الموضوع: مشكلة قابلتني وشاكك في طلمبة البنزين... ومحتاج اراءكم.

من يومين تقريبآ حصل موضوع غريب.

اول يوم: جيت ادور العربيه الصبح مادارتش.
المارش طبيعي (مابيعتلش) وصوت الماكينة طبيعي وكأنها حتدور. لكن مابتدورش (بالظبط زي ماتكون مشطبة بنزين او شرقانة (لو كربراتير ماعرفش الانجكشن بتشرق ولا لأ)

المهم فتحت الكبوت. وأكدت علي فيش الانجكشن والموبينه والحساسات. وجيت ادور دارت تمام.

تاني يوم: اتكرر الموضوع واتحل بنفس الطريقة.

وتاني يوم بالليل بعد ماخلصت شغل: بادور العربيه ماسمعتش صوت تحضير طلمبة البنزين ومادارتش (نفس المشكلة بس المرتين اللي قبل كده كنت الظهر ومن الهيصه ماركزتش مع صوت الطلمبة )
فتحت الكبوت وشلت كتاوت الطلمبه وثبته كويس وأكدت تثبيت الفيش. وجيت ادور دارت.
والنهارده الصبح دارت من اول لمسة.

واتذكر من اسبوع عملت الحركة دي بعد ما فولت من البنزينه.


ليا استفسارين :

1- هل ممكن تكون المشكلة دي فعلا من الطلمبة.
2- لو المشكلة من الطلمبة. اجيب واحده احتياطي معايا (انا باسافر كتير علي طرق غير مأهولة)
ولا لو لاقدر الله عملتها علي الطريق ممكن افك الطلمبة واتعامل معاها(تنظيف مثلآ).

فى المقطع ده الأجابه باللون الأزرق (كتاوت طلمبة البنزين)

تسلم يا حبيب قلبي...

هو فعلآ انا دلوقتي شكيت في الكتاوت بنسبة 90 % بعد اللي حصل النهاردة.

من 3 ساعات كنت في سفر... وفي اثناء مروري ببلد ارياف علي الطريق فوجئت بالعربية بطلت (وماحسيتش بيها الا لما الباور فصل والفرامل حجرت لأن الماكينة عندي والحمد لله مالهاش صوت )

المهم كنت في وسط الطريق. اديتها الاولاني وكام سنة مارش علشان اركنها يمين (مع اني عارف انه غلط. بس كنت مضطر لان الطريق وقف )
و جيت ادور مادارتش.

المهم فتحت الكبوت (شيلت فيشة الموبينه وركبتها تاني وكمان فيشة الانجكشن ) وجيت ادور برده مادارتش.
ركزت مع صوت طلمبة البنزين مع فتح الكونتاكت. مش سامعها بتحضر ومع التكرار حضرت. والعربيه دارت... وكان غايب عن فكري موضوع الكتاوت...
وصلت بالسلامه وخلصت الشغل... وانا راجع من 1/2 ساعه وفي حته مقطوعه في الزراعي مافيهاش سريخ ابن يومين... والدنيا ضلمه كحل.
عملتها معايا يا رجاله....
انا قلبي رفرف من الخضة... (ماباحبش موضوع الاحتمالات والدنيا تتظبط بالبركة كده... لازم ابقي فاهم اليله فيها ايه )

نزلت وكالعاده (مانا بقيت متعود بقي )
فتحت الكبوت وعملت اللي عملته في ال 3 مرات اللي فاتم.
وجيت اجرب... الطلمبة مابتحضرش.
أكدت علي الكاوت وجربت... دارت تمام.

وانا لسه واصل حالآ.


كده ثبتت الرؤيا انها بنسبة 90 % كتاوت كان مهزوز.
( وبالاخص ان الطريق كان كله مدقات بقايا طين مكلكعه من المطر عاملة زي عيون القطط المتتابعه )


طيب انا عاوز رأيكم معايا.
وسيبوني افكر معاكم بصوت عالي

1- الشك ان الكتاوت كان مهزوز وده انا حأكد عليه بكره في النور وانظف مكانه بال WD40 واحتمال كبير جدآ ان شاء الله ان المشكلة تتحل.

2- لو الكتاوت نفسه هو اللي بيعلق (بايظ او علي وشك).
طيب فرضآ الموضوع ده حصل معايا والكتاوت فصل نهائي علي الطريق... هل ممكن الغي الكتاوت واعمل كوبري علي اطرافه مؤقتآ لحد ما اوصل. ولا ده يحكون له تأثر غلط علي الطلمبة.

تعالوا نشوف الاول وظيفة الكتاوت من البحث في جوجل.

الكتاوت دي ملفات كهربائية الهدف منها إخراج قدرة كهربيه أكبر من القدره الداخلة إليها..يعني بتخرج كهربا أكتر من إللي داخلة لها. وأصل الكلمة cut-out.
والمسمي العلمي RELAY
http://en.wikipedia.org/wiki/Relays

الكتاوت وظيفته حسب نوعه.
1- توزيع الكهربا (الامبير) وفي الاغلب رفع الأمبير كالمستخدم في تقوية الاضاءة.
أو تحديد الأمبير كالكتاوت الموجود بالدينامو والذي يتحكم بشحن البطارية ثم يفصل عن اكتمال الشحن وهكذا في CLOSED LOOP
2- تغيير اتجاه القولتية ( من السالب الي الموجب)

طيب من الكلام اللي فات برده ماوصلتش لحل.

كتاوت طلمبة البنزين هل ممكن الغيها وؤقتآ في حالة الطوارئ.
ولا ده حيتسبب في وصول كهرباء اقل للطلمبة فمش حتقوم بعملها.


طبعآ الموضوع اسهل من كده اني اجيب كتاوت تاني احتياطي او اركب جديد واخلي ده احتياطي بس احنا عاوزين نفهم.

بس يا جماعه اللي خلاني اتوسع في وصف المشكلة... انه اكيد حد حيستفيد وممكن تحصل له المشكلة دي ولازم يتصرف...