نصيحة أخوية مش أكتر .. بلاش تمشى على اكتر من 140 فى مصر عشان الطرق بتاعتنا مش بتسمح بكده وكمان عشان حاجة بسيطة كده ( كل برغوت على قد دمه ) يعنى متجيش انتا تركبلى لانسر وعايز تجيب 220 أمال اللى راكب bmw , mercedes والبلاوى دى يمشوا على كام ؟؟ّ!!!

معلش انتا يوم ما تطلعلك حاجة فاجئة حيكون قدامك مصير من اتنين :
1- ترشأ زى المعلم وتروح العربية وتطلع سليم
2- ترشأ زى المعلم برده بس انتا اللى تروح مع العربية

انا حقولك على حادثة حصلت قدام عينى فى الطريق الصحراوى :

انا ماشى على الشمال على 120 وشايف لانسر جى من ورا على اليمين طاير وعدانى زى الطلقة يعنى قول بالميت ماشى 180 وفاجئة لقيتوا جى ناحية اليمين .. انا قلت يمكن حيمسك الحارة الوسطى أو الشمال ... بس الباشا رشأ فى الجزيرة .. روحت راكن العربية ونزلت لقيت وش العربية للطريق ( العربية لفت ) والأصعب بقى ان فى بنت معاه طارت من الزجاج الجانبى وماتت وموصفلكش الموقف انك تشوف حد ميت قدامك وعينه مبرقة كده ...

انا ساعتها اتصدمت من المنظر .. ل 3 أسباب :
1- العربية : لانسر
2- اللون : شامبين
3-الكاسيت : كينوود نفس اللى انا مركبه

يعنى توأم عربيتى .. حسيت انه انذار كده من ربنا .

عموما دى وجهة نظرى .. ونصيحة يا اما تقبلها أو ترفضها ... حاجة ترجعلك ..