الموضوع: تاكيد حضور مقابله عيد ميلاد المنتدي - إبريل 2009 -

أخوانى الافاضل هذا شرح كامل و مفصل لمكان المقابلة بالهانوفيل :
حضرتك وانت جاى من الصحراوى من القاهرة بالسلامة ان شاء الله هتعدى بوابة الكارتة بتاعت اسكندرية و بعدين هتعدى العامرية من فوق الكوبرى طبعا و بعد الكوبرى هتلاقى بعد حوالى 300 متر ماكدونالدز على ايدك الشمال هتطول كمان شوية هتلاقى فى اول يوترن على الشمال بعد حوالى 10 متر من ماكدونالدز تعديه برده لان ده مدخل كينج مريوط و برج العرب بعده بحوالى 100 متر هتلاقى على اليمين شركة كبيرة ضخمة اسمها قشوع و افتكرها باسم ممدوح عبد العليم فى الفيلم كان اسمه رامى قشوع المهم بعدها بحوالى 50 متر فى اليوترن التانى هو ده اللى حضرتك هتلف منه واول ما تلف اكنك راجع تانى على القاهرة خليك على اليمين هتلاقى مدخل على ايدك اليمين وهو ده مدخل او طريق الكيلو 21 او طريق شاطىء النخيل المهم تدخل فيه و تمشى فيه طوالى و فى اخره هتلاقى ميدان بتاع الكيلو 21 هتدخل من عنده يمين و الطريق ده هو اللى فيه شاطىء النخيل و ابويوسف و الهانوفيل و البيطاش المهم اول ما هتدخل يمين فيه هتلاقى مدخل 6 اكتوبر او شاطىء النخيل على ايدك الشمال بحوالى 50 متر اوعى تدخل فيه برده هنكمل طوالى المهم بعد حوالى 5 كيلو هتلاقى على ايدك اليمين فتح الله جملة ماركت و فى قدامه بنزينة كبيرة الناحية التانية و جنبها مدخل الهانوفيل و عليه تمثال عروس البحر المهم حضرتك حتتطول شوية بعد فتح الله جملة ماركت و بعد حوالى 100 متر حتلاقى يوترن هتلف منه و تدخل فى المدخل اللى اتفقنا عليه و بكدة يبقى حضرتك دخلت الهانوفيل المهم هتاخد شارع الهانوفيل للاخر هتلاقى جمعية استهلاكية على ايدك اليمين قبل اخر الشارع بحاجة بسيطة انت لو سألت اى حد الجمعية فين هيقوللك اهيه هندخل من جنب الجمعية يمين و ده يعتبر اول شارع الحنفية من ناحية الهانوفيل و شارع الحنفية ده هو اللى رابط الهانوفيل بالبيطاش المهم بعد ماهندخل من جنب الجمعية يمين هنمشى مع الاسفلت و بعد حوالى 200 متر هنلاقى قرية فولكانو او فاروق صادق على ايدينا الشمال هندخل فيها هنلاقى البحر فى وشنا المهم الشقة رقمها 303 عمارة واحد على البحر مباشرة و العمارة لونها اصفر بجوار نادى شرطة القاهرة مباشرة و ارجو ما اكونش طولت على حضراتكم و تكون الوصفة سهلة و ما تتوهش
وتمنياتى لجميع اخوانى الاعضاء سفرا امنا هينا و قضاء وقت سعيد و ممتع فى احضان مدينة السحر و الجمال الاسكندرية و كل سنة و اعضاء نايل موتورز طيبين و بصحة و عافية و كل سنة و اخواننا المسيحيين طيبين و عيد سعيد ان شاء الله على الجميع