ضربت الرقم القياسى فى البنزين

**samirayad** · 26-03-2009 07:05 PM

شوف لو العربيه بدور معاك كويس ومن أول مره .....ومع الأستهلاك العالى ده ......ومع عدم وجود تسريب للبنزين من الخراطيم .......................

*** عاوزك تحل الخرطوم بتاع الفاكيوم اللى رايح من آخر مجمع الهواء (الأنتفاخ المعدنى اللى راكب على جسم الخانق )......الخرطوم ده كاوتش ورفيع زى بتاع حساس الماب .......

_ وبيودى هواء تخلخل لبلف منظم ضغط البنزين (اللى راكب على آخر مسطرة الرشاشات )..........._ لما تحل الخرطوم ده من على البلف ولقيته فيه بنزين (يبقى البلف بايظ وهو سبب الليله اللى عندك دى كلها ).................

**jojowork1** · 27-03-2009 12:15 AM

يا باشا ميرسي بس ممكن توضح اكتر وياريت لو فيه صوره كده

**mmmmgogommmm** · 27-03-2009 07:58 AM

صباح الخير لازم تروح التوكيل حتى لو الضمان منتهى يحطوها على الاسكانر ويشوفوا المشكلة فى اية ويعملوا مراجعات شاملة على دايرة البنزين فى التوكيل بس برة التوكيل ممكن تدفع اكتر وعلى الفاضى

**samirayad** · 27-03-2009 08:20 AM

المشاركة الأصلية كتبت بواسطة jojowork1

يا باشا ميرسي بس ممكن توضح اكتر وياريت لو فيه صوره كده

_ شوف أنا نسخت ليك صوره من رد لأخونا محمد وعليه الأنتفاخ المعدنى (اللى هو عامل دايره عليه ومسميه intake manifold.....الخرطوم اللى بأقولك عليه رفيع وبيأخد هواء من آخره (من عند الجنب اللى مش باين فى الخلف ....مش الجنب المفتوح قدامنا واللى بيركب عليه جسم الخانق ).........لو بصيت عليه من الخلف حتلاقى الخرطوم خارج منه ورايح على بلف منظم ضغط البنزين اللى على آخر مسطرة الرشاشات (حله وشوف فيه بنزين ولا لا......بس طبعا بعد ماتدور العربيه شويه الأول......قول بعد 5 دقايق مثلا )......ولو كان واقع وراء الأنتفاخ ده ....برضه نفس النتيجه (حيكون فقط عاوز يتركب علشان يشغل البلف ).........والحاجه اللى تلاقيها من الأثنين دول (سواء راكب وفيه بنزين أو مش راكب أساسا حتكون هى السبب فى الأستهلاك الرهيب اللى عندك )

**abouzaid555** · 27-03-2009 10:37 AM

هى الصورة اللى حضرتك حاططها يا استاذ سمير بتاعت عربية نوعها ايه بالتاكيد مش لانوس صح

**samirayad** · 27-03-2009 10:47 AM

المشاركة الأصلية كتبت بواسطة abouzaid555

هى الصورة اللى حضرتك حاططها يا استاذ سمير بتاعت عربية نوعها ايه بالتاكيد مش لانوس صح

هى فعلا مش لانوس .....بس الهدف هو التوضيح (وعامة أخونا محمد أكيد هو اللى يعرف المحرك ده لأى عربيه ).........وعلى فكره الأنتفاخ المعدنى ده مش المانيفولد علميا ......لأن المانيفولد هو اللى راكب على سحب المحرك وليه أربع تشعبات ....ولكن ده ليه أسم أنجلش تانى Plenum ومعناه أنتفاخ معدنى

**jojowork1** · 28-03-2009 11:14 AM

كان ليا سؤال للخبراء هو الرشاش عباره عن بوابه بتفتح وتقفل وبيعتمد على ضخ الطورمبه ولا هو نفسه بيضخ لانى شايف فى تشريحه حاجه مكتوب عليه اسبرينج بس مش واضحه يارت لوحد يعر فيفدنى عشان بفكر فى فكره كده

**samirayad** · 28-03-2009 02:49 PM

_ الرشاش عباره عن جسم أسطوانى وجواه قلب من الحديد المغناطيس .....وحول القلب بيوجد الكويل الكهربى .................

_ساعة مابيروح كهرباء للكويل ده بيولد مجال كهربى بيجذب قلب الرشاش لفوق وكده بيفتح الرشاش .....

_زمن الفتح ده بيحدد بواسطة وحدة التحكم وبيسمى نبضة الحقن pulse widith وده بيعتمد على الأشارات المختلفه اللى رايحه من الحساسات عن وضع معين مطلوب من المحرك............

_ يلاحظ أن الضغط بتاع البنزين داخل الرشاش لايتم رفعه بالرشاش وأنما بيعتمد على ضغط الطلمبه والضغط الموجود بمسطرة الرشاشات ...............

- من هنا نقدر نعتبر الرشاش مجرد ماسوره بيتم التحكم فى قفلها وفتحها لمرور البنزين فقط بواسطة وحدة التحكم من خلال تنبيه ملف الجذب اللى داخل الرشاش...............

دى صوره من أحد المواضيع وفى أقصى اليمين موجود الخرطوم اللى بأقولك عليه ....وعامل شكل حرف u مايل على جنبه ورايح لبلف تنظيم ضغط البنزين.....(والصوره دى من موضوع لأخونا أبو يوسف......وياريت بعد كده يسمح لنا بأخذ أى صوره لتوضيح أى شىء ....كأفاده للجميع .....وطبعا هو أستاذ فى كل حاجه وخصوصا موضوع التوضيح يالصور ....أنما أنا على قدى فى أمور الصور دى .....فياريت يدينا الgreen line وله شكرى طبعا )

**jojowork1** · 29-03-2009 11:19 AM

ميرسي يا باشمهندس انا وصلت للخرطوم وشفته وعملت زى ماحضرتك قولت هو راكب ومفهوش بنزين خالص ولما شلته والعربيه دايره صوتها على ومش وشكرا ليك اعتقد كده ان البلف سليم