بص يا سيدى
انا هكلمك على اللى اعرفه من خلال ركوبى الاكسيل
الهاتش باك والسيدان والهاتش باك بتبقى كورى اما السيدان فى منها مصرى وده تعرفه من البلوك اللى على قايم الباب لو انتاج مصنع هيونداى تبقى كورى ولو انتاج بريما تبقى مصرى كمان من اول ارقام الشاسيه لو يبدأبحرف K تبقى كورى ولو Ae تبقى مصرى
العربيه فى منها 1300 و 1500
والكماليات تتراوح بين
كاسيت فقط
تكييف وكاسيت
تكييف وباور وكاسيت
تكييف وباور وكاسيت زجاج كهرباء

الافضل طبعا ال 1500 عشان التكييف

مميزات العربيه
ناعمه جدا حتى من غير باور
صوتها مقبول
قطع غيارها متوفره عند البقال بملاليم (الموتور كامل بالفتيس استيراد ب 1500)
شكلها شيك
رخيصه نسبيا
سهله البيع جدا

عيوبها

الصاج بتاعها بيطبق بسهوله بالذات الكبوت لو حتى حد بيغسلها واتغاشم وهو بيغسل الكبوت بيبان اثره وطبعا العربيه عندنا فى مصر بتتعمل مصطبه للشباب

التابلوه خامته تعبانه وبيشقق من الشمس بسرعه

بلى العجل بيعمل صوت ولازم يتغير كل فتره

العربيه كربراتير مش انجكشن ومش اقتصاديه فى البنزين بالمقارنه بنفس الفئه

الكبالن عمرها قصير نسبيا

يجب الاهتمام بحاله المساعدين الاماميين لان عدم تغيرهم بأنتظام بيتسبب فى شرخ مشهور فى الركبه اليمين واعتقد ان ده عيب فى تصميمها والشرخ ده بيكبر مع المطبات وبيعيب العربيه عند البيع


العربيه عموما كويسه بالنسبه لسعرها ومنتشره جدا وسهله الصيانه وربنا يوفقك
اعمل استخاره والافضل تشتريها من حد معرفه او اول يد مش من تاجر ولا معرض
ولو عندك اى اسئله انا تحت امرك
تحياتى
اشرف فتحى
أستاذ اشرف حضرتك فعلا افدتنى وزى ماهو واضح افدت العضو الاخ اللى كان نفسه يعرف سبب الشرخ فى الركبه اليمين وكمان انا هاأكد على السمكرى يبص على الركبه اليمين ان كان فى نصيب بامر الله
ومره تانيه انا عاجز عن الشكر لحضرتك