنها شتيمة ف عرف بعض الناس )
كان قصدي- والله علي ما أقول شهيد- هدي شوية أنا مش عارف أروح يمين ولا شمال
المعلم بعد ما الطرق فتح طلع من يميني وأنا بأحاول أوسع له الشمال وراح كاسر علي شمال كان ها يحك الرفرف اليمين رغفع رجلي من ع البنزين ودوست غرامل شعره بسيطة وكلبشت ف الدركسيون ؛؛؛ والله لو ما عملتش كدة كان أما ها يضيع الرفرف أو كنت ها عدي الجحزيرة اللي ف النص
=========
نفسي افهم ... نستعمل الأشارات صح واللي يفهم يفهم
ولا ما نستعملهاش واللي يحصل يحصل
i use it aaaaaaall the time .. also during parking my car
أكيد باستخدمها
ده أنا كتير باستخدمها حتى الفجر وفي شوارع فاضيه كمان، عشان أتعود عليها وعشان تبقى حاجه أوتوماتيكيه في سواقتي.
اكيد لازم استخدمهم
yes all the time
ana 3la tol bst3mela bas b7es en el nas btbosly 3la eny msh mn el blad di
kman fi 7aga f3lan 90% byst7'emo el eshrat bas ezay ba2a
ydik eshrah ymin we yd7'ol shmal
aw el 3ks
aw yshtem biha msh keda wla aih
بصراحة انا اول ما جيت مصر من اول السنة ده وقلت اسوق فاانا طبعا متعود على سواقة السعودية يا عني ايه كل واحد في حارته عند خطوط المشاه بهدي لا40 مثلا كده يا عني المهم او ماجيت مصر لقيت الناس بتمشي في الشوارع مطفية النور وده غلط يبقى الشاع ظلام حالك والاخ مطفي النور وما تعرفش العربية الامن الفرح اللي عليها من انوار حمرة وخضرة او صوت التسجيل بعدين ما فيش حد بيلتزم بالحارة المهم انا في مصر نا تعود على الاشارات لحد ما انكسر العامود بتاع الاشارة وما فيش منه في التوكيل واساسا الناس اللي في الشوراع ما بترفقش معاها الاشارة يا عني انا لما اروح البيت ولاقي ناس معادية في الشارع اروح ادي شارة على المكان اللي هاقف منه بس مافيش فايدة في الناس يروح داخل مكان ما انا هركن لو عاربية بشتمه وبهزوه لو بشر بستغفر ربنا المهم انا الذراع مكسوووور والنور عالي على طول بليل علشان هو اوطى من الواطي
وبعدين انا لو هاقديها غرز بشغل انتظار وبسحب علشان انا موش فاضي ادي يمين ولا شمال المهم ان اللي روايا يعرفوا وعلى العموم احنا مفروض نلغي الاشارات ونركب مكانهم اذرعة الية تخرج من الشباك مكان ايد السواقه وبدل الاشارة علشان ده المتعارف عليها
اتعلمت من ملاحظتي لسواقين الاتوبيس في شركه شرق الدلتا الحكوميه لما كنت اسافر الي شرم الشيخ ؛ انهم يعطوا اشارات في حاله تخطيهم سيارة امامهم او مجرد انحرف لجانب من جوانب الطريق ودي خلتني مجرد اي انحراف بالعربيه ادي اشارة يمين او شمال واذا كانت في عطل في السيارة او مشكله امامي في الطريق ادي انتظار
اما سواقين الميكروباص فحدث ولاحرج من اليمين معدي وعلي الشمال ولا عمري شفت حد فيهم بيدي اشارة او حتي كلاكس علي الطريق السريع ؛ لذلك الواحد ميزعلش عليهم لو علموا حادثه واتخبطت عربياتهم جامد
طبعا ً بأستخدمها علطول
بس المشكلة دلوقتى ان قليل أوى الى بيبص للأشارة
دلوقتى علشان تعدى لازم تدى أشارة وتطلع ايديك ورجلك كمان
طبعاً بستخدم الاشارات الجانبية عند تغيير الحارة
او قبل الدخول بملف او يو ترن. وبستخدم كمان
الانتظار قبل الدخول على المطبات او الاشارات او
الشوارع بطيئة السير بمسافة كافية لتنبية من خلفي.
بس الاشارة لها استخدامات اخرى،، جرب كدة وانت ماشي
على الدائري مثلاً وواحد ماشي وراك من ناحية اليمين او الشمال
وكل ما تهدي يهدي وكل ما تجري يجري وراك، جرب تديلة اشارة
في الاتجاة اللي انت عاوزة يطلع منة .... بقدرة قادر هتلاقية طار
من نفس الاتجاة اللي انت اديتة اشارة انك عاوز تمشي فية:)
الشعب المصري مبيحبش حد يمشي امامة .... ولا خلفة حتى!!
بستخدم الاشارة على طول تاخد ملف او شارع او تغيير حارة حتى لما باجي اعمل غرزة بستخدم الاشارة
مافيش كود فى العالم بيقول الكلام دهاقتباس:
- يمين فى شمال ... عند الدخول لمفترق طرق ......
يعنى الاستمرار فى نفس الاتجاة
يعنى لا هياخد يمين ولا هياخد شمال هايمشى على طول
4- اشارة يمين فى شمال و يعقبها فلاشر .......
يعنى اعتذار لحركة اثرت عليك غصب عنة
5-فلاشر بعدين اشارة يمين او شمال متصــــلة .......
