اسوأ صنايعيه للبيتلز

**ahmed2y** · 08-04-2009 03:13 PM

السلام عاليكم
اولا تحياتى للجميع
بالنسبة بقى لعصام الى فى الشرفا كنت كل ما اسئلة على حاجة فى قطع الغيار يدينى اسعار وهمية كوبلن مثلا يقولى 600 جنية واروح اسال بعدها بعد ما بطلت اروحلة بعدها بفترة الاقى الكوبلن ب80 جنية واية كوم على بعضة ونقى واختار النت عاوزة وعلى التجربة وكمان بعد ما ركبتهم معجبونيش رجعتهم وخدت الفلوس تانى وكان قبلها الفرامل مش تمام قال للحج ولان العربية بتاعى والدى فى الاصل لا دى عاوزة طنابير ولان الحج عندى لارج فى تعاملاتة وبيبقى عارف انة بيتسرق بس بيقول النعرفة احسن من المانعرفوش غيرهم 2*2 واصبح الطنابير كلها جديدة استيراد من عند يحيى كمال ووبردو الفرامل وحشة ويقولى لا لا هتبقى كويسة بعدها انت بس الى موسوس لاحد مرة قولت لا بقى كدة مش هينفع روحتلة وفى واحد معاة مش فاكر اسمة اية طلع معايا وجرب قالى لا كدة ما دام الدواسة تدوس مرة تلاقيها ومرة لا يبقى مستر عمرمى قالى نعملى طقم اصلاح وانا ابدا اصلاح اية غير المستر كلة هو انا فاضى يا عم ولا بتاع اصلاح الغالى تمنة فية نغير المستر ونجرب ونمشى كام يوم وبردو الى فيها فيها اكشف تانى مستر خلفى بيسرب عاوز كاوتش ماشى بردو مفيش فرامل فك تانى نفس المستر بيجيب زيت غير المستر كلة لحد ما عرفت انة مفيش فايدة مع الراجل دة حصل بقى بعد كدة حاجتين قرر بعدهم انة خلاص الراجل دة لام يتعمل عالية Delete سلك الدبرياج فك منى مرة وانا راجع من الشغل كنا فى رمضان اظن المهم جبت واحد من على الطريق شبك مكان العصفورة الى بتمسك بصامولة ورحتلة تانى يوم يعمل الازم نزل بص قالى تمام قولتة يعنى اية قالى العاملها عاملها كويس يا عم طب فك ولا ركب حسسنى انك عملت حاجة قالى لا تمام مفهاش حاجة اعملها المهم قطع بيا السلك نفس اليوم باليل روتلة بتاكسى خد واحد من عندة وربطهالى تانى وروحت عندة قالى السلك بايظ قولتة غير المهم غير وتمام التمام قولت بينى وبين نفسى امال كنت عمالى تقولى كويسة وزى الفل المهم جت بقى القشة الى قسمت ظهر البعير بينى وبينة متور العربة عندى كنت عاملة عمرة محترة ومحولة من 1600 الى 1300 وكان المتور تقريبا جديد ناعم جدا وسريع مقدرش اقولكم بس العيب الوحيد الكربراتير بتاع 1600 وهى اصبحت 1300 وكمان كان مش كويس وكان بينزل بنزين زيادة على البوجيهات يخليها تكربن والعربية تقطع وكنت فعلا واثق من كلامى بعد تجارب كتير وهو كمان قالى نفس الكلام وقالى لو كدة ممكن تروح لواحد بتعا كربراتير بس فى شبرا قالى هو هيظبطلك الموضوع تمام لحد كدة اروحلة مرة بقى بعد الشغل بتقطع العربية يفك بوجية ويقولى اية البوجية عالية زيت لازم نعمل طقم شنبر يا عم دا انا عامل عمرة مكملتش 8 شهور منهم 6 شهور العربية مركونة قالى لا اصل العمرة الى عملها عملها مش مظبوطة وللعلم الى عمل العمرة دى واحد دكتور فى الفلوكس بس قلة الاصل بتاعتة الى خالتنا نبطل نتعمل معاة وبعد الموقف دة مبقاش فى عصام وبطلت اروحلة طبعا الى جانب الى كنت بشوفة بيعملة فى عربيات الناس دا مرة لقيتة بيقطع دونجل عربية وبيلحم فسالتة مردش عاليا سالتة تانى وتالت مردش وعامل نفسة مش سامعنى قولتلة انت مبترودش لية قالى لا ابدا فقالى انا بقطع الدونجل ولحمة تانى من فوق شوية عشان صاحب العربية عاوز يعليها طبعا كلام ميدخلش العقل
وارجو مكنت طولت عاليكو يا شباب
وسلامى للجميع استاذ هاشم والاستاذ الحسينى والاستاذ ايهاب

