الموضوع: سؤال عن الريجاتا

استاذ عصام اهلا بيك.
بالنسبه للريجاتا اهم حاجه تشوف اساسيات العربيه يعني القوايم و الصدر و الشنطه لو حالتها نضيفه يبقي تاخدها من غير كلام و اي حاجه في العفشه او الموتور محلوله.
بالنسبه للتمن دا ف لو تحاول تنزل معاه 2000 جنيه يبقي كويس خصوصا انها موديل قديم و من غير تكييف.
موضوع التكييف دا انا مش برشحه الصراحه علان عمر ما التكييف حيبقي كويس زي بتاع الفابريكه غير ان الاوربي مكيفاته ضعيفه شويه في لموديلات دي ف يستحسن تتري عربيه جاهزه احسن.
اسعار قطع الغيار متوسطه لا هيا رخيصه زي ال 128 ولا هيا غاليه يعني معقوله جدا ما تقلقش من اسعارها و كل قطع غيارها متوفره.

تشكر يا أستاذ حازم، كلك ذوق والله
وسؤال : يعني العربية الريجاتا حتى لو كانت بتكييف فهو كده كده ضعيف ، فمن الأحسن إني أشوف نوع تاني قصدك واللا إيه؟

و الله يا استاذ اسامه بيبقي علي حسب العربيه يعني لو العربيه حالتها كويسه و تكمييفها دا اصلي بتاع بلادها يبقي ان شاء الله حيبقي كويس لكن ما تتوقعش منه انه يبقي زي الياباني او الكوري لكن حيشتغل كويس.
يعني لو حضرتك ممكن تزود كمان 10 الاف يبقي تجيب اكسيل او سويفت مكيفه جاهزه و موديلات تسعينات و بكده تبقي طلعت بالموديل 10 سنين و دا حيفرق كتير اوي مع حضرتك.
لكن لو مش ناوي تزود يبقي الريجاتا حل عملي و مقبول جدا لكن الشرط الحاله الجيده و خصوصا الاساسيات و ما تستعجلش دور بالراحه لحد ما تلاقي واحده بنت حلال تستاهلك :)

السلام عليكم و رحمة الله
استاذ اسامة انا هكلمك عن الريجاتا عن تجربة شخصية الريجاتا عربية حلوة جدا قطع الغيار اسعارها معقولة ليست مثل ال 28 و لكن معقولة العربية جامدة و بتستحمل التكييف يتاعها ضعيف مقارنة بالعربيات الكورى او اليابنى بس شغال انا جبت ريجاتا موديل 86 مكيفة و فابريكة من جوة 26.5 الف من شهر 4/2007 بس طيعا كان فيها شغل سروجى و كمان فيه شوية شغل فى الكهرباء بس اهم حاجة تبص عليها فى العربية بعد الاساسيات هيا التابوة لان تابلوة الريجات ضعيف و هو ده اكتر عيب فيها انا هاقولك على بعض اسعار قطع الغيار التى غيرتها حديثا
1-المساعدين الامامى و الخلفى سعرهم يتراوح بين 360 البولندى و الايطالى الى 420 الالمانى
2-المقصات التركى 120 الالمانى 240
3-قربة الماء 90 العادية و الكمبيوتر 140
4-طقم السيرفيز مش غالى السيور الدينامو 10 و سير الكاتينة 40 و البوجيهات دينسو 25 الابلاتين و الكوندنسر 40
5-الفلاتر البنزين 5 الزيت 10 الهواء 10
6-الريادتير النحاس 340
و احيرا الريجاتا عربية عملية جدا و هى عربية عائلية الشنطة بتاعتها كبيرة جدا بتستحمل الاحمال و المطبات و الشوارع المكسرة العفشة بتاعتها جامدة و انت عارف الشوارع فى مصر ماشاء الله حتى الشوراع الرئيسية و المحور لم يخلو من المطبات و التكسير
و شكرا و ربنا يوفقك و تقع فى عربية كويسة

السلام عليكم ورحمة الله
انا بتكلم عن تجربة شخصية
الريجاتا مازالت معي وهي عربية رائعة فعلا بس بشرط تكون اسياسيات فابيريقة
التكييف بتعاها ممتاز جدا ويمكن عندي لانة فابريكة وهي عرربية ناعمة جدا اكنك راكب موديل عالي فعلا وعربية حمالة قسية وقطع غيارها رخيصة جدا ماعدا الاجزاء الخارجية
زي الاكصدامات ب 350 جنية و400
والفاونيس الامامية ب220 الواحد استيراد والخلفية 150 كامل والوش خلفي ب60
وغطا تنك البنزين ب 60 استيراد
هو ده عيبها الوحيد
لكن هي افضل من الاكسيل بصراحة لو مظبوطة
وبصراحة فكرت كتير ابيعها بس ارجع في كلامي لانها في رايي افضل من الهيونداي والافضل انك تنقل للانسر او تويوتا