الموضوع: رابطة عشاق و مالكى فيات سيينا بجميع موديلاتها

يا جماعة عندى شوية مشاكل صغيرة كده بس مضايقانى .. لو حد يعرف يقولى رأيه ..

1- الحرارة برضه ساعات المؤشر بيعدى النص فى الزحمة .. بقف وأفتح الكبوت ألاقى المروحة بتشتغل متأخر بعد ما المؤشر يعدى النص بشوية كتير وبتقف قبل ما ينزل عن النص أو حتى يوصله .. الغريب فى الموضوع إنى لاحظت إن لما المية بتنقص عن الحد الأدنى بتاع القربة بتشتغل كويس أزود المية وأخليها ما بين الشرطتين ألاقيها تهيس .. مش عارف ده عيب ترموستات ولا ايه ؟؟

2- الخرطوم اللى نازل من علبة زيت الباور بيسرب على خفيف .. كنت فى مركز روكسان غيرلى الكويل اللى ماسك الخرطوم .. بس بعدها لاحظت إنه لسه بيسرب .. رحت لميكانيكى تانى راح قاصص حتة من الخرطوم وركبه تانى بس برضه لسه بيسرب .. أعمل ايه أغير الخرطوم خالص ؟؟

3- كنت بحس بخبطة من تحت لو طلعت مرة وحدة أكن الموتور بيتحرك من مكانه أو ايه مش عارف .. فى مركز روكسان قالولى دى قواعد الموتور الخلفية والأمامى شمال .. غيرتهم .. الخلفية كان فيها كاوتشة مقطوعة لكن الأمامية بعد ما طلعت ملقتش فيها حاجة بس قلت مش مشكلة .. بس محستش بفرق .. وبرضه لو دست بنزين مرة وحدة بلاقى حاجة خبطت من تحت .. ممكن تكون حاجة تانية فى العفشة .. زى جلب المقصات مثلا ؟؟

4- كان فى تسريب زيت فتيس خفيف لقو السبب هو قطعة كده عبارة عن ترس بلاستيك وفيه قطعة الكترونية بيبقى راكب فى الفتيس ومتوصل بعداد السرعة لقاه مكسور فشاله وركب سلك العداد مباشرة فى الفتيس .. بس بعدها لقيت العداد بيرقص .. قلتله قالى أصل السلك مش راكب كويس ولازم تغير القاعدة اللى بيركب فيها أو تجيب القطعة اللى شلناها دى .. سألت عليها عند الكيلانى قالى بـ 300 جنيه .. .. سألت ميكانيكى تانى قالى غير السلك .. قلتله منا قبل ما أشيل القطعة دى كان شغال كويس قالى يبقى هاتها ..
أنا بصراحة زهقت من إفتاءات الصنايعية دول ..

كنت بقول مركز روكسان دول كويسين وفاهمين كويس لأنهم متخصصين فى الفيات .. إنما لقتهم برضه مش أوى ومش بيدوروا على سبب المشكلة بجد .. غير وخلاص .. واستسهال ..

حد يعرف مكان تانى أو ميكانيكى كويس أوى ؟؟

بالنسبه للحراره اعتقد ان المشكله من الثرموستات بس غريبه ان الميه لما تنقص التبريد يكون كويس (عندي بتعمل كده برضه ) بس مش معنى كده اننا نسيبها تنقص لااااااازم نزودها
بالنسبه للتسريب غير الخرطوم وريح دماغك
بالنسبه للخبطه هل هي عاديه ولا جامده اوي
ابقى طمنا عليك وربنا يحميك من اللي بيفتو في اي حاجه

المشاركة الأصلية كتبت بواسطة awazeer

بالنسبه للحراره اعتقد ان المشكله من الثرموستات بس غريبه ان الميه لما تنقص التبريد يكون كويس (عندي بتعمل كده برضه ) بس مش معنى كده اننا نسيبها تنقص لااااااازم نزودها
بالنسبه للتسريب غير الخرطوم وريح دماغك
بالنسبه للخبطه هل هي عاديه ولا جامده اوي
ابقى طمنا عليك وربنا يحميك من اللي بيفتو في اي حاجه

متشكر على الرد ..
طيب حضرتك بتعمل ايه فى موضوع الحرارة ؟؟ يعنى بتسيبها ناقصة ولا غيرت الترموستات والمشكلة اتحلت ولا ايه ؟
بالنسبة للخبطة فهى مش جامدة ومش بتحصل غير لو كانت العربية ماشية سلانسيه يعنى ماشى على الأول وبعدين أشيل رجلى من على البنزين فتبقى العربية ماشية بالقصور الذاتى وبعدين أدوس بنزين مرة واحدة جامد تقوم عاملة نطرة كده وأحس بخبطة جاية من تحت رجلى ..
كنت كشفت على العفشة من فترة قريبة والعفشجى قالى محتاجة جلب وبيض مقصات وتيش وبارات ... هل ممكن يكون السبب من الحاجات دى ؟

المشاركة الأصلية كتبت بواسطة ahmed hamdy

كنت كشفت على العفشة من فترة قريبة والعفشجى قالى محتاجة جلب وبيض مقصات وتيش وبارات ... هل ممكن يكون السبب من الحاجات دى ؟

هو ده السبب فعلا البيضات و البارات
بالنسبة لموضوع السخونة ده حاتلاقى الثرموستات مش مظبوط و الكتاوت بتاعت المروحة برضه لان المفروض السرعة الاولى للمروحة ما توصلش السخونة للنص و تعديه كمان

المشاركة الأصلية كتبت بواسطة Ahmed Hamdy

متشكر على الرد ..
طيب حضرتك بتعمل ايه فى موضوع الحرارة ؟؟ يعنى بتسيبها ناقصة ولا غيرت الترموستات والمشكلة اتحلت ولا ايه ؟
بالنسبة للخبطة فهى مش جامدة ومش بتحصل غير لو كانت العربية ماشية سلانسيه يعنى ماشى على الأول وبعدين أشيل رجلى من على البنزين فتبقى العربية ماشية بالقصور الذاتى وبعدين أدوس بنزين مرة واحدة جامد تقوم عاملة نطرة كده وأحس بخبطة جاية من تحت رجلى ..
كنت كشفت على العفشة من فترة قريبة والعفشجى قالى محتاجة جلب وبيض مقصات وتيش وبارات ... هل ممكن يكون السبب من الحاجات دى ؟

بزودها طبعا كل اسبوعين تقريبا
المفروض تبقى بين min , max و انا بزودها بالمقدار ده
مينفعش تسيبها ناقصه والا هتحصل مشاكل جامده
هو زي مالاخوه قالوا ممكن تكون كتاوت المروحه (الجزء اللي بيشغل المروحه لما الحراره توصل لدرجه معينه )
السرعه التانيه اخبارها ايه شغاله ولا لا (بتشتغل لما بتعدي النص )

المشاركة الأصلية كتبت بواسطة gemino

هو ده السبب فعلا البيضات و البارات
بالنسبة لموضوع السخونة ده حاتلاقى الثرموستات مش مظبوط و الكتاوت بتاعت المروحة برضه لان المفروض السرعة الاولى للمروحة ما توصلش السخونة للنص و تعديه كمان

شكرا على الرد ..
طيب ربنا يسهل ان شاء الله حغير المقصات والبارات وأشوف كده ..
بالنسبة للترموستات أغيرها يعنى ولا لو غيرت الكتاوت يبقى كفاية ؟