الموضوع: سلبيات اجتماعيه ( التوعيه الصحية )

السلام عليكم
يوجد سلبيات فى مجتمعنا كان المفروض تنتهى من زمان
لاكن الغريب انها لسه موجوده لغاية دلوقتى لاننا لم نقاومها
من السلبيات اللى بشوفها كل يوم
1- عربيات الفول
[IMG][/IMG]
شريحة كبيرة من المصريين بيفطرو فول الصبح على العربيه قبل ذهابهم للشغل واللى يدل على كلامى روح عند اغلب المصالح الحكوميه الصبح بدرى هتلاقى قريب من المصلحة لازم يكون فى عربية فول والناس ملمومه عليها ده مش عيب ولا حرام لاكن هل انت متاكد ان اللى بيبيع لك الفول ده راجل عنده ثقافة صحية وعارف ان الخضار مثلا لازم يتغسل كويس جدا هو اصلا ماعندوش مصدر مياه فتلاقيه جايب جردل مليان ميه وبيغسل فيه الاطباق ثلالثين مره طبعا تلاقى الناس متمزجه جدا من الاكل وبيشربو حتى مية السلطة
ولو كلمت حد منهم يقولك ياعم النفس الحلوه ليها الجنه
وانا مش عارف جابو المقوله دى منين
والغريب بقى ممكن تلاقى بياعين الفول بيلفو الصبح بدرى بيبيعو اكياس فول وبليله
بس المشكله ان العربيه اللى بيتباع عليها الفول كارو يعنى الراجل بيتعامل مع الحمار وبيجر العربيه م الحمار يعنى ايده معرضه للميكروبات وطبعا بيلف طول النهار فى الشارع ومستحيل تلاقى حتى معاه صابونه يغسل بيها ايده
على فكره وهو بيفتح الكيس قبل مايعبيه بالفول لازم يدخل ايده جواا الكيس علشان يفتحه
او المصيبه الاكبر انه ينفخ فى الكيس بفمه علشان يفتحه
وهى الناس بشترى وبتاكل اطفالها وبتاكل
2- محلات عصير القصب
[IMG][/IMG]
[IMG][/IMG]
[IMG][/IMG]
طبعا عصير القصب جميل ومفيد
لاكن المشكلة فى النظافه برده والتوعيهالصحية فقط اثبت من زمان ان محلات عصير القصب من اكثر المسببات لانتشار امراض وفيروسات الكبد
ليه بقى
لان ببساطة الراجل اللى بيصب عصير القصب بعد ماحضرتك بتشرب العصير بيشطف الكوبايه بالمياه فقط ويروح قاالبها على بقها ويحطها على البنك زى مابيقولو وطبعا البنك او الطاوله اللى بيرص عليها الاطباق كلها مياه مما يتسبب فى نقل الميكروبات لكل الاكواب
المشكله ان البياع مايعرفش ان فى ميكروبات لو زبون مريض شرب من كوبايه مش هيقتلها ولا المياة ولا الصابون دى على الاقل لازم تتغسل الكوبايه بالكلور
وبرده الناس بتشرب والنفس الحلوه ليها الجنه
ونفس المشكله بقى واحنا على مشارف فصل الصيف وهتلاقى بتوع العرق سوس بيلفو طول النهار باربع كوبايات بيشرب منها كل الناس
3- نيجى بقى للمشكلة الاكبر الشيشه
[IMG][/IMG]
طبعا القهوة بتقدم للزباين قطعة مبسم علشان لزوم التعقيم
طيب ماهو كل الناس وهى بتدخن الشيشه بتنفخ فيها على فترات علشان يطلعو الدخان الزايد
يعنى لو واحد مريض بمرض صدرى معدى هينتقل الميكروب للشيشه
واللى بعديه اكيد هيتعدى
4- نيجى بقى لحاجه خطيرة جدا
كل الناس بتروح الصيدليات ا دويه معينه زى الفياجرا مثلا
هتلاقى المنتج المصرى منها ممكن يعدى ال10 جنيه
بس فى نوع مستورد ب 2 او 3 جنيه
كل الناس بتفضل المستورد لاكن مايعرفوش انهم بيموتو نفسهم بالبطيئ
والسبب ان المستورد ده مش مستورد بطريقه شرعيه وغير خاضع لمواصفات وزارة الصحه
لا ده دواء جاى متهرب ومصنوع تحت السلم وممكن يكون كله جير
اما الدواء المصرى فهو على الاقل اتجرب لفترة لاتقل عن 5 سنوات على البشر قبل طرحه فى الاسواق ومعروف مكوناته
ياجماعه محدش يشترى دواء من الصيدليه من غير مايكون داخل علبه ومكتوب عليها اسم الشركة وتاريخ الصلاحيه
مش تدخل تشترى حبايه كده وخلاص وممكن تكون صلاحيتها اصلا منتهيه
برده من المصايب انتشار ادويه مسكنه كعقار الترامادول
شوفو بقى المصيبه فى نوع متهرب منه ثبت انه بيسبب السرطان والسبب ان الغلاف اللى جواه الدواء او الكبسوله مصنوعه من نوع ردئ فيه مكونات مسببه للسرطان
على فكرة الكبسولات دى لونها اخضر
ماارجوه من الاخوة عدم ترك كلمة شكر
بل اللى شايف سلبيات اخرة يذكرها
علشا الكل يستفيد
ونحاول نقاوم العادات السيئة فى مجتمعنا

انا نسيت حاجه كمان مهمة جدا
كلنا بنروح نحلق شعرنا عند الحلاق وهو بيستخدم الامشاط والفرش من فلان اللى علان وطبعا فى ناس بيكون عندها بثور فى فروة الرأس وفى ناس عندها تنيه
انتو عارفين ان لو واحد كان عنده جرح فى راسه وسن المشط جه فى الجرح بينقل ميكروبات اللى الدم مباشرة
لهذا انا جايب ليا عدة حلاقه خاصة بيا باخدها معايا عند الحلاق علشان يحلق ليا بيها بمفردى
اوعى حد يقول عليا ان انا موسوس
لاكن دلوقتى لو الواحد مااخدش باله على صحته هيروح فى الكازوزة
ولازم نعرف كلنا ان الانسان بكل ماتوصل اليه من علم فى المجال الطبى لايستطيع مقاومة الفيروسات حتى الان
نحن نستطيع القضاء على الميكروبات فقط
وكان فى احصائية بتقول ان مصر من اكبر الدول فى العالم اللى متوطن فيها فيروسات الكبد
وامراض الكبد الوبائيه
ده طبعا ورث من اجدادنا لانهم كانو بيروحو لحلاق الصحة وكان بيدى الناس كلها الابر بسرنجه واحده
واحنا لما كنا فى المدرسة كنا بنهرب لما نعرف انهم هيدونا حقنه
وماكناش نعرف انها امصال للوقايه من اشرس الامراض
النهارده بقى جبت لكم صورة حقيقيه للوعاء اللى الراجل بتاع عربية الفول بيغسل فيها الاطباق
انتو شوفو الصورة بنفسكم واحكمو
انا لسه مصورها النهارده
[IMG][/IMG]