هو إعلان أي شركة عن سعر عربية ملزم ليها قانونا؟

**fars777** · 09-03-2009 09:02 PM

سؤال بسيط: لما شركة تعلن في الجرايد أن عربية بموصفات معينة أسعرها كذا..ورحت أنا الشركة وطلعت المواصفات دي سعرها أعلى من المكتوب في الإعلان...هل الأعلان ملزم قانونا للشركة؟ هل مثلا جهاز حماية المسهلك يقدر يلزم الشركة ببيع العربية بنفس السعر اللي اعلنت عنه؟

**samirayad** · 09-03-2009 09:08 PM

لو فيه محاسبه صح....كان ممكن يكون ملزم لها قانونا......

_ بس بيحطوا الأسعار بطريقة سحب رجل الزبون....ولما تروح أو تتصل بيعلوا براحتهم....علشان عارفين حيسلكوا نفسهم أزاى...........

_ فلا تأخذ كلام الجرايد على أنه النهايه.....( عن تجارب سابقه )....

**wesam_salom** · 09-03-2009 09:11 PM

اشتغالات كلها

السعر الاكيد يبقى وقت التنفيذ

السعر فى الاعلان بيكون صحيح بس بينسوا يقولوا ان فيه شويه مصاريف اداريه ورسوم معاينه ورسوم حجز وبقشيش للواد اللى مسح العربيه و5 جنيه للبنت اللى ردت على التليفون وحسنه صاحب المعرض

يعنى زود كمان الفين تلاته

المفروض ان ده نصب وحقك انك تشتكيهم بس تقول لمين

**M.Osman** · 09-03-2009 09:17 PM

انا فاكر لما كان الوالد بيشتري العربية... كان سعر الفيرنا فى إعلان المصرية 65000 جنيه و رحنا فرع طنطا ( مكنش في فرع فى المنصورة ايامها ) و الراجل يقول 67500 !!
دا الإعلان كان لسة في السيارات بتاع إمبارح ...!!
يرد يقول احنا حركة العربيات عندنا سريعة جدا و الأسعار بتتغير كل ساعة ....

ها ها !

طبعا مشتريناش من المصرية!

**A.Saad** · 09-03-2009 09:21 PM

انا فاكر ان مرة دكتور القانون قال انه من حقك انك تشتكيهم وتحصل على الشئ ده بسعر الاعلان
يا ريت حد قانونى من الاعضاء الاعزاء يفيدنا

**M.Osman** · 09-03-2009 09:24 PM

يا ريت فعلا لو حد بيفهم فى القانون يقولنا عالتفاصيل

**sasatony** · 09-03-2009 09:38 PM

المشاركة الأصلية كتبت بواسطة samoevil911

انا بدرس في حقوق.. حضرتك دا اسموا الدعوة للتعاقد.. وحضرتك من حقك قانونا انك تشتري بالسعر اللي مكتوب فب الاعلان.. و لو لم يوافقوا من حقق تشتكيهم وهتشتري بالسعر ده.
ودا سببه القانوني ان حضرتك بتتضرر من هذا الاعلان لو مبعش بالسعر دا .. لان انت اصلا روحت سحبت فلوسك ورحت الشرككة دي و تعبت نفسك بناء علي انك هتشتري بسعر معين.. ومعني انهم رفعوا السعر يبقي دا اخلال بالوعد بالتعاقد . وليك الحق انك تشتري بسعر الاعلان.. ومفيش حاجة اسمها الاسعار بتتغير عشان السوق. دا كلام ولا ليه لازمه .. لان المشتري ليه في السعر اللي في الاعلان.. ولو الشركة هتغير في الاسعار يبقي لازم تكتب في الاعلان ان الاسعار دي قابلة للتغيير بالزيادة او النقصان.
ودا اسموا الايجاب والقبول في نظرية العقد .. و هنا الاعلان دا بيبقي عبارة عن ايجاب غير قابل للرجوع فيه من الموجب.
انا حاولت اشرح بطريقة بسيطة عشان الكل يستوعب الامر..

ياباشا مفيش اكتر من القانون في مصر بس مش بيتنفذ علي حد الا الناس العادية

**mab** · 09-03-2009 09:42 PM

انا بشتغل فى سلسلة سوبر ماركت
وساعات فى اسعار بتكون محطوطة غلط
لكن لما العميل بيصر انه يشترى بالسعر الموجود تحت المنتج
فعلا بنديله بالسعر الى شافه

**mohamedbook** · 09-03-2009 09:53 PM

كلها نصب مفيش مصداقية علي الاطلاق
شركة السبع كانت منزلة اعلان في الجرنال بتقول فية اشتري عربية رينو ميجان واحصل علي الثانية مجانا
اتصلت بيهم علي الفور
ودة كان الر
اول مشعارف كام مشتري هيخشو السحب وممكن تفوز بالسيارة
كلام نصب في نصب
زي فودفون بعتتلي رسالة
لو عايز تتكلم دولي تتكلم كل دقيقة وتاخد الدقيقة التانية مجانا
وبعشريين قرش بس
رحت متصل
خصم العشرين قرش والي التاكيد اشتراكك في الخدمة وخصم 280 قرش اضغط رمز الشباك
طبعا رحت مكنسل وخصمو العشرين قرش النصابيين الحرمية ومشتركتش في الخدمة

وعماااااااااااااااااااااا ااااااااااااااااااااااااا ر يامصصصصصصصصصصصصصر

تعرفوا مين الي بيتضرب انا طبعا عشششششششششششششان صدقت الكلام واتصلت
شعب بيتضحك علية واي حد يسرقة عيني عيينك
بكل بجاحة وقلة ادب