أنا يا جماعة باكتب الموضوع ده كخاطرة جت فى بالى فقط
أولا معايا لانوس 99 عاملة 120 الف كم مشتريها من 3 سنين
أنا من النوع اللى بيحب كل حاجة فى العربية تبقى مظبوطة تمام
فكان عندي شوية مشاكل:
1- نقص مياه دورة التبريد:
غيرت رادياتير وغيرت طرمبة مياه وغيرت ماسورة التوزيع الفيبر وغيرت القربة وبرضه المشكلة لسه موجودة ولكن بشكل أقل يعني بزود كوب مياه كل أسبوعين ولا أعاني من أى مشاكل فى الحرارة

2- ترشيح زيت موتور وفتيس مع عدم نقص الزيوت يعني مجرد ترشيح بس:
غيرت جوان غطاء كارتيرة فتيس و 2 أويل سيل كوبلين وأويل سيل كرنك خلفى وحلينا الفتيس كله وفى الاخر لسه الترشيح موجود

3- مشاكل العفشة المتكررة:
كل شوية أغير حاجة فى العفشة وتبقى الدنيا فل وبعد شوية ترجع تدبدب تاني

4- شحن التكييف بتاع اربع خمس مرات كل صيف:
غيرت بلف الكومبروسور وكل الاويل سيلات وبرضه الفريون يقعد شهر زى الفل وبعدين يسرب.

5- اروح اعمل صيانة و أغير سيور وزيوت بعد ما اغير الاقى اصوات جديدة جميلة

ففي الاخر قررت اني اتعايش مع العربية واحبها على ماهي عليه وبقول برضه الست بقالها 10 سنين ماشية فى شوارع المحروسة والله أعلم اللى قبلى عمل فيها ايه
وبقول الواحد يبص لجسمه اللى هو عنده اغلى من العربية طبعا تلاقى دراعك مثلا لما تعمل حركة معينة يعمل طقطقة بسيطة أو صوت لطيف ودراعك شغال ومابيوجعكش فبتكبر دماغك طب اشمعنى لما تسمع صوت همسة فى العربية ماتعرفش تنام بالليل ؟

المهم العربية ماشية كويس وبثبات عالسرعات العالية واستهلاك بنزين فى الطبيعي والدوارة كويسة وما بتعملش حركات قلة معايا فقررت اتعايش مع باقى المشاكل علشان اعصابي ما تتعبش وهى:
1- نقص المياه فى دورة التبريد
2- ترشيح الزيت الخفيف اسفل الماكينة
3- مشاكل التكييف
4- مشاكل العفشة
5- حدفة يمين بسيطة
6- صوت ونة خفيفة بعد تغيير سير الكاتينة
7- رجرجة فى الفرامل على السرعات العالية فوق 120 (ودي المشكلة الوحيدة اللى بتأرقني فعلا واللى هاشوف لها حل قريب جدا ان شاء الله)

ورغم كل ماسبق فانا بموت فى عربيتي وبحبها جدا وفى علاقة غريبة بيني وبينها

صدعت دماغكم بس معلش سامحوني

مذكرات لانوساوي