vectra 2000 cc moled 97

**belbesy** · 18-04-2009 02:32 PM

السلام عليكم
اخوكم محمد هضو جديد فى نايل موتوز

بخلص ف عربيه فيكترا 2000 سى سى اوتوماتيك
رشه برا انما جوا فبريكه

موديل 97

انا مش ليا ف العربيات اد كده

وعاوز اعرف رايكم فيها ايه

وسعرها هيعمل كام ؟

وهل دى الاحسن ولا نوبيرا 2001

مع العلم انى بجرى كتير ورجلى تقيله جدا على البنزين

ويا ترى الاتو احسن ولا المانيوال

لانى بصراحه بستمتع بالمانيوال ومش جربت اوتو خالص

بس الراجل صاحب المعرض عمال يقولى بلاش فيكترا
قطع غيارها غاليه وسفاحه بنزين

خليك ف النوبيرا قطعغ غيار رخيصه ولو غيرتها ف اى وقت مش هتخسر فيها

افيدونى ربنا يجزيكم خير الجزاء

تحياتى لكم

**MohamedGafar** · 18-04-2009 02:57 PM

أنا عن نفسي ما بحبش لا الياباني ولا الكوري ولا عمري إشتريت واحدة منهم! عربيات ورق فى الحقيقة وشكلها بيتبهدل بعد كام سنة إلا لو حافظت عليها زي عينيك!

طبعا الأوبل تكسب بلا نقاش بس المهم الحالة وطبعا هي بتستهلك بنزين اعلي بسبب الوزن والسعة اللترية. قطع الغيار أرخص بكتير مقارنة بالعربيات اللى فى فئتها.

بالنسبة للسرعة والرجل التقيلة، طبعا أغلب الأعضاء عارفين إن دي مش مشكلة فى الأوبل!.

بالنسبة لل 2000 سي سي . يفضل طبعا انها تكون أوتوماتيك لأنها حاجة تانية خالص غير المانيوال.

ألف مبروك مقدما

**belbesy** · 18-04-2009 03:06 PM

الله يبارك فيك

شكرا على زوقك

طيب حضرتك انا دايما بركب 504 وعمرى ماسالت عن اى حاجه لو فيها اى حاجه بديها للميكانيكى واجى ادفع الفلوس وامشى

طيب دلوقت انا اول مره اتعامل مع صاحب المغرض دا

اركز على ايه طيب وانا بتفرج عليها
لان ميعادى معاه بعد ساعات
واسال صاحب العربيه ف ايه

ورنج السعر كام ؟
هوا بيقول من 45 الى 50

وممكن يخلصها على 48

ايه رايكم ؟

وجزاكم الله خيرا ً

**MohamedGafar** · 18-04-2009 03:41 PM

مسألة السعر دي على حسب الحالة. بص خللي بالك إن العربية دي لو حالتها مش قد كده حتتعبك. لو لقيتها تعبانة سيبها ودور على غيرها وخللى بالك الموضوع ده مهم لأنها لو فتحت بقها مش حتتسد!

**Ahmad Allawy** · 18-04-2009 03:49 PM

يا اهلا بيك يا محمد بيه..
يعني جعفر بك قام بالواجب و زيادة..
بس احب اعقب بشوية حاجات بسيطة..
سعر المعرض ده حاجة من 2.. يا اما هو موقعها بسعر قليل قوي من صاحبها.. و في الحالة دي.. هو بيبيعها بسعر قليل عشان برضه هو كسبان.. يا اما العربية حالتها مش تمام قوي..و عشان كده سعرها قليل شوية..

اللي انا اعرفه و السعر الطبيعي ليها مش سعر التجار.. في حدود 50-55 الف..
المهم تكشف عند حد متخصص اوبل.. التوكيل او اي حد متخصص.. ودي اهم نقطة..
عشان هو بيبقي عارف هو بيبص علي ايه.. و ايه سعره غالي ف التصليح.. و ايه تصليحة مش مشكلة...
العربية دي فيها حاجات غالية.. و مكلفة.. و لازم لما تشتري العربية تكون الحاجات دي سليمة.. او تخصم تمنها من البايع..و الحاجات دي ميعرفش يكشفهالك غير واحد متخصص.. عشان كده انا باشدد علي الكشف ده..

عموما.. العربية استهلاك البنزين كتير شوية.. بس بيتهيألي لو انت كنت بتحط بنزين 90-92 ف البيجو.. مش هيبقي الفرق كبير ف الاستهلاك..و الفلوس..

عموما لو حبيت قولنا انت مكانك فين نوصف ليك حد كويس تكشف علي العربية عنده.. و يقولك نظامها ايه.. تاخدها ولا لأ..

**belbesy** · 18-04-2009 04:04 PM

شكرا يا جماعه كتير على اجاباتكم

انا من بلبيس .... الشرقيه

طيب قولولى بس انا ابص على ايه ف العربيه واركز على ايه

وانا ان شاء الله هقدر اكشف موضوع التاجر دا ان كان موقعها بسعر قليل ولا لا

بس المشكله ف انى ابص فين ولا ايه ف العربيه

وزى ما قلتلك هيا رشت براااا
انما جوا فبريكه

يعنى 48 شويه عليها ؟

ان خايف يا جماعه اخدها وبعدين اتدبس ف مصاريف كبيره

مع العلم انى سفاح
ف المانيوال العربيه بتصرخ منى
الله اعلم بقا الاوتو بتنقل لوحدها وتشد منى من غير ماخد بالى

**Ahmad Allawy** · 18-04-2009 04:52 PM

يا اهلا بيك يا باشا..
احمد بك الشيخ بقي اقدر واحد يفيدك ف الموضوع ده.. عشان هو من الشرقية..و يعرف الناس اللي هناك..
لو طنطا قريبة منك.. في حد كويس و امين جدا تبعنا هناك.. لو تقدر تروحله..
الحاجات المهمة.. الmaf وده حساس تمنه 2000 جنيه..
و التكييف برضه مكلف..
و بلي العجل..وعلبة الدركسيون.. محتاجة كشف كويس..
و اكيد في حاجات تانية انا مش عارفها عشان انا مش حريف ف الفيكترا..

و بالنسبة للسواقة.. هي بتنقل لوحدها بس علي عدد لفات عالي.. وده هيستهلك بنزين كتير معاك.. بس مش هتحتاج تحرق عليها قوي.. عشان هي ما شاء الله سحبها كويس قوي..

**belbesy** · 18-04-2009 05:07 PM

ربنا يخليك ياباشا على معلماتك القيمه

يا رب احمد بيك الشيخ يشوف الموضوع

**MohamedGafar** · 18-04-2009 05:07 PM

علاوي باشا. مساءك فل

أهو الخبير الكبير اللى حيفيدك وصل

**Ahmad Allawy** · 18-04-2009 05:13 PM

جعفر بك حبيبي..
ربنا يخليك يا باشا.. بس والله مش خبرة ولا حاجة.. انا ف الفيكترا طفل بيبي.. :)
انا بعت لاحمد بك الشيخ و للعمده الكبير علي الخاص.. علي اساس انهم قريبين شوية من محمد بك البلبيسي.. و ان شاء الله هيردوا علينا في اقرب فرصة لما يشوفوا الرسالة..