استشارة فنية (بخصوص الفتيس )رجاء الرد يا جماعة

**noureymo** · 09-09-2007 10:18 AM

صباح الخير يا جماعة
من حوالي شهر ونص لقيت الفتيس تقل معايا وفي عضة وكمان المارشدير بيزعق
رحت لميكانيكي واتنين وتلاتة المهم التشخيص كان الديسك رحت للميكانيكي بتاعي وغيرتهم وجربناها وكله تمام
تاني يوم حصلت نفس المشكلة تاني ولفيت نفس اللفة كان نفس التشخيص رجعت للميكانيكي الي عملها
قعد يلعب في سلك الدبرياج والمهم ما عملتش تاني ابدا.
اول امبارح وانا ماشي حسيت ان الغيارات مش ناعمة وفيه عضة تقريبا وكمان وانا بدوس على دواسة الدبرياج لقيت انها فيها عضة بسيطة بتحصل مرة كل 10مرات تقريبا وبعدها المارشدير بدأ يزعق تاني.
المهم انا مش عارف اعمل ايه دلوقت .هو ممكن يكون سلك الدبرياج ولا ايه.
انا عربيتي كيا برايد سايبا (الايراني ) وقطع الغيار الي جبتها قطع البرايد الاصلي الكوري
واعتقد ان كلنا متفقين ان توكيل الامل مش اد كده.
رجاء الافادة يا جماعة واسف للازعاج

**noureymo** · 10-09-2007 12:23 PM

ايه يا جماعة هي المشكلة دي جامدة اوي كده ومالهاش حل :( ولا انا الي كتبت الموضوع غلط ومش عارف اوصله ليكم صح :!:

**Abdallah** · 11-09-2007 05:19 PM

الحقيقة حضرتك بتتكلم عن عربية مش منتشرة اوى وبالتالى مفيش حد كتير يعرف عنها كويس ومواجهش نفس المشكلة.
*عضة الفتيس ممكن يبقى ليها كذا سبب زى ان زيت الفتيس ناقص او محتاج يتغير حسب كتالوج عربيتك اذا كان بيقول انك بتذودة بس ولا بتغيره كل كم معين.
*الدبرياج ممكن يبقى فيه مشكلة ودة معناه ان الاسطوانة مبتحكمش كويس على الديسك وبالتالى لما بتيجى تنقل بتنقل على 4/3 دبرياج مع انك دايس دبرياج كامل ودة طبعا بيبقى يا ديسك يا اسطوانة ويفضل تغيير الديسك والاسطوانة والبلية مع بعض .
*عصاية الفتيس لو مش مظبوطة هتحس ان فى عضة فى الفتيس و النقلات مش بتجيى مستريحة.

دى الاحتمالات الى فى دماغى حالية ومقدرش افتيك لانى معرفش عربيتك كويس.

**Santino** · 11-09-2007 10:54 PM

ممكن يكون الدبرياج عايز بس يعلي شوية وتلاقي الدنيا حلوه ,
حاجة تانيه صغيرة : إتأكد إن الدواسة الكاوتش اللي علي الأرض مش داخلة تحت دواسة الدبرياج , لأنها ممكن تمنعها من إنها توصل لآخر مشوارها و بالتالي الدبرياج مش ح يفصل كويس .
إنت غيرت سلك الدبرياج و إنت بتغير الديسك ؟

**noureymo** · 12-09-2007 08:58 AM

لأ بصراحة ما غيرتش سلك الدبرياج وأنا بغير الديسك لكن ناوي اغيره ان شاء الله المرة دي.
على فكرة يا استاذ عبدالله العربية الي احنا بنتكلم عنها دي هي العربية الكيا برايد السيدان الي كلنا عارفينها بس بدل ماهي متصنعة في كوريا متصنعة في ايران.
شكرا يا جماعة وكل سنة وانتم طيبين.

12-09-2007 02:33 PM

احمد باشا ، كل سنة وانت طيب

بص يا سيدى اول حاجة عايزك تبص علي دواسة الدبرياج المفروض انها اعلى من دواسة الفرامل وتفصل في نهاية التلت الاول من مشوارها ( من اسفل لاعلى )

كمان المفروض ان مشوارها سواء من اسفل لاعلي او العكس يكون سالك ومتحسش بعضة فيه

لو ده مش صح يبقي فيه مشكلة في السك

لو في بداية فصل الدبيرياج بتحس برعشة في العربية تبقي ديه اسطوانة

لو فيه رعشة جامدة في الغيارات الاول والتاني مع السرعات البطيئة ومع تشغيل التكييف يبقي اسطوانة

اخيرا لازم تغير زيت الفتيس بتاع الفابريكا كل الناس اللي اعرفها غيرتة والحمدلله مقابلتش مشاكل في مجموعة نقل الحركة عامة انا شخصيا غيرتة في صيانة 10.000 والزيت نزل (وسخ وفيه شوائب ) كتير جدا

يفضل انك تعمل كشف برة التوكيل ( الامل) انصحك تروح مركز عبر البلاد تابع لتوكيل كيا القديم والناس ديه حافظة العربية صم كمان فيه اتنين ميكانيكة كانوا شغالين في التوكيل واحد اسمة محمد والتاني اسمة جرجس

للاسف مش لاقيلك نمر التليفون دلوقتي بس بس ممكن تكلمني علي بكره اكون جيبتلك نمر الاتنين الورشة ومركز عبر البلاد وان شاء الله بسيطة

( تليفوني بعتهولك بالميل )

**noureymo** · 12-09-2007 02:57 PM

شكرا يا وائل باشا على الرد وان شاء الله هكلم حضرتك بكرة اعرف منك الارقام ومكان المركز
وكل سنة وانت طيب

**noureymo** · 16-09-2007 10:59 AM

شكرا يا أبو نورا أنا رحت غيرت الزيت امبارح في بنزينة موبيل اول طريق مصر الاسماعيلية ما كانش فيه زيت 90
حطينا زيت متعدد الدرجات 85 - 140 بصراحة وانا طالع من عندهم لقيت الصوت الي في المارشدير ما بقاش موجود والنقلات بقت اسهل كتير جدا جدا لكن المارشدير برده مش سالك اوي لكن احسن كتيييييييييير من الاول أنا بفكر اغير سلك الدبرياج ايه رايكم.

16-09-2007 12:05 PM

الشكر لله ، بص هو عمر المارشديل ما بيبقي نقلة ناعمة لازم المارشديل يبقي اتقل نقلة في اي غيار بس انت لو حابب تغير سلك الدبرياج غيرة عشان انت كنت قلت ان مشوار الدواسة مش سالك لاكن مش شرط بعد ما تغيرة ان المارشديل يبقي ناعم ده اللي انا عايز اقولهولك
لو انت قريب من مصر الجديده قبل الفطار ( لحاااااااد الساعة 4 ) ممكن تعدى عليا نبص عليها مع بعض

**noureymo** · 16-09-2007 12:16 PM

شكرا يا وائل على اهتمامك ان شاء الله لو كنت في مصر الجديدة قبل اربعة هكلمك واجيلك المكان الي انت فيه ان شاء الله.
هو انت فين بالظبط في مصر الجديدة يعني لما اوصل فين اكلمك
وبرده شكرا ليك جدا جدا