ملاحظة غريبة و محتاج تفسير، علاقة الركنة في الشمس بالدركسيون

**abo_hosni** · 17-04-2009 02:21 PM

السلام عليكم

أنا متعود أن دركسيون العربية عندي خفيف منذ سنتين تقريباً و ثابت على كده. يعني لو ماشي على الطريق ما أقدرش أسيب الدركسيون فترة طويلة -مش بسبب زوايا- عشان أي انخفاض أو ارتفاع أو ميل في الطريق الدركسيون بيحدف معاه شوية فكان لازم أفضل سانده حاجة بسيطة كده. لو الطريق مستوي تماماً مافيش حدف ولا حاجة
مافيش مشاكل تانية حسب ما أعتقد، آخر مرة عملت صيانة للعفشة و الدركسيون غيرت البيضة الشمال عشان كانت بتخبط، و حطيت شحم و غيرت كاوتش الاسكترا و مافيش بوش ولا تخبيط ولا حاجة

و أنا راضي يعني مش زعلان أني باسند الدركسيون و أنا ماشي

الملاحظة بقى:
لما أسيب العربية راكنة تحت الشمس لفترة ساعتين مثلاً بعدين أطلع بيها ألاقي الدركسيون ثابت جداً و ناشف و ممكن أسيب الدركسيون مسافة طويلة من غير ما يتغير اتجاهه بسبب نفس الانخفاضات و الارتفاعات اللي بامشي عليها كل يوم

هتقول ممكن عشان الطريق في الوقت ده بيكون ساخن و جاف فبيكون في traction أحسن؟ طيب ليه لما أطلع بالعربية باردة من الجراج على نفس الطريق في عز الظهر بيكون الدركسيون خفيف
طيب ليه لما أمشي فترة طويلة في عز الظهر بيرجع الدركسيون خفيف تاني مع أن الكاوتش بيكون خد وقته و سخن

نزلت بصيت على وصلة/فلانشة عمود الدركسيون لقيت مساميرها مش سايبة ولا حاجة

إيه التفسير بقى؟
هل ده بسبب تلف ما؟
هل أغفل الميكانيكي حاجة في الصيانة؟
هل في حاجة معينة بتتربط ممكن تثقل الدركسيون شوية؟ لأني عايزه يرجع ناشف زي زمان

من 5 سنين أفتكر والدي كان عمل حاجة عند الميكانيكي أصبح الدركسيون ثقيل جداً حتى أنه في الملفات لازم ترده بنفسك، و لحد 3 سنين كان ممكن أمشي بسرعة 130-140 و انا سايب الدركسيون افتكرت كده لما شفت فيديو كنت مصوره زمان. قعد يخف شوية بشوية لحد ما ثبت على الوضع الحالي

**samirayad** · 17-04-2009 02:35 PM

مش عارف ليه أنا حاسس كده أن المشكله من الشحم اللى أتغير للأسكترا.......خيف ووحش ومع الشمس بيسيح وبيكون البنيون بتاع نهاية عمود الدركسيون محمل على جريده الأسكترا لحم على لحم .....ومفيش شحم بينهم .....وكده بتتقل عملية التوجيه......

هل في حاجة معينة بتتربط ممكن تثقل الدركسيون شوية؟ لأني عايزه يرجع ناشف زي زمان

أعتقد برضه تقصد بكلامك ده أنك عاوزه خفيف زى زمان ......مش تقيل ياعنى

**abo_hosni** · 17-04-2009 03:04 PM

تفسير منطقي و ممكن فعلاً، يعني احتمال ماتعملش بذمة المرة دي، طيب لما أروح للميكانيكي أتأكد إزاي أنه هيعمل اللي أنا عايزه

المشاركة الأصلية كتبت بواسطة samirayad

أعتقد برضه تقصد بكلامك ده أنك عاوزه خفيف زى زمان ......مش تقيل ياعنى

أقصد عايزه يبقى ماسك نفسه أكتر على الطريق السريع على الأقل، لأنه حالياً بيتأثر جامد بالمطبات و ارتفاعات و انخفاضات الطريق و ما أكثرها

**samirayad** · 17-04-2009 03:10 PM

أقصد عايزه يبقى ماسك نفسه أكتر على الطريق السريع على الأقل، لأنه حالياً بيتأثر جامد بالمطبات و ارتفاعات و انخفاضات الطريق و ما أكثرها

تقصد أبه بقولك بيتأثر.....يعنى فيه صوت زى نقر وخبط .....جوه الأسكترا........فى الحاله اللى بتشكو منها وتتحرك بالعربيه بعد مابتكون راكن فى الشمس ساعتين وخلافه

**abo_hosni** · 17-04-2009 05:30 PM

لا دلوقتي مافيش نقر أو خبط مسموع أو محسوس تحت أي ظروف. قصدي لو ماشي طوالي و العجلة الشمال مشيت على حتة منخفضة في الطريق يقوم الدركسيون حادف شمال حدفة خفيفة عشان كده لازم أفضل ساند الدركسيون. لكن لو ركنت العربية في الشمس و رجعت مشيت على نفس الطريق الدركسيون بيبقى ماسك نفسه و مش بيحدف كده و لا كده لو أنا سايبه
ولا ده يعتبر طبيعي بالنسبة لعربية قديمة؟