**ihab** · 08-04-2009 05:14 PM

اومال انت بتتعامل مع مين دلوقتى يا استاذ احمد
انا برضه كنت بتعامل مع عصام لانه قريب من البيت بس اخيرا ما بقيتش اتعامل معاه

**ahmed2y** · 09-04-2009 12:32 PM

السلامو عاليكم

والله يا استاذ ايهاب بعد الف والدوران انا مسبتش حد الا وبقيت اتعامل معاة عشان اعرف الحلو من الوحش وبجرب الاول فى حاجات بسيطة واشوف لانى وصلت ليقين ان مفيش صنايعى امين الا واحد بس خالد رباب بتاع العفشة اما بالنسبة للمكانيكى ففى 2 واحد اسمة اشرف فى ترعة الجبل الزيتون وواحد تانى عرفتة بالصدفة اسمة الاسطى مديح راجل محترم وبرضو الى ميعملوش اشرف اروح لمديح بقيت انا الى اصلح مش هما هما يفكو ويركبو بس وكمان الحج محمد على انا مرجتلوش بس اتفرجت عالية على ال youtube والناس هنا بتشكر فية وباين عالية من كلامة وسنة الكبير ربنا يديلة الصحة ان محترم وفهمان
وحضرتك بتتعامل مع مين

**ابوهاشم** · 10-04-2009 12:20 PM

هو مديح ده اللى فى شارع احمد سعيد ولا فين

**ابوهاشم** · 10-04-2009 12:27 PM

انت عارف يااستاذ احمد ان المشكله انك لما بتروح لاى ميكانيكى فى حاجه سهله وعبيطه
تلاقيه معاك زى الفل ومعامله مافيش بعد كده ويحسسك انه دكتور فعلا
لكن نيجى بقى لو فى عيب جوهرى ويكون فى الاصل حاجه بسيطه بس كل الحكايه انها محتاجه واحد بيفهم فعلا ويحدد المشكله منين على طول مش يقلبلك كيان العربيه كلها ويجيبلك عليها واطيها علشان يدور على العيب منين وفى الاخر وبعد تكاليف مضنيه من جيبك ودوخه وتوهان معاه وتكتشف فى الاخر
انك اساسا كنت عند مكوجى مش ميكانيكى
مع الاسف الشديد حتى الان مش لاقى ميكانيكى فى كل الصفات الكامله فى كل شئ فى العربيه
يعنى كل واحد وله مميزات وله عيوب
محمد على راجل امين ومحترم وفاهم بس سنه كبير وبيشتغل على قده وابنه عمرو مش دايما معاه
واحيانا كتير بروحله وبرغم المشوار اللى بعانيه لحد عنده من المعادى لعرب الجسر الاقيه اما مش فاضى او يريح دماغه ويقولك العربيه مافيهاش حاجه
وادينا بنجرب كل شويه واحد لحد ماربنا يكرمنا بواحد نثق فيه وندل بعض عليه

**ahmed2y** · 11-04-2009 02:38 PM

السلام عاليكم جميعا يا شباب

والله يا استاذ هاشم الى انت قولتة دالوقتى دة هو بالظبط الى بيحصل معايا
وكانت خبرتى بالصيانة والميكانيكية وخلافة قليلة يعنى بقالى 8 شهور لما بدات اركبها كتير بعد ما ولدى اشترى عربية تانية وهى معانا من زمان من حوالى 18 سة بس مكنش فى احتكاك بينى وبين الصيانة والصنايعية وخلافة بس من يوم ما بدات المشوار لقيت نفس النت بتحكى عالية تتعامل مع الصنايعى من دول ياخدك على كفوف الراحة وعنايا والنت عاوزة والشاى والكرسى ينى عشان الباشا وتانى وتالت مرة اول ما يحس انك خلاص بقيت معاة وانك متقدرتش تستغنى عنة تروحلة على عيب يقولك لا تمام مفيش حاجة يا عم دا انت الى عاملها يقولك لا هى كدة مظبوطة وفى الاول كان يشتغل فيها هو بايدة ويديك ايحاء بالاهتمام بس بعد كدة يسبها لاى حد من الصنايعية وكنت فى الاول بقفل مع ناس وانهى التعامل معاهم وكنت بقول لنفسى كل مرة وانا فى بداية تعامل جديد واول تعارف لا هو دة خلاص مش هروح لحد غيرة باين عالية ابن حلال ومحترم ويطلع زى زى القبلة فوصلك لحاجة مهمة جدا .