يعنى هايدخل الاتجاة او الدوران دة على الهادى
6-اشارة يمين مستمرة - بعدين شمال متقطعة
يعنى هياخد الدوران على الزاوية الضيقة اليمين بعدين ... هاينتقل للزاوية الواسعة شمال و (العكس صحيح)
معظم اللى انت قايله ده يخالف قواعد المرور والحركة كلها
اعذرنى فى الكلمة ، الكلام اللى انت بتقوله ده غلط فى غلط
لو تحب تعالى تتناقش فيه
بمنتهى الصراحة مفيش مره تقريبا كسرت يمين او شمال من غير اشارة حتى لو مفيش حد ورايه او في طريق سريع ، وانا عن نفسي بتغاظ جدا لو واحد كسر قدامي من غير اشلرة
سواقين الميكروباص !!!!!!!!!!اقتباس:
الكلام ده فعلاً معمول بيه في مصر بس مع سواقين المكروباص بشوفهم بيعملوا كده
مش معنى انهم يعملوا كده ، اننا نعمل زيهم
لان الكلام ده غلط ومش صح
انا ملتزم بالاشارات والهازرد
بس من يومين كنت فى نفق الازهر وزى مانتم عارفين بيقف ساعات فجاة
فعادى بفتح الهازرد علشان اللى ورايا يفهم وميلزقش فيا
لقيت اللى ورايا عمال يدينيى فلاشر وبعدين طلع وجه جنبى وقالى
(انت مشغل الهازرد ليه)!!!!!!!!!!!!!!!!
والله هى بتعتمد على نوع العربية
يعنى لو الفيرنا بشغلهم على طول
بس لو مرسيدس او فولفو والله ان شاء الله اكون رايح من اقصى اليمين للشمال
بخش بالدراع على طول
عملا بالمثل " الى خايف على نفسه يوسع".
طبعا ده شيء أساسي خصوصا في شوارع محتاجه زى النصر و صلاح سالم مثلا
انا باستخدمهم دائما حتى وانا باركن ....تعود محمود
بس اللى انا مستغربله انك لما تديى اشارة لحد تلقيه كبس عليك ومش عاوز يعديك مع انه كان ماشى هادى مش عارف دى بيعتبرهوا اهانة ولا ايه ؟؟؟!!!!!
وحتى لما حد يدينى اشارة واهدى علشان يعدى الاقيه بيشكرنى كان المفروض انى ما اعديهوش !!!!!
فعلا انا لاحظت الكلام ده أول مادي اشارة وابتدي اتحرك سنة سنة للناحية اللي فيها الاشارة الاقي كلكسات تسرعني وناس تزعق وكإني سرقت منهم حاجة مثلا أو كسرتلهم حاجة في عربيتهم وميرضوش يعدوني :no: والغريب انه لما ييجي جنبي الاقيه بيزعق تاني برده في الاول كنت بفتكر نفسي كسرت عليه غلط مثلا بس لما الموضوع اتكرر بقيت ازعق انا كمان واقوله مانا مدياك اشارة اعمل ايه يعني تاني وبقيت اتجاهل كلاكساتهم طالما شايفة اني في الامان في المرايا بتعاتي ومش هأذي حد واروح واخدة الناحية اللي انا عايزاها :hat: وانا لما بلاقي اللي قدامي بيدي اشارة حتى لو عشان يغرز بهدي شوية عشان اعديه لكن الناس ورا تفضل تدي كلاكسات كإنهم هايتأخروا عن السفقات اللي بملايين مثلا لما يتأخروا الثانيتين دول :dots:
والغريب بقي اني لما مبديش اشارة بعدي بسلام ومن غير كلاكسات من حد حاجة غربية جدا :) :oops:
واضم صوتي ليكم للاحمد وبيردي
بيحصل ليا زي مابيحصلكم
*********ربنا يهدي ياباشا*********
الاشارات مهمة جدا
انا بستخدمهم على طول حتى لو ماشية ف شارع لوحدي و مفيش حد ماشي ورايا
بس صح اللي يغيظ انك تبقى مدي اشارة بقالك ساعة و تلاقي حد يقوم كابس عليك و يمشي طوالي و يريته بيحود
أكيد طبعا باستخدم الإشارات على الرغم إن كتير من السائقين خاصة الميكروباص والتاكس والنقل ما بيهتمش لو حد إداله إشارات بس لازم على الأقل أبقى إتبعت الخطوات الصحيحة و نبهت السيارات اللى ماشية حواليه و لا قدر الله فى حالة حدوث حادثة ما أبقاش أنا المخطئ.
حصل معايا موقف زى ده بس من كتر ما أنا كنت باضحك على الشخص ده سيبته ما عملتلوش حاجه
كنت ماشى فى جسرالسويس ومدى إشارة شمال لمسافة 150 متر علشان أتنقل من الحارة اللى فى النص للحارة الشمال .
المهم بصيت فى المراية لقيت عربية لسه بتلف من الملف اللى عديت عليه و بينها و بينى 100 متر أو أكتر , المهم رحت واخد الشمال , لقيت اللى جاى يجرى و رايا وكلاكسات و راح معدى من اليمين و كاسر عليا وو قف عربيته بعرض الطريق و بيزعق إنى كسرت عليه , المهم زعقتله و قولتله إنت مش شايف الإشارة اللى مديها بقالى ساعة و لسه شغاله و بعدين دا إنت جريت علشان تحصلنى كمان و يقوم يقوللى مش تشاور بإيدك و للا تبص وراك و تشوف اللى جاى من الشمال, أنا فطست على روحى من الضحك , وقولت بينى و بين نفسى اللى مش شايف إشارة منورة بالليل هايشوف دراعى و للا دراعنا هو الأصل فى إشارات المرور.
المهم لقيته من آكلى الفول اللى الحالة متأخرة معاهم , روحت راجع ورا و سايبه و ماشى .
ملحوظ " انا من آكلى الفول برضه بس مش مدمن"
طبعا حتى لو كنت لوحدي في الشارع