عايز رأيكم ضرورى فى تقييم ثمن العربية

**lovelorn** · 08-03-2009 09:08 PM

انا بفكر ابيع العربية ( لانسر 2007 سعودى 1600 أوتوماتيك وماشية 43000 كم ) ولسه عامل صيانة ال 40000 .

هى العربية كلاسيك ومفيهاش كاسيت بس متركبلها فرش جلد ... وكانت مرشوشة قبل كده بس مش راشش دواخل وفيها شوية خرابيش والأكصدام فيه حته متقشرة والزيت بيتغير فى مواعيده ( شل هيليكس ألترا ) ولونها شامبين والفوانيس الخلفية كريستال ومفيهاش Abs

يا ترى تساوى كام ؟؟

انا عارف ان حتقولوا لازم يكون لها صور عشان التقييم وكده بس انا عايز أعرف هى قيمتها فى حدود كام فى السوق عشان انا مش متابع الأسعار فى المستعمل أوى .

وطبعا مش عايز حد يعلى من قيمتها أوى وفى نفس الوقت ميخسفش بيها الأرض ( يعنى عايز المعقول اللى يرضى ربنا )

**boody2** · 08-03-2009 09:35 PM

طيب ممكن اعرف سبب الرش من بره ليه؟

**lovelorn** · 08-03-2009 09:49 PM

ماشى ممكن أقولك ...

المرشوش هو الكبوت والأكصدام ( ده واحد قدامى كان عربيته عطلانة فى السكة وبيرمى وهو ماشى بس العربية كلبشت منه فا انا الفرامل مساعدتنيش .. الكبوت ساعتها اتنى من قدام والأكصدام دخل جوه شويه والشبكة اتكسرت واشتريت واحدة اتخلعتلى من عربية يعنى أصلى .. بس على فكرة اللى بتعامل معاه سواء سمكرى أو بوية نضيف جدا جدا جدا والبوية ألمانى طبعا مش ممكن تعرف ان الكبوت مرشوش ولا فيه أى فرق فى اللون اطلاقا .

متخافش مش مقلوبة على الصحراوى يعنى