اولا :مفيش حاجة اسمها ميكانيكى كويس وهو احسن واحد

ثانيا : وثانيا دى هتبقى مهمة تقريبا لينا او لكل واحد بيفهم فى العربيات وهى اعرف عربيتك بنفسك محدش هيعرف عربيتك غيرك ودة هيخاليك متعتمدش على حد وانت الى هتحد العيب فين والتصليح فين وو طبعا عمرة ما هيكون فى استغناء عن الميكانيكى بس على الاقل مش هتحتاج لواحد بس والى مش هيعملهولك فلان غيرة هيعملة وبعد فترة هتلاقى نفسك عرفت حاجات كتير ودة الى حصل معايا دالوقتى بقيت اعرف اظبط العربية من ناحية كهرباء الموتور وتعلى وتوطى الدبرياج ازاى والكاتاوت كمان خدت منى مشوار كويس

ثالثا: لا تعتمد على ميكانيكى واحد وخلى علاقتك كويسة باكتر من واحد والى ميعملوش فلان فلان يعملة

رابعا ودى للاستاذ هاشم مخصوص وطبعا بقى الاعضاء الاعزاء وهى عن عنوان مديح هو فى شارع سنان فى الزيتون من ناحية شارع جسر السويس ووالوصفة بتاعتة هى كالاتى

شارع جسر السويس فى الاتجاة الى جاى من حديقة بدر الى مصر الجديدة يعنى بالظبط كدة بعد نازلة كوبرى التجنيد هتفضل ماشى على طول مش كتير بعد الكوبرى على اليمين وانت ماشى هتلاقى بنزينة اظن التعاون مش فاكر بالظبط جنبها على طول هتلاقى مكانيكى جولف ادخل الشارع الى بعد بتاع الجولف على طول امشى شوية بتاع 60 او 70 متر هتلاقى على الشمال الورشة على ناصية وطبعا او ما تلاقى عربيات فلوكس كتير تعرف انك توهت والحمد لله ههههههههههههه
شكلهم بيبقى حلو وهما واقفين منطورين على الجنبين هتحس ان فى بينك وبين الفلوكسات اولفة جامدة وربنا يوفئك الجميع
واسف على الاطالة سمحونى ويا رب مكنش ضيف تقيل وانا فى خدمة اى حد محتاج اى استفسار وان شاء الله انا هكتب كل حاجة حصلت معايا عشان الكل يستفيد ومتعبش ويبقى ضحية الصنايعية الاستغلاليين

**ahit** · 11-04-2009 07:16 PM

السلام عليكم و رحمة الله و بركاته

بصراحة أنا متابع الموضوع من الأول لكن كنت مستنى ألاقى وقت عشان هاتكلم كتير شوية فى الموضوع ده , و إن شاء الله هارد على غالبية المشاركات فى الموضوع ده .

و بشكر هاشم حبيبى على المواضيع المميزة دى و المفيدة لينا كلنا , و بطلب من هاشم إنه يطلب من الإدارة إنهم يعدلو إسم الموضوع إلى :

( أسوأ صنايعية للفولكس بيتلز )

عشان نتكلم على الصنايعية كلهم مش الميكانيكية بس ( كهربائى - سروجى - سمكرى - و هكذا )

و بصورة عامة فعلاً مفيش ميكانيكى ممتاز فى كل حاجة فى البيتلز . و لكن ممكن تلاقى ميكانيكى ممتاز فى العمره و مش كويس فى التاكيهات ( طبعاً حاجة غريبة ) و ممكن تلاقى ميكانيكى كويس فى تركيب و ظبط سرفيس الكهرباء و مش كويس فى ظبط الماتور او العفشة و هكذا.
و كذلك الحال بالنسبة للسروجى , ممكن تلاقى سروجى ممتاز فى تظبيط الكراسى و مش كويس فى فرش الأرضية أو البييبان أو كويس فى الفرش الداخلى و ممتاز جداً فيه لكن مش كويس فى تظبيط الكراسى.
و أيضاً الكهربائى ممكن يكون ممتاز فى ضفيرة العربية و مش كويس فى المارش أو الدينامو و هكذا.

