هيونداي الينترا ولا كيا سيراتو 2009 الشكل الجديد

**mido9h** · 04-04-2009 09:38 PM

السلام عليكم
بصراحة بعد ما خلاص اقتنعت بالالنترا ومستي اخر شهر مايو علشان اجيبها فوجأت بالكيا السيراتو بشكلها الجديد الجامد جدا , طبعا سيبكو من الشعر الي الصحفيين بيشعروه عنها بعد اختبار القيادة بتعها في شرم يعني الناس دي كلها قعدت في شرم كام يوم وكلت وظبطط وجربت العربية بنفسها ولازم تدي الشركة حقها شوية :)
بس فعلا العربية حلوة وشكلها وهمي وانا دخلت علي موقع كيا http://www.kia-cerato.com/ وشوفت العربية وتصميمها الرائع وامكانيتها المذهلة مع ان سعرها غالي شوية علي انها برضه لسه كوري وعلي فكرة هي نزله باربع طرازات وديه امكانياتها واسعارها
طراز LX:-
ناقل يدوي, تكيف يدوي, وسائد هوائية للسائق, اطارات قياس 15بوصة, باور ستيرينج, و قفل مركزي للأبواب, اغلاق اوتوماتيكي للأبواب بمجرد التحرك, زجاج كهربائي امامي و خلفي, مرايات كهربائية حرارية بأشارة, راديو CD,MP3 DOUBLE DIN و فتحة USB, IPOD, ESC,1 AIR BAG,
وبدون ABS, EBD
السعر: 96000 جنيه

طراز EX:-
نفس طراز LX و لكن ناقل الحركة اوتوماتيكي, جنوط سبور مقاس 16بوصة, تحكم عن بعد في نظام غلق و فتح الأبواب, مسند يد امامي, زجاج ملون, فوانيس ضباب, حامل اكواب خلفي و مسند خلفي... ESC, 1 AIR BAG
وبدون ABS, EBD
السعر: 109000جنيه

طراز SX:-
نفس طراز EX و يزيد عليها وسائد هوائية للراكب الأمامي, جنوط سبور مقاس 17بوصة عريضة, حساسات ركن السيارة, عجلة قيادة جلد فخمة, اضاءه اوتوماتيكية, و مسند يد امامي و جزء من عجلة القيادة مطلي بطلاء معدني, ناقل حركة و مقابض و فرامل يد كروم, فتحة سقف اختيارية, كمبيوتر للسائق... ABS, EBD, ESC, 2 AIR BAGS, طارة مالتي, حساس ركن, فرش عادي مش جلد
السعر: 116000 جنيه (بدون فتحة سقف)
السعر: 120000 جنيه (بفتحة سقف)

طراز HIGH LINE SX:-
نفس طراز SX و يزيد بعجلة قيادة متعددة الوظائف, فرش جلد طبيعي, نظام التشغيل الذكي للسيارة (بدون مفتاح), فتحة سقف كهربائية, فتح السيارة باللمس.... كل حاجه فيها
السعر: 126000 جنيه
المواصفات مقتبسة من منتدي كيا وشكر للعضو المهندس غازي .
وخايف اجيبها سعرها ينزل علشان طبيعي العربية اول لما بتنزل بيبقي سعرها عالي وبعد كده سعرها بيقل .
يعني انا اعرف مثلا ان تصارع السيراتو من 0-100 (10.3 ثانية) بس معرف للاسف في الالنترا قد ايه يعني لو حد يعرف يفيدني اجيب الينترا ولا سيراتو احسن وده طبعا من غير تحيز وياريت يكون عن معلومات مؤكدة .
واسف علي الاطالة :)

**outosend** · 04-04-2009 10:07 PM

رأيى الكيا الجديده اعلى فنيا من الالنترا(انا معايا النترا)بس حاسس انها غاليه شويه علشان تبدأ فى الكلام بتتكلم على اللى ب 116 الف بس دى اسعار الوكيل مش اسعار الخليجى صح ؟

**حماده المصري** · 04-04-2009 10:40 PM

هماا الاتنين مشييهم واحد تقريبا لانهم احتمال كبير جدا ان مكانش اكيد انهم عفشه وحده

