الموضوع: الى ملاك البيتلز ارجوا الافادة

المشاركة الأصلية كتبت بواسطة karim_monir

يااه
طب كويس انى لسه فاكر من 5 سنين
ده انا بعاني من زهايمر اساسا

كريم باشا
الله يكون فى عونك لأنى عارف مشاغلك الكتير و ربنا يقدرك و يعينك , و كفاية إنك بتشاركنا بخبراتك و تشرفنا بمشاركاتك :k32:

المشاركة الأصلية كتبت بواسطة M_O_B_I

الحمد لله استلمت العربية ورحت الشهر العقارى فى الحى العاشر واخذت عقد مسجل
وفضلت انظف فى العربية اكتر من 3 ساعات من برة ومن جوة لان صاحبها كان ركنها حوالى شهر - شهرين وفى الاخر خليتها عروسه
وذى ماالاخوة الاعضاء تكرموا وقدموا النصائح تم تنفيذ الاتى
غيرت الزيت بزيت شل X100
تنظيف الموتور وغسله
غسل العفشه وتربيطها وتشحيمها
وباقى انم شاء الله تظبيط الانوار والكهرباءو حبة سمكرة ودوكو
وبعد كدة ان شاء الله هاروح عند الاسطى محمد على ومش عارف هل هو دا اللى تقصدوه ولا واحد تانى يا ريت لو حد يقدر يقولى على العنوان والتليفون ان امكن لان الموتور عالى شوية وعايز يتظبط وكمان الصوت الخارج منة ميش ذى العربيات التانية (صوت صفارة) معرفش دا شكمان ولا موتور اكيد هو هيقدر يظبطه وكمان حاسس ان العربية بتاكل بنزين جامد ان كنت واخد العربية مفولة من صاحبها عند الحى العاشر ورحت الحى السادس وبعد كدة عين شمس ودى حوالى 17 كم وبعد كدة رحت الشغل فى الحى السادس ودى حوالى 13 كم -الاجمالى 30 كم والمؤشر فى النص ماعرفش دا كدة كويس ولا لأ ولا هى كدة بتاكل بنزين .

شكرا لكم جميعا وجزاكم الله خيرا

ألف مبروك العربية و ربنا يباركلك فيها و يكفيك شرها
لو عاوز تظبط تاكيهات و الكهرباء بتاعة الماتور يبقى أنا برشحلك محمد جعفر و الشهرة محمد الأسمر ( ممتاز فى ظبط التاكيهات و الماتور ) و عنوانه أمام سنترال مصر الجديدة فى شارع جسر السويس و تليفونه 0123835856
و إن شاء الله لو مفيش عيب فى الديول بتاعة الشكمان هاتسمع صوت الصفارة المميزة للبيتلز.

و عنوان محمد على الميكانيكى شارع جسر السويس - محطة العرب - هاتلاقى ملاهى و حديقة صغيرة - خلف الحديقة هتلاقى قهوة سلطان - هو الشارع اللى جنب القهوة و تليفونه 0129305520

و أى حاجة هاتعوزها فى البيتلز شاركنا معاك و كلنا و الحمد لله مستعدين للمساعدة
و إبقى إحكيلنا عملت إيه أو ناوى تعمل إيه
شكراً

السلام عليكم ورحمة الله وبركاته
اولا الف مبروك ياباشا على العربيه وربنا يكفيك شرها ويطعمك من خيرها
وان شاء الله هتحبها زينا زمش هتندم ابدا انك ركبت العربيه دى
طبعا كلام كل الاعضاء اللى ردو عليك سليم ميه فى الميه ولا تعقيب عليه
وببلغهم تحياتى كلهم الاستاذ احمد حسن والاستاذ احمد الحسينى والاستاذ ايهاب
ومبسوط جدا جدا اننا بقينا نتجمع من جديد فى المواضيع الشيقه دى واحنا بقالنا مده مش بندخل كتير المنتدى وربنا اللى يعلم ظروف كل واحد مننا
بس ان شاء الله هنرجع نجدد مواضيعنا من تانى ونفيد بعض بيها
بالنسبه للصيانه اللى عملتها كده تمام ومافيش مشاكل بس انا عاوز اعرف انت عملت الصيانه عند مين وياترى اللى عملهالك ميكانيكى بيتلز ولالا لان ده مهم جدا جدا
اما عن موضوع البنزين طبعا استهلاك صفيحة بنزين على 30ك كتير جدا جدا جدا
بس طبعا احنا مش هنقدر نحكم اذا كان عيب من العربيه من اول مره تركبها لان ممكن علشان انت جديد
على سواقة البيتلز ممكن رجلك تكون تقيله عليها او بتقرص بنزين بدون داعى
بس طبعا انت كمان ماتشغلش دماغك بالموضوع ده او اى حاجه تانيه حاليا
الاول لازم تتعود على العربيه وتاخد عليها وتفهم فيها شوية حاجات وراجع مواضيعنا عن البيتلز للافاده
وبعد كده تبتدى تشوف ايه العيوب اللى فيها وتقولنا واحنا ان شاء الله نساعدك وكلنا تحت امرك باذن الله
واحنا هنا فى المنتدى كلنا اخوات وبنفيد بعض لوجه الله تعالى

