الاخوة الاعزاء، مش هاتكلم عن وجوبية او جواز اطلاق اللحية فأهل مكة ادرى بشعابها بس انا عايز اتطرق للموضوع من زاوية مختلفة
1- اعتقد ان الموضوع اساسا نابع من ان الناس بتحط الملتحين فى خانة او فى مجموعة ما وتتوقع منهم تصرفات معينة، يعنى بما ان اللحية (فى الثقافة العامة) هى "مظهر" للتدين، إذن فلا بد ان "كل الملتحين" يتصرفون ويتكلمون ويتفاعلون مع المجتمع بإعتبارهم "ملائكة" ومن لا يفعل هذا فهو ممثل ومدعى وأثم ... وحتى الزندقة ... ناسين ان الملتحى فى النهاية "انسان" يخطئ ويصيب
2- على الجانب الاخر دوافع الملتحى لاطلاق لحيته تختلف من شخص لاخر (تدين، مظهر ووجاهة، فرض اسرى او مجتمعى، نصب...الخ)
3- تبدأ تظهر اعراض البنى آدمين الطبيعيين على الملاك ... اقصد الملتحى وبما انك لا تستطيع ان تخدع كل الناس كل الوقت يبدأ من اطلق لحيته لغرض غير مرضاة الله بالظهور على حقيقته والبعض الاخر يظهر على شكله الادمى لو كان اطلقها عن اقتناع وبهدف التدين ولكنه كباقى البشر يخطئ ويصيب
4- هنا يبدأ دور المتلقى او المتفاعل مع الملتحى .... وبما ان صوت الغلط عالى دائما يبدأ المتلقى فى تعميم تعامله مع "شخص" سئ ويلصق الصفة بكل "المجموعة"
5- والناحية التانية طبعا مش كل الملتحين بيراعوا ربنا فى مظهرهم زى ما صديق كريم منير عمل فتزيد الطينه بله
طيب المشكله فين؟ فى رأيى المشكله فينا احنا كمصريين، احنا بنحب التجميع والترتيب، احنا بنعشق الطبقية والتعميم وتقسيم البشر لفئات وفئات منبثقة، امثلة:
1- بيه وباشا واستاذ و"ياله" وعم ...... حسب اللبس او الوظيفة
2- اصحاب السيات واصحاب المرسيدس زى ما زميلنا قال
3- ملتحى وغير ملتحى، مصلى وغير مصلى
4- مسيحى بيصوم ومسيحى لا يصوم – مصيحى بيصوم وينقطع عن الطعام ومسيحى يصوم ولا ينقطع ..
المشكله فينا احنا اننا بنحب نحكم على الناس وننتدخل فى حياتهم ولبسهم وحتى صلاتهم ... نحشر مناخيرنا فى مظهر وجوهر اللى قدامنا ونشغل نفسنا بيه وبعاداته وطباعه وشكله وطريقة مشيته وطريقة سواقته وتسريحة شعره وماركات هدومة والوانها اكتر من انشغالنا بخيبتنا
الحل؟ فى رأيى برضه ..... كل واحد يخلليه فى حالة ويتعامل مع اللى قدامه على انه بنى آدم فقط وفى اطار الموقف اللى جمعهم طالما انه مايعرفوش وبلاش الاحكام المسبقة، ولو عرفه وعاشرة يكون انطباع عن "البنى آدم ده بس" مش كل من هم على شاكلته، لأن اساسا مافيش حد على شاكله حد لان فى كل طايفة وكل مله وكل جماعه وكل مهنة وكل وأى تقسيم مجتمعى يوجد الكويس والوحش
أرجو اكون وضحت وجهة نظرى كويس ... وبالمناسبة انا شخصيا اطلقت لحيتى فى فترة من حياتى وحصلى مواقف طريفة كتير قوى