-
نظريا بدأ حبى للسيارات من سن 9 سنين كنت بركب عربية أبويا و هيه مركونه و أحط أيدى على الدريكسيون و أجيبه يمين و شمال و أشد الهاند بريك و انزلها تانى و بعد كده و أنا فى أولى ثانوى خليت واحد صاحبى يعلمنى إزاى أطلع بالعربيه من وضع الثبات يعنى أدى الغيار الأول و أعمل ميزان برجلى لحد مل العربيه تمشى و علمنى برضه ازاى أوفق الغيارات و بعدين أنا طبقت الكلام ده على عربية أبويا لحد ما خليته يجيبلى عربيه بعد الثانويه العامه و الحمد لله دلوقتى بعتها و جبت أرجنتا ربنا يحفظهالى و يكفينى شرها :wink: :wink:
-
انا بدايتى مع العربيات فى سن صغير حوالى 6 او 7 سنين
كان فى ناس قرايبنا جايبين عربية بم ام الفئة الثالثة او الخامسة معرفش بس كوبيه بيضاء يفرش جلد و تجهيز سبور من المانيا
فكان حلم حياتى انى لما اكبر ابقى طويل زيهم, اشرب سجاير زيهم و اهم حاجة يبقى عندى بم ام زى دى
و من ساعتها بدأ تعلقى بالعربيات, و بقيت مهتم جدا انى افضل اتابع اى حد بيسوق, طريقة سواقته, بيستعمل المرايات فى ايه, الفتيس, كل ما يتعلق بالعربية
و كنت بروح مع والدى للميكانيكى و افضل اتفرج و اتابع ايه اللى بيعمله
لكن اول احتكاك لى مع السواقة كان و انا عندى 11سنة, كان عندنا عربية بسواق 131, و طبعا بما انى اكبر اخواتى, فأى مشوار انا اللى بروح معاه, و اكيد استغلت نفوذى و خليته يسيب لى العربية اسوقها :twisted:
والدى مكنش ممانع, خاصة ان المنطقة عندنا هادية و انا مش متهور, بس لازم يبقى حد معايا
و انا فى 3 اعدادى قدرت استخلص موافقة بصعوبة من والدى انى اسوق العربية زى ما انا عاوز فى المنطقة بس, و بعد مفاوضات و حلفان انى مش هسوق بسرعة و الحاجات دى, تم الموافقة انى اخد العربية لكن فى المنطقة فقط, يعنى مطلعش على الكورنيش او اتوستراد
سواقتى لوحدى كانت ممتعة, لكن اللى علمنى السواقة بجد هو صاحب العربية البى ام البيضاء :)
قبل اما اطلع الرخصة بسنة كان بينزل معايا و نفضل نمشى بالعربية فكل حتة فى القاهرة, و اول مكنا سقت فيه كان طريق المطار, فعلا ده اكسبنى مهارات و حاجات ممتازة فى السواقة و هى اللى خليتنى يبقى مستواى كويس
يعنى لفت الايام بقيت طويل, و الحمد لله محطتش سيجارة و لا مرة فى فمى, ناقص بس البى ام البيضاء (اوعدنا يا رب)
طبعا او انا فى صغرى كنت بحرص انى احاول اجمع النمازج الصغيرة (المعدن) بتاعة العربيات, لكن للاسف لم اوفق :(
-
أنا اتعلمت السواقة وأنا في أولى اعدادي , واحد جاري سوري علمني و كنت باروح معاه هوا و اصحابه و هما بيفحطوا في البر و اتعلمت التفحيط فبل ما اتعلم امشي في الشوارع ,,,
بس ده اداني خبرة كويسة قوي
أول سيارة أحركها كانت لينكولن
أول سيارة امشي بيها في الشارع مازدا 929
أول سيارة بتاعتي بي ام موديل 80 320 كوبيه (أحلي عربية ركبتها في حياتي )
بس كانت مفلساني أول بأول :wink: :wink: :wink:
-
مقدرش اقولك لأنى معرفش لأنى طلعت لقيت نفسى بحب ومهتم بالعربيات
أول حاجه سقتها كانت جرار زراعى صغير جدا فى مزرعه خال والدتى فى كفر الزيات وكان عمرى وقتها 6 أو 7 سنين وكل اللى عملته إنى إتحكمت فى الدركسيون وكل الدواسات كانت متظبطه إنه يمشى بسرعه المشاه لأنهم كانوا ماشيين جنبى
أول عربيه سقتها كانت 128 وكانت بتاعه الشغل بتاع بابا وكان عمر ى آنذاك 11 سنه
-