و فعلاً كلام ahmed2y سليم 100%

لا تعتمد على ميكانيكى واحد وخلى علاقتك كويسة باكتر من واحد والى ميعملوش فلان فلان يعملة

**Karim_Monir** · 11-04-2009 07:24 PM

موضوع هايل وممتاز وليا مداخلة عكس عنوان الموضوع
انتم ليه ماذكرتوش الحاج على الامور
اول وافضل واحسن ميكانيكي بيتلز في مصر
الراجلو ده من اللي اشتغلو في توكيل فولكس سنة 60 هو ومحمد على الكهربائي بتاع البيتلز برضه
على الامور فيالحرفيين في بلوك 6 راجل ايدة تتلف في حرير
ودلوقتي عشان نظرة ضعف بيشتغل بالسمع في الظبط وولادة قايمين بشغلة وصنايعية تانين هايلين فعلا
انا معدي عليا 3 عربيات بيتلز مالقتش افضل منه في كل ميكانيكية مصر في البيتلز
--------
اقترح تثبيت الموضوع لاهميتة

**ahit** · 11-04-2009 08:33 PM

المشاركة الأصلية كتبت بواسطة hashem1999

وانا قلقت جدا واتصلت بحبيبى احمد حسن علشان احكيله لقيته هو كمان حصل معاه موقف زى الزفت مع جمال بس انا مش هاحكيه وهسيبه هو اللى يحكيلنا عنه

الموقف كان صعب جداً يا جماعة لأنه أول مرة يحصلى فى حياتى و ربنا يكفيكم شر الغفلة

أنا الأسبوع اللى فات كنت أول مرة أتعامل مع محمد الأسمر الميكانيكى لأنى سمعت إنه ممتاز فى ظبت التاكيهات و موتور العربية و الكهرباء و رحتله و مشيت مبسوط جداً و الحمد لله و دخلت صلاح سالم و عديت نفق العروبة و دخلت النفق اللى بعده على طول يمين اللى بيخرج على عمارات العبور و شارع يوسف عباس و فى نص النفق سمعت صوت مش فاكره كويس و بعدين لقيت العربية بتحدف شمال فجأة و كانت هاتخبط فى أتوبس سياحة فامسكت الطارة جامد و حاولت ألفها يمين لقيت نفسى عمال أرزع فى الرصيف و الكربية هاتتقلب على الجنب اليمين و لقيت نفسى متعلق فى الطارة و العربية بتحك فى الرصيف و على جنبها تقريبا و فى ثوانى عدت عليا كيوم لقيت نفسى واقف و العربية ممورة و ورايا دخان رهيب و كل اللى حوليه بيقولولى الحمد لله إنك بخير و إحمد ربنا إنك سليم .
خرجت من العربية و قعدت حوالى 10 دقايق لغاية لما لميت أعصابى و لقيت الطاسات بتاعة العربية مطبقة و الكاوتش الأمامى يمين مفرقع و آثار الفرامل قبل العربية بحوالى 15 أو 20 متر و آثار الخبط فى الرصيف معلمه بردو .
المهم قولت أغير فردة الكاوتش بسرعة لأن المكان ده خطر جداً و العربيات بتيجى مسرعة و أنا وقفتى غلط على الرغم من إن كل العربيات منورة النور لأن الساعة كانت 7 مساءاً تقريباً.
حطيت المثلث العاكس قبل العربية و طلعت الكوريك و الإستبن و فكيت فردة الكاوتش و المفاجأة كان إن المقص مفكوك !!!!!!!!!!!!!! و معرفتش أجربه.

و المشكلة الحقسقية بدأت بالإتصال بجمال الميكانيكى اللى فى الفسطاط و عمرو محمد على إبن محمد على الميكانيكى و كمان محمد على الميكانيكى !!!!!!!!!!!!!!

جمال الأول قالى هابعتلك محسن أخويا ( محسن الميكانيكى أخو جمال ) و بعدين بعد ما قلتله العنوان و المكان اللى أنا فيه قالى آآآآآآآآآه معلش أنا ماليش فى عفشة 1302 و 1303 !!!!!!!!!
و أحسن حاجة روح لخالد رباب اللى فى صفط اللبن !!!!!!!!!1 يا جمال أنا العربية عطلانة و المقص مفكوك خالص و كمان الميزان بتاع العفشة !!!!! أروح إزاى بس قالى معلش أنا مش هاقدر أفيدك !!!!!!!

قولتله طب شوفلى عربية إسعاف سيارات و هاتهالى أو أى طريقة عشان أخرج من النفق ده قالى مش هاقدر أخدمك معلش !!!!!!!! قفلت السكة فى وشه بصراحة .

قلت أكلم محمد على الميكانيكى ؟؟؟؟؟؟؟؟
هاكملكم كمان شوية

-

الموضوع: اسوأ صنايعيه للبيتلز

LinkBack

أدوات الموضوع

عرض

-

-

-

-

-

-

المواضيع المتشابهه

صنايعيه يا اخوااااااانه فى منطقة النادى الاهلى بمدينة نصر

صنايعيه خبره فى المازدا.

ممكن خبراتكم فى صنايعيه فى الأسكندريه

ممكن خبراتكم فى صنايعيه فى الأسكندريه

اسوأ خبر

الكلمات الدلالية لهذا الموضوع

المفضلات

المفضلات

ضوابط المشاركة