ف المشي هتلاقيه متقارب الى حد كبير

طبعا السيراتو متفوقه في الكماليات بدون كلام وشكل جديد مشجع جدا جدا انه الناس تشتريه

ده الالنترا الي كانت ب 122 مفيهاش نص الى في العربيه دي

ف الكيا تسكب ولو العربييتن عفشه وحده يعني قطع غيار وحده يبقى مفيش مقارنه في اسعار قطع الفيار

اتمنى ال esc الي حضرتك بتتكلم عنه يبقى هو نظام التحكم الالكتروني بالثبات

لو كده يبقى فعلا توكيل بيفهم جدا جدا

**حماده المصري** · 04-04-2009 10:42 PM

التسارع الي حضرتك كاتبه ده تقريبا بتاع الالنترا

وعامه الالنترا اسرع من السيراتو

من ايام الموديلات القديمه الي كانت مواتيرها 107 حصان كانت النترا اسرعه بفرق واضح

اكيد الموتور الجديد بتاع الكيا افضل برضو بكتيير

وعامه حتى لو الكيا اقل من النترا في التسارع

ف في نظري الكيا تكسب برضو كعربيه بكل المقاييس

**Ahmed Anwer** · 04-04-2009 10:52 PM

انا اتفرجت علي السيراتو الجديدة

احبطت شوية

لسببين

أولا ، العربية شكلها من بره كبير لكن متدييش نفس الاحساس من جوه

ثانيا ،التابلوه طبعا تصميمه تحفه و لكن خاماته ناشفه مش طرية زي الالنترا او حتي السيراتو القديمة

يعني حسيت ان الفكرة بس في الوش الجديد

لكن طبعا طبعا بعد المواصفات اللي نازلها بيها دي

خاصة نظام الثبات الاكتروني ،،

و ده نظام جامد و عليها ريفيوهات جامدة و هوا اللي خلي تقارير المستهلك الامريكية تختار الانترا افضل سيارة في فئتها لانه بينزل هناك تجهيز اساسي فيها

اعتقد ان السيراتو تعتبر افضل من حيث المواصفات و التميز لأن الانترا كترت جدا جدا بطريقة سخيفة

و كمان الضمان خمس سنين

و بخصوص اعادة البيع و الانتشار اعتقد ان السيراتو الجديدة هتنتشر جامد و ده واضح من حملة الدعاية القوية و كمان شكلها الحلو هيجذب الناس ليها غير السيراتو القديمة

**sayandro** · 04-04-2009 11:24 PM

الإثنين حلوين الإثنين طعمين محتار اشتري مين ..... عموما السيراتو تكنولوجيا اكيد اعلي لكن الإلنترا عمليا اكيد افضل واوسع شوية عن السيراتوز الخامات انا موش شايف فرق لكن لايمكن التعليق يكون متشابة والقدرة الحصانية اكيد مختلفة مع ملاحظة ان الإلنترا محركها من الجيل الرابع cvvبس معرفش محرك السيراتو هل يحتوي تكنولوجيا اعلي ام متشابة

**HamadaMOMO** · 05-04-2009 12:25 AM

بص يا مان العربيتين واحد من جهة الخامات والعفشة والتسارع والمحرك تقريبا
الفرق فى الكماليات وكلة بثمنة انا من وجهة نظرى لو انت جاهز توكل على الله وروح التوكيل و اعمل تست دريف للسيراتو ولو عجبتك اشترى متترددش

**HamadaMOMO** · 05-04-2009 12:33 AM

المشاركة الأصلية كتبت بواسطة outosend

رأيى الكيا الجديده اعلى فنيا من الالنترا(انا معايا النترا)بس حاسس انها غاليه شويه علشان تبدأ فى الكلام بتتكلم على اللى ب 116 الف بس دى اسعار الوكيل مش اسعار الخليجى صح ؟

ياباشا مفيش حاجة فنيا اعلى من الثانية الفرق فى التوكيل المحترم الى بيجيب العربية كاملة والزبون يشترى اما توكيل هيونداى بيجيب العربية بدون اى مزايا ولو فيها حاجة يعرف يشيلها والله حيشيلها