بافكر أصور مقطعين فيديو (واحد بعد الشمس و واحد من غير شمس :) ) عشان حضرتك تشوف الفرق لأني عارف أنها مشكلة غريبة بصراحة أعذرني

**samirayad** · 17-04-2009 08:26 PM

قصدي لو ماشي طوالي و العجلة الشمال مشيت على حتة منخفضة في الطريق يقوم الدركسيون حادف شمال حدفة خفيفة عشان كده لازم أفضل ساند الدركسيون

أعتقد كده وضع طبيعى ...علشان مركز ثقل العربيه مال شمال شويه ......ولو كان الكلام ده مع اليمين حتحصل نفس الظاهره مع اليمين والحدفه الخفيفه دى حتبقى يمين..........وممكن تجرب الحته دى مع الجنب اليمين ...............وكده مفيش مشاكل تقريبا

لكن لو ركنت العربية في الشمس و رجعت مشيت على نفس الطريق الدركسيون بيبقى ماسك نفسه و مش بيحدف كده و لا كده لو أنا سايبه

لو حاسس أن الدركسيون بقى تقيل معاك عن الأول بعد تغيير كوتشة الأكورديون والتشحيم .......وبالذات بعد موضوع الشمس ده ( علشان كلامنا كله عليه ).......ممكن تروح للعفشجى وتخليه يفك الكاوتش من الجنبين (وصلة الأكورديون ) وكل حاجه فى مكانها ....وممكن تعملها أنت ...وتزود شحم كويس (نوع نظيف ) وجرب .........الصراحه ده اللى فاكره من الأسكترا العاديه اللى كانت عندى زمان ..............وياريت نلاقى أفاده أفضل من الزملاء..............

بافكر أصور مقطعين فيديو (واحد بعد الشمس و واحد من غير شمس :) ) عشان حضرتك تشوف الفرق لأني عارف أنها مشكلة غريبة بصراحة أعذرني

طبعا بأشكرك لزوقك دا كله وثقتك الكبيره وأنا والله على قدى ......وكل اللى بأعمله أنى بأعرض وجهة نظرى فى الموضوع .........يمكن تصيب .....ليس الا ذلك ...........وبلاش تتعب نفسك فى موضوع الفيدو ده لأننى أعتقد لن يفيد فى شىء ....وبرضه ممكن تخللى صديق عزيز عليك ويكون بيعرف فى الحاجات دى يجرب الوضع معاك .....لأن على الطبيعه الأمور والحكم عليها حيكون أفضل بكتير....................................وأ نا متابع مع الزملاء ولو وجدت جديد عندى حقول عليه أن شاء الله

**abo_hosni** · 25-04-2009 04:19 PM

أشكرك جداً على المتابعة يا م/سمير
دلوقتي أنا ضبطت ضغط الكاوتش لأني قسته لقيت العجلة اليمين ناقصة عن الشمال 5 و ما كانتش واخد بالي. المهم دلوقتي المشي على السريع أحسن. و الدركسيون مريح في المشي داخل البلد. بس لسه مش لاقي تفسير لموضوع ثبات الدركسيون بعد الوقفة في الشمس
حضرتك قلت ممكن الشحم قليل و خفيف بيسيح مع الحرارة فبيبقى الكونتاكت حديد ×حديد بس في حالة زي دي مش هيبقى في تخبيط في المطبات أو صوت مع الدوران؟

بالنسبة لموضوع الشحم رفعت العربية و لقيت الكاوتش مقفول بقفزان بلاستيك و أنا مش عندي قفزان في البيت فمارضيتش أفكها عشان مش عايز أعك الدنيا، بس حسيت بإيدي من فوق الكاوتش و واضح أن في كمية شحم معقولة في الداخل و مافيش قطع أو دليل على تسريب الشحم ولا حاجة

كمان لما سقت عربية صاحبي (نفس الفصيلة 504 برضه) لقيت الدركسيون ده زي ده في المشي و بيحدف بسيط لو الطريق مش عدل. أعتقد كده ما عنديش مشكلة بس سألته على موضوع الشمس قال لي مش بيلاحظ حاجة زي كده أو مش بياخد باله

**sab3aawy** · 26-04-2009 01:00 PM

على فكرة الموضوع ممكن فعلا يكون من علبة الديريكسيون وومكن يكون من الكاوتش، ممكن تكون حرارة الجود العالية بتؤدى لزيادة ضغط الهواء داخل الاطارات ، فلو هى اصلا ناقصة الوزيادة دى بتوصلها لوضعها الطبيعى ستحصل على تراكشن افضل
عموما هو مجرد احتمال، لو عايز تتأكد لو كان لو علاقة بالموضوع وللا لأ انفخ الكاوتش لحده الطبيعى وهو بارد، وتابع هل الظاهرة دى موجودة وللا لأ، لو اختفت يبقى هو الكاوتش ولو ظلت موجودة يبقى خرجنا الكاوتش من الاحتمالات