شكرا لكم جميعا
ان شاء الله هاحاول ارفع الصور
وعلى فكرة الحمد لله انا قرأت جميع المواضيع الخاصة بالبيتلز فى المنتدى
اما عن البنزين اللى بتاكلة العربية انا لسه ماروحتش لحد لكن هاحاول اروح اليوم ان شاء الله لمحمد على علشان اغير طقم السيرفيس ويعمل فحص سريع للموتور وكمان على التنك ووصلاته لان اول ماادور العربية وامشى بلاقى ريحة بنزين جامدة جوة العربية فممكن يكون تسريب فى الوصلات مع انى ربط اى افيز وقرط على كل المسامير بس لحد دلوقتى مجربتهاش ان شاء الله وانا مروح من الشغل هيبان.
ياريت ياجماعة حد يفيدنى انا عايز اعمل سمكرة ودوكو للرفارف والكابوت واستعدل الاكصدامات واركب عتب جديد دا كلة يتكلف كام وترشحوا لى مين وهل الافضل ان ارش العربية كلها ولا حبة الحاجات الصغيرة دى
واخيرا شكرا جزيلا لكل جميعا
قال رسول الله صلى الله علية وسلم (الله في عون العبد ما كان العبد في عون أخيه )

السمكرى عمرو زكريا فى الشارع اللى بعد محمد على الميكانيكى

اول امبارح ذى ما قلتلكم انى هاروح للحاج محمد على وفعلا ذهبت ليه لكن قالى بلاش اليوم علشان الدنيا ليلت المهم ذهبت اليه يوم الجمعة قبل الصلاة وصليت هناك وبعد الصلاة قايلته وابتدى شغل وقاعد يفك حاجات كتيرة وصدرة كان واسع لانى طلبت منه انه يفهمنى هوا ايه اللى بيفكة لان خبرتى ذى ما انتم عارفين انها
المهم نظف الكاربراتير وحاجات تانية كتير وطلب منى ان اشترى ابلاتين وبوجيهات (40 جنية) وركب بعد كدة كل حاجة وقالى دور وقاعد هو يظبط فى الموتور وخليتة يجربها المهم ان صوت الموتور بقى هادى خالص وكلة تمام وحاسبتة والحمد لله وكله بقى تمام
ومشيت من عندة وانا مبسوط وفرحان ولكن الفرحة ما تمت
خرجت بالليل وانا ساكن فى عين شمس عند شارع الوهراء وكنت رايح مصر الجديدة و قبل البنزينه اللى فى سفير لقيت العربية فصلت مرة واحدة وفى لخبطة فى الكهرباء لانى حاولت ان اشغل الانتظار وجدتة يشتغل شويه وشويه لا ركنت العربية وكلمت الحاج محمد على وفى نفس الوقت كلمت اخويا علشان يجى يقطرنى والمهم خليت اخويا يظبط مع الحاج محمد على وجولى عند سفير وقاعد الحاج محمد يحاول وبعد شوية قالى انها فصلت كهرباء وقالى ان الحاج سعيد الكهربائى ممكن يجى يبص عليها وفعلا مشي الحاج محمد على مع اخويا ورجع الحاج سعيد الكهربائى وعمل وصلة وودناها الورشة عندة وركناها وقالى هاشتغل فيها الصبح ان شاء الله
عديت علية الصبح الساعه 10.30 لقيته شغال وبعد اقل من خمس دقائق دور ودارت العربيه ولما سالتة عن السبب قالى انه ماس والحمد لله انه ما دخلش على الضفيرة
الحمد لله استلمت العربية منه واتكلت على الله على الشغل بعد ماحاسبتة .
يا تري يا اخ هاشـم انت جربت السمكرى دا وعندك خلفية لو عملت سمكرة ودوكو للاربع رفارف والكابوت يتكلفوا كام وجزاك الله كل خير .

احمد باشا مبارك

أخبارك إيه و أخبار العربية دلوقتى إيه؟

كويس إنك غيرت الزيت و نظفت الكربراتير و غيرت البوجيهات و الأبلتين بس كان مهم جداً إنك تغير الكوندينسر مع الأبلتين مهما قلك الميكانيكى إنه كويس و الكلام ده عن تجارب كتير .
و كمان راجع تظبيط التاكيهات لأنها ممكن تحمل على البوجيهات و تسبب إستهلاك بنزين عالى و أنا برشحلك فى التاكيهات محمد الأسمر الميكانيكى لأنى جربت كذا ميكانيكى فى التاكيهات و طلعو مش كويسين زى محمد الأسمر الميكانيكى بصراحة

عنوانه أمام سنترال مصر الجديدة فى شارع جسر السويس و تليفونه 0123835856
و إن شاء الله لو مفيش عيب فى الديول بتاعة الشكمان هاتسمع صوت الصفارة المميزة للبيتلز.

و لازم إن شاء الله تراجع على سلوك الكهرباء كلها و انا برشحلك مسعود الكهربائى اللى فى الملك الصالح - مصر القديمة تليفون 0128259917 و هو ممتاز و قريب من محطة مترو الأنفاق بتاعة الملك الصالح.
على الرغم من إنى مقتنع جداً بالحاج سعيد الكهربائى اللى جنب محمد على الميكانيكى لكن مشكلته صبره قليل بحكم سنه الكبير لكنه بصراحة ممتاز و فاهم فى حاجات كتير

شكرا يا استاذ احمد وبارك الله فيك
على فكرة انا ماعرفش ان الميكانيكى لازم يغير الكوندنسر لان الناس كلها بتقول تغير طقم كهرباء او طقم سيرفيس وده اللى طلبته من الحاج محمد على لكن الحاج محمد متكلمش عنه خالص مقالش كويس او وحش ولما طلب منى اشترى طلب البوجيهات والابلتين
بس على العموم العربية دلوقتى كويسه وصوتها بقى ممتاز هادى خالص وان شاء الله المرة القادمه نغير الكوندنسر
جزاكم الله كل خير على ما تقدموه من مساعده