أما أنا ليا قصة مع السيارات لما كان عندى 12 سنة أول عهد ليا مع السيارات وكنت بحب أركب العربية وهى واقفة وأقعد ألف الدريكسيون لغاية ما يسوجر منى وأنزل من العربية وكان عندنا عربية تويوتا تيرسل موديل 96 ولما دخلت الثانوى بدأت أرسم السيارات أنا بحب الرسم جدا وبدأت أرسم السيارات لغاية دلوقتى المهم أنا اتعلمت السواقة وأنا فى ثانية كلية كان عندى 21 سنة وطلعت الرخصة بعد سنة من تعليمى السواقة وبعد كده والدى باع التيرسل وجبنا شاهين 1400 موديل 2003 ولازالت معانا وأنا اتعلمت السواقة الاول على عربية خالى لادا 2105 وبعد كده عالشاهين ان شاء الله فالمقابلة أوريكوا صور السيارات اللى رسمتها من دماغى :)
-
ياة انا السيارات فى دمى و انا صغير خالص حوالى 4 سنين كان كل ما ابويا يقولى حجيبلك هدية اقولة عاوز عربية بالريموت :D و كنت اقعد اعمل اختبارات :D :D اقعد احط شوية خشب بتاع لعبة مش فاكر اسمها اية بس هية لعبة بتعمل زى برج من الخشب و تقعد تشيل حتة حتة من الخشب لحااد ما تقع المهم و كنت اطلع العربيات عليهم و كنت بعمل SHOW جامد :D و كنت احط مياة على ارضية الحمام او المطبغ و اقعد ازحلق العربية ( اعمل امريكانى و دريفتات بايظة خالص ) الكلام دة و انا عندى حوالى 7 سنين و كانت امى دائما تزعقلى انى بحط مياة على الأرض و مرة حطيت زيت من المطبخ علشان العربية تتزحلق اكتر طبعا كنت ببوظ الدنيا و كان عندى برضة هواية جمع السيارات كان فية عربيات كدة انت كنت تجمهعا و بتبقى نوزج للحقيقية بالظبط يعنى كان يجيب التابلوة و الشاسية و الموتور و العجل و كلة كلة و انا اقعد اجمع و كان ابويا بيساعدنى فى الكلام دة علشان مكنتش بعرف اعملها لوحدى و طبعا كنت بحب اوى اقعد فى العربية و اقعد الف فى الدركسيون و اغير النقلات و كدة و كان كل ما ابويا ينزل من العربية اقوم انا طالع قدام و العب شوية و جت فترة لما كبرت شوية كنت بشترى كل شهر مجلة سبور اوتو و استناها من الشهر للشهر على احر من الجمر و كان ياسلام لما ينزلو المرجع الكبير كنت بشترية دائما و عندى المجلات لحاد دلوقتى :D و كل الناس عارفة فى المدرسة ان فهد خبير السيارات والله مش انا الى بقول دة هما (حتى لغاية دلوقتى) :) :) و كان صاحبى الأنتيم مهتم جدا برضة بالسيارات و كنا بنتبادل المعلومات :D
طبعا بعد النت مبقيتش اجيب مجلات و بقيت اقعد على النت
و طبعا اول تجربة قيادة لسيارة كان و انا عندى حوالى 12 سنة و قدت بيجو 504 بتاعت جدى الله يرحمه و كان معايا ابويا و يوميها عملت حتة امريكانى :D :D :D :D :D :D :D قمت دايس بنزين جامد و شايل رجلى من الدبرياج بسرعة و هب لقيت العربية عملت امريكانى و قامت وقفت :D ابويا قالى بالراحة و تشيل رجلك من الدبرياج بالراحة جدا و فعلا طلعت بالعربية و كلة تمام الحمد لله
بس عمرى ما استلفت المفتاح خالص :mrgreen: لأن المنطقة عندنا هادية و الشوارع ديقة و ما تساعدش على الكلام دة :mrgreen:
و كان عندى برضة حكاية انى ابص من البلكونة و اتحدى نفسى انى اعرف كل العربيات
-
و طبعا الى مزود حبى للسيارات اوى كدة ابويا لأنة مهندس ميكانيكا و لأنة كان و مازال بيقدر حبى للعربيات و مازال يقعد معايا و يفهمنى اذاى مثلا الموتور بيشتغل و البساتم بتتحرك ازاى و ايه الى بيخليها تتحرك و مثلا فكرة عمل الكاربيراتير و اية المواتير ال 2 stroke و ال 4 stroke و حاجات كتيييييييير جدا و كنت أى حاجة مش بفهمها كنت بسأله فيها و كان بيجاوبنى بأستفاضة و انا طبعا بحب اوى الكلام فى الحاجات دية و دة احد العوامل الرئيسية لحبى للسيارات
Content Relevant URLs by
vBSEO 3.6.0 PL2