مساعدين كوفاب برازيلى

**M.Mostafa80** · 13-04-2009 02:22 AM

طبعا أنا كنت واجع دماغكو بموضوع المساعدين ونظرا لأرتفاع سعر الأورجينال والى بصراحه أستحرمت أنى أدفع فيهم 3000جنيه وبسب مطبات مصر الجميله ألاقيهم بعد سنه روحو فقلت أشوف أيه الى فى السوق روحت لأشرف أسألو قالى معرفش قلتلو طب أنا سمعت عن حاجه أسمها كوفاب برازيلى وقالو أن هى دى الى بتنزل فى البولو العيون قالى والله هتبقى أحسن السئ الموجود فى السوق توكلت على الله وقلت أجبهم وأنا ونصيبى لقيتهم عاملين 930 ج الأربع مساعدين جبتهم وركبتهم لقيت العربيه بتدب قلت شكلى لبست فى الحيط لكن الحقيقه ظلمتهم لأن الهوا بتاع العجل مكانش مظبوط ولما ظبطت الهوا فى أمارات مصر وطلعت على الطريق حسيت أن العربيه ماشاء الله ولا حول ولاقوه ألا بالله جميله جدا تخيلو طلعو نعمين جدا ومريحين العربيه قوى وبكده يبقو فعلا أحسن الأنواع المضروبه فى السوق انا جبتهم من عند بيروت شارع دمشق
أنا عارف أنى عملتلكوم وش بس حبيت أنقلكو تجربتى معاهم طبعا دا لعربيه بولو موديل 98

**ihab** · 13-04-2009 10:04 AM

المساعدين الكوفاب كويسين و احنا بنركبهم فى البيتلز و شغالين زى الفل

**umoussa** · 13-04-2009 01:55 PM

حمد الله على السلامة

طيب حنصحك نصيحة بقى، لو المساعدين ناشفين متحطش نيتروجين في العجل علشان حيخليك تسمع صوت دب جامد

على الرغم من إنها نصيحة تودي في داهية لأن النيتروجين غاز لا يتمدد ولا يتكون عنه بخار ماء وهو السبب الأصلي والأصيل في إنفجار الإطارات.

بس لو حتستحمل شوية دب، يبقى عليك وعلى النيتروجين

**snakeson2** · 13-04-2009 02:24 PM

يغني ياباش مهندس النيتروجين خطر؟

**umoussa** · 13-04-2009 02:29 PM

يعني أقولك إيه؟؟؟؟؟؟؟؟؟؟؟؟؟؟؟؟

الهواء العادي هو الي خطر يا عزيزي مش النيتروجين

الهواء العادي يحتوي على أكسجين والسخونية بتعمل بخار ماء وبخار الماء يخلي الكاوتش ينفجر

النيتروجين غاز خامل ومبيعملش الوش ده كله وغير قابل للاشتعال

عيبه الوحيد انه بيديك نشوفيه في الكاوتش