الموضوع: عملت صيانة ال 1000 كيلو

السلام عليكم ورحمة الله وبركاتة

النهاردة والحمد لله روحت عملت صيانة الألف كيلو
بداية الموضوع ( خصوصآ للى ناوى يروح يعمل الصيانة قريب )
أتصلت بالفرع الرئيسى علشان أحجز معاد للصيانة والبنت اللى ردت عليا قلتلى الأفضل إن تدخل على موقع عز العرب www.ezz-elarab.com
وتدخل على Book service appiontment وتملا البيانات المطلوبة وهى عبارة عن
( الأسم , ونوع وموديل العربية , ورقم الشاسيه , والشكاوى , وطبعآ إيميلك وأخيرآ المعاد المناسب ليا )
وبالفعل دخلت كل البيانات وكانت الشكواى بتاعتى كالأتى :
1- عدم وجود غطاء الولاعة ( وده كان مثبت فى تقرير التسليم )
2- عدم جودة تقفيل الباب الأمامى شمال ( باب السائق ) بالإضافة لوجود صوت طقطقة عند فتح وقفل الباب
3- وجود صوت تزييق فى الكنبة والشنطة
4- وجود حدفة يمين ملحوظة أثناء السير
5- العربية بتكهرب ! وده فى حالة العربية وهى مش دايرة
6- العفشة محتاجة تربيط

وبالفعل تانى ردو عليا بإيميل فيه المعاد المناسب ليا وكان النهاردة الساعة 11 الصبح
ووصلت الساعة11:15 وإستقبلنى مهندس الصيانة الأستاذ مصطفى وأكد على التقرير بتاعى وقالى معاد التسايم الساعة 4 عصرآ

** أحلى حاجة إنك بتكون شايف كل حاجه بتتعمل فى العربية

أول حاجة بدأو بتظبيط صوت التزييق اللى جى من الكنبة والشنطة .
والشنطة بيكون حلها فى لف شكرتون حولين بعض مفصلتها والكنبة مخدتش بالى عمل فيها إيه
بعد كده دخلوا على تربيط العفشة وتغير الزيت ( زيت توتال 5000)
وبعدين ركبوا غطاء الولاعة
وبعدين دخلت لمراجة الكهرباء وطلع التقرير إيجابى وإن العربية كهربتها ميه ميه , وكتبوا جنب الشكوى من إن العربية بتكهرب ( قالوا ده بسبب الملابس الشتوية !! )
وبعدين دخلت على ظبط الزوايا وفى دى طولت شويه ,
فى الأول شاف المقاسات بالكمبيوتر وفضل المهندس يربط فى شوية حاجات كده وبعدين قالى تعالا نطلع نجرب ,
طلعنا على الطريق والعربية إتعدلت شويه بس برضوا فى حدفة يمين بسيطة وده بشهادة الفنى برضه .
المهم قالى إحنا كده لازم نغير مكان العجلتين الأمامين العجلة الشمال تتركب فى اليمين , واليمين تتركب فى الشمال , وكان فى إحتمال بظهور حدفة برضه بس هتبقى شمال . بس الحمد لله العربية إتظبتت بشكل كبير أوى وأنا رضيت بكده
وبالنسبة لصوت الطقطقة اللى فى الباب الأمامى عند الفتح قالى هنشحملك الباب وبعدين بعد التشحيم برضه ولا حاجه وصممت إنهم لازم يشوفوا حل لحد مغيرو الشداد بتاع الباب
وفى النهاية غسيل العربية ودفع الفاتورة
بالضبط 177 جنية عبارة عن
96 جنية ثمن زيت توتال 5000 ( 4 كيلو) ,
55 زيت فلتر ,
10 مصاريف الورشة ,
16 ضريبة مبيعات

بس عايز أقول إن بجد العربية بقت حاجة تانية خالص أحسن من الأول بكتيييير مع إن الأول كان جامد , بس مع عدم وجود صوت تزييق أو طقطقة بتحس براحة أكتر

ومعلش طولت أوى بس حبيت أحكى بالتفصيل

1000 مبروك
وربنا يباركلك فيها ويحفظهالك
أسامة